"مین بیر اؤیکو" ادبی یاریشی ـنین پوستری

قرافیست: مهیار علیزاده. آیخان

بو ادبی یاریشلا باغلی داها آرتیق بیلگی الده ائتمک اوچون، آشاغیداکی آدرسی تیکله­یین لوطفن:

WWW.Oykuler.blogfa.com

 

تنقید 13. آیدین آراز

 

مین بیر گئجه: آشاغیداکی متن،  آیدین آرازین بیزیم اؤیکو ۱۶ باشلیغی آلتیندا گئدن، ساعات اون­ایکیده کیشی هله ده آغلاییر آدلی اؤیکویله باغلی یازدیغی اؤزل باخیش­لاری­دیر. گنج شعریمیزین قوجامان شاعیری آیدین آرازا مین بیر سایغی بسله­یرک، اوندان یئنه ده اؤز دَیرلی باخیش­لارینی بیزدن اسیرگه­مه­دییینی دیله­ییرم.

***

نئچه نوت آتیلا اسکندانی­نین اؤیکوسونه

آیدین آراز

ساعات اون­ایکیده کیشی هله آغلاییر"، ان یئنی اوخودوغوم اؤیکودور. یئنی،آغیر و لذت تؤره­دن بیر اؤیکو. بورادا، اؤیکوچو و تنقیدچی دوست­لاریمدان ایذین آلاراق، سیزی نئچه سطیر یازدیغیم نوت­ـون اوخوماغینا دعوت ائدیرم.

1ـ "ساعات" سؤزجویویله باشلایان بو اؤیکوده، زامان مسئله­سی و بوتون اولای­لارین یالنیز بیر ساعات و بیر دقیقه­ده باش وئرمه­سی. ساعات کاراکتئریند­ن اؤیکونون نفعینه ایش چکیلمه­سینی دوشونولور. ساعات 49/10ـدیر. 3 ثانیه سونرا، بیر اولای باش وئره­جک. بیر وعده وئریلیر. بیر خبر. یوخسا بیر رئپورتاژ اوچون باشلانیش. ساعات 53/10... ساعات 45/10... ساعات 55/10... ساعات 11... و داوام ائله­ییر. بو آرادا، قیسساجیق زاماندا نئچه راوی­نین روایتییله اوز اوزه­ییک...

بیزیم اؤیکو 17. (منی قالدیرین لوطفن، حامد احمدی)

مین بیر گئجه: حامد احمدی (تبریز، 1364)، تهران عللامه بیلیم­یوردونون بیرلیک آدلی اؤیرنجی درگیