:
Powered By
BLOGFA.COM
مین بیر گئجه: آفتاب آذربایجان درگیسی، ایرانین باتیقوزئیینده یاییملانان چوخ اوخوجوسو اولان نشریهلردن بیریدیر. یازیلاری ایکی دیلده اولور، آذربایجان تورکجهسی و فارسجا. من بیلن اوخوجولارین ماراغینی قازانماق، بو درگینین اساس آنا خطلریندن ساییلیر... تورکجه بؤلومونون باشیازاری سایین سهند نظمی اولاراق، هر ساییدا آیری آیری یازیچیلاردان و شاعیرلردن مطلب گئدیر. اؤرنک اوچون، یئنیجه یاییملانمیش اوندوققوزونجو ساییدا (تیر 87) سلیمان جعفری، ثریا قاسمزاده، ایرج سلمانی، اسماعیل علیقلیپور، آیناز ستاریفر، باریش گونئیداغلی، ملیحه عزیزپور، هادی درخشان، آشیق فرخ مهدیپور، علی فرهاد، رضا همراز، ساناز اسمعیلزاده، حسن جمشیدی، جلال روشنی، سلیمان عسگر، ساناز شهابی، حبیب گشتاسب، زهرا نیکروان، آراز فکری، صیاد فیضی، گولبادام خانیم! و مندن یازی وار. ها بئله، بو سایینین "تنهبی" صحیفهسینده منله بیر دانیشیق آپاریلمیشدیر. بیر اوخوجو کیمی، آفتاب آذربایجانـین بوتون امکداشلارینا یورولمایاسینیز دئیهرک، چاپ اولونموش بو قیسا موصاحیبهنی مین بیر گئجهـدن ده یاییرام.
***
دانیشیغی آپاران:
سهند نظمی، سلیمان جعفری
آفتاب آذربایجان: هر ندن اؤنجه اؤزونوزو تانیتدیرین؟
ـ من رضا کاظمی...
یازینین آردی
«اوچ گؤرونتو، بير قارا باسما» اؤيكوسو؛
ايچ مونولوق و ذهن آخيمي
جعفر بزرگامين (يارين)
قایناق: http://www.yarinlar.blogfa.com/post-27.aspx
بو گون ادبییاتیمیزدا، شعر يازماق نه قدَر قولاي سانيليرسا، و سايين دوشونور و يازاريميز ايواز طاها دئميشكن، الينه كاغیذ ـ قلم دوتان شعر يازماغا قالخميشسا دا (يانليش دويولماسين، بارماق سايي قدَر جيددي، استعدادلي و چاغداش شاعیريميز تاپیلیرسا)، نثر و اؤزهلليكله اؤيكویله رومان يازماغا گيريشهنيميز و بوندان دولايي ایسه (شعريميزه تاي) پروفیسيونال دورومدا قوناق قاباغینا قویمالی اؤيكو و رومانيميز هئچ اولماميشدير داها دوغروسو. بیزیم نثر ديليميز، (يئنه شعريميزه تاي) آذربایجان جمهورییتی و آنا دولو ادبي توركجهسي و شیفاهي لهجهلريندن اولوشان هيبريد كيمي بير ديل و نثردير. بو اوزدن ده كيمسهني نييه بئله، نييه ائله یازیبسان دئیه قيناماق اولمور. بير بئله اولاناقسيزليقلا (امکانسیزلیقلا) شعر و نثر ادبياتيميزين گليشمهسي يئنه اوغورلو اولموشدور. منجه، بو گون، شعریمیزده و نثریمیزده ایدهآلیسم دوزاغینا دوشمهدن، شعر و ادبياتيميزي حاكیم (ائگهمن) كولتور و ادبياتی و يا دونيا ادبياتيیلا قارشي ـ قارشييا قويوب توتوشدورمادان، مؤوجود دوروموموزدا چاغداش شعر، اؤيكو و رومانيميزي آراشديريب، اينجهلهييب، گليشمهسينه ایسه اليميزدن گلن يارديم ائتمهلييیك...
بو گونلر، يئنيجه ايشيق اوزو گؤرموش «لاپ او اوزاقلاردا» آدلي اؤيكو توپلوسو اليميزه چاتيب، «قورشون هاردان آچيلدي»، «آواوا»، «ماماچ»، «آرباتان»، «منيم آدلاريم»، «دونكيشوت و دلي دومرولون كؤرپوسو» كيمي ياييملانميش اثرلر تك هاميميزي سئوينديردي. بو اثرلر دیققتله اوخونوب، دوروملاري اينجهلهنيب تنقيد اولونماليديرلار. «لاپ او اوزاقلاردا» اؤيكو توپلوسوندا، 10 اؤيكو يئرلشميشدير و من بورادا اونونجو و سونونجو اؤيكوسونون اوخونوش و تنقیدینی يئني فضا، روايت و اوستون مَتنـه (اَبَر متنـه) ياخين اولدوغونا گؤره، قاباغا ساليب، کیتابین باشقا اؤيكولرينه ده آيريجا بیر مقالهده باخيشيم اولاجاقدير...
یازینین آردی
مین بیر گئجه: نیگار خانیمین بو اؤیکوسویله باغلی اونونلا قونوشدوغومدا، حئکایهنین دیلینه گؤره بیر پارا دانیشیقلاریمیز اولدو. بونا گؤره سونرالیقدا بلکه ده بیر مطلب یازدیم، آیریجا. هر حالدا، بیزیم اؤیکو 10 باشلیغی آلتیندا گئتسین دئیه حئکایهسینی اختیاریمدا قویدوغو اوچون نیگار خاتین خیاوییه اؤز درین سایغیلاریمی بسلهیرک، آشاغیداکی اؤیکونو بیرینجی دؤنه اولاراق، مین بیر گئجهـدن اؤیکویله ماراقلانان اوخوجولارا سونورام. بیزیم اؤیکو بیردن بیزیم اؤیکو اونـا کیمی یاییلمیش اثرلری خاطیرلادیقدا، دئیهسن گئتگئده بیزیم اؤیکو آدلی اؤیکو آنتولوژیسینین فورمالاشماسینا اومید ائتمک اولور... بئله اولسون!
***
اؤزوموز واریق دااا...
نیگار خیاوی
ائودن چیخاندا سحرچاغی گؤزلهدین "سیبلجان" کلیپینی قورتاردي، سورا چیخدين. شالواریوی اوتاقدا گئیيب دویمهلریوي تلسه تلسه گتیریب "سیبلجان"ـین قاباغیندا دویمهلدین. داراغیوی دا جیبونده گتیریب چاللانمیش ساچلاریوی اونون قاباغیندا دارادین. او بیری جیبوندن آتکولون چیخاردیب تزه قیرخدیغین اوزووه، بویون بوغازیوا سپدین. سورا الیوی چکدون بویون بوغازووا. الیوی شالواریوین زیپینهجن ائندیردون. کؤینهییوین دویمهلرینی گؤبهییوهجن آچیب تزهدن دویمهلدون "سیبلجان"ـین قاباغیندا. الیوی شالوار جیبیوه سالیب دهلیز قاپیسینا ساری گئدنده دؤنوب منه باخدون. قاپینی باغلیییب چیخدون. تزهدن قاپینی آچیب سَسیوه قایغیلی هاوا وئریب دئدون:
ـ مامانگیله زادا گئدیسن آپاریم؟
ـ حؤوصلم یوخدو، دئدیم.
مامامگیلی تئز تئز یادیما سالیسان بو گونلر...
یازینین آردی
بیر ایکی ایل گئجیکدیکدن سونرا، یارپاق قزئتی یئنه ده یاییملاندی... اوندؤردونجو ساییدا دولغون دوشونجه صحیفهلریندن علاوه، همیشهکی کیمی اؤیکو، شعر و پاپلیک یازیلار دا گئتمیشدیر. بو اؤنملی اولایی، سایین دوکتور ایواز طاها و یارپاغین یئنی امکداشلارینا تبریک ائدیرم. اوغورلار اولسون!
مین بیر گئجه: آشاغیداکی اؤیکونون یازاری، تانینمیش شاعیریمیز سایین ووقار نعمت جنلابلاریدیر. بو اؤیکونو ایلک اؤنجه اینترنت اوزره کئچیریلمیش سونای آدلی حئکایه فئستیوالیندا اوخوموشدوم. باش توتمایان رومان اوردا سئچدیییم بئش ایلک اؤیکولردن بیری ایدی... نسه، بورادا گئدن بیزیم اؤیکو سیرا حئکایهلری، سونرالیقدا ال وئریرسه (اؤیکو آنتولوژیسی کیمی)، کیتاب شکیلینده یایماغیما فیکیرلَشدیییمدن، بو اثرین اولماماغینا حئییفلیغیم گلدی. اوندان ایجازه آلدیغیمدان سونرا حئکایهنی اختیاریمدا قویدوغونا گؤره، ووقار نعمتـه درین سایغیلاریمی بیلدیرهرک، باشقا سایین یازیچیلاردان ایسه اؤز دَیرلی اؤیکولریندن بیرینی ایمئیل آدرسیمه گؤندرمکلرینی ریجا ائدردیم. مین بیر سایغییلا، مین بیر گئجه!
***
باش توتمایان رومان
ووقار نعمت
سوپورلر خیابانی سوپورور. قاپی آغزینا قویولان آشغاللاری آشغال ماشینینا تولازلاییرلار. پیشیکلر بیربیر آتآشغالین ایچیندن چیخیب تیزیخیرلار. پنجرهنی اؤرتوب ماسانین آرخاسینا کئچدی. گئجه یارینی کئچمیشدی.
بیر گنج قادین قاپینی ایتهلهییر. آچ دئییردی. آچماق ایستهمیردی آمما آچدی. گؤزلری قادینین گؤزلرینه ایلیشجک، قالدی. گؤزلرینه قان سیچرامیشدی. بو گئجه گؤزو!... یالنیز چیلپاق بیر قادین!...
قاتار فیت وئردی تونئلده. کیشی باشینی قوجاقلاییب قولاقلارینی توتوب گؤزلرینی یومدو. قاتار بئینینده سورونوردو هله. قادین اللرینی یوخاری قالدیردی. بیر کیشی باشیدیر اللرینده. هله قانی قوروماییب سوزور. ـ «اَریمین باشیدیر»، دئدی، ـ «گَل آل. گؤردون من اؤلدورهرم! راحات اولدوق. بهیم یوخ؟!»
ـ «یوخ!... بوندان رومان اولماز»، دئدی یازیچی، ـ «بئله باشلاماق اولماز. یعنی اولار، آمما یاخشی دئییل.» ...
یازینین آردی
آلنيميزدا آخان آراز
رضا كاظمي
منجه، مدنيتلر آراسيندا گؤرونن فرقلره نهايت بير «سؤز» كيمي ياناشماليييق. بو سؤز، ادبياتا چئوريله بيلر، ها بئله فلسفهيه، تاريخه، عرفانا و يا باشقا فورملارا دا. بو چئشيدليليكدن آنلام يارانير و ايستر ايستمز بوتون ايلگيلريميز بو آنلامدان ائتکيلهنير. بو آنلامي تكجه «كيمليك» آدلانديرماق ايستهميرم. بئله نظره گلير كي، كيمليك كيمي فنومن ياخشيجا بو آنلامدا يئرلشسه ده، هله دانیشماغا يئنه ده سؤز وار. بلكه ده ائله بو سؤزلري دئمكله، اؤرنهيين، ادبيات تكين فورملارا ساري اوغراييريق.
***
منه ائله گلير كي، هر اؤلكهنين ادبي ياراديجيليغيندا، او اؤلكهيه عاييد اؤزل بير داد، بويا و يا قوخو دويماق اولار. بئله كي، او اؤلكهنين آدي گلنده اؤزل بير آنلام دا خاطيريميزدن كئچير. باشقا سؤزله، اؤلكه آنلاما چئوريلير! اؤرنهيين، لاتين آمئريكادان دانيشاندا آرتيق، خريطهلر اوزهرينده ياپيلميش آمئريكادان دانيشميريق. ماركئزين «يوز ايلين تنهاليغي» گؤزوموزون قارشيسيندا جانلانير و يا ترسينه، «يوز ايلين تنهاليغي»ـني اوخوياندا لاتين آمئريكادا گزيشيريك. بو گزيشمهني «دويماق»، ها بئله «قاوراماق» دا دئمك اولار.
***
بيز هر بير آذربايجانلي كيمي ادبياتدا و باشقا فورملاردا آذربايجاني اؤزوموز اوچون، هم ده دونيا اوچون قازانماغيني باجارماميشيق. بورادا، مقصديم ناسيوناليستي دويغولارا قاپيليب شعار وئرمك دئييل. اؤرنك اولاراق، بيزدن «سؤز» گئدنده، ياخشي پيس «آراز» دا ايرهلي آخينير! منجه، آراز، دئديييميز سؤزون بير بوجاغيندا يئرلشير؛ تاريخ كيمي، ادبييات كيمي و …
بيزيم بير چوخ آداملاريميزين دوشوندوكلرينين ترسينه اولاراق، آراز سمبل كيمي دئییل، آنلام كيمي آخير: سؤز كيمي؛ و چاغداش دونيانين هايكويونده بيز هله ده اونون ديليني تاپا بيلمهميشيك. خريطه اوزهرينده آخان آرازا باخماياراق، گؤرهسن آلنيميزدا آخان آراز نهلر سؤيلهيير؟!
ــــــــــــــــــــــــــــ
مین بیر گئجه: بو یازی، 1383 ـ جی ایلین بهمن آييندا، يارپاق قزئتينین اوچونجو ساييندا چاپ اولموشدور.
قرافیست: مهیار علیزاده. آیخان
(۱۰۰۱ گئجه وئبلاقی ـنین لوقوسو)
آت ايتي
رضا كاظمي
قيز عسكرى يئره چيرپدي. سونرا ورقلرى قاباغينا ييغاراق، اوغلانا باخيب گولدو؛ ـ «يئنه اويناييرسان؟»
اوغلان اليندهكيلرى سپهلدى اورتايا، ـ «ياخشى! سن اوددون.»
ـ «ايندى ايت كيمى اووولداماليسان»، قيز دئدى.
اوغلان سيقار قوطوسوندان بير گيله چيخاريب آليشديردى.
ـ «او قدَر چكيبسن نفسين سيقار اييسى وئرير...»
اوغلان سيقار داماغيندا ایکن دؤرد ال آياقلى خالچانين اورتاسينا ایمکلهییب اووولدادى.
قيز ـ «بئله يوخ» دئييب، دؤرد ال آياقلى اوغلانين قاباغیندا داياندي، ـ «بئله!» و باشيني تاوانا ساري توتوب اووولدادى.
اوغلان يانى اوسته يئره اَيلشدى، ـ «نه فرق ائلهيير؟» ...
یازینین آردی
قاپی
رامین جهانگیرزاده
اوچ قدم او یانا... ! اوچ قدم بو یانا... ! سحر آچیلینجاق آددیملادی... اوچ نفرین آددیم سسینی ائشیدیب دایاندی. قاپییا زیللنرکن، تیترهدی بدنی. آددیملار یاخینلاشدیقجا، بوتون بدنینه قورخو یاییلیردی.
بیر آددیم... ! ایکی آددیم... ! اوچ آددیم... ! بیرینجی قاپینین آچیلماسینین سسی بئینینه دوشدو.
بیر... ! ایکی... ! اوچ... ! ایکینجی قاپینین سسینی ائشیدیب قولاقلارینی توتدو. گؤزلرینی یوموب سسسیزجه آغلادی.
بیر... ! ایکی... ! اوچ… ! بیر آن، آددیملارین سسی کسیلدی. سونونجو قاپی آچیلدی. اوچ نفر ایچَری کئچدی. گؤزلری گؤزلرینه ساتاشدی. اودقونوب یئریندهجه قورودو. بیر سؤز دئمهدن گؤزلری دولدو. سونرا سینهسینی قاباغا وئرهرک، باشینی دیک ساخلادی. ـ «من حاضیرام، آپارا بیلرسیز!»، دئدی.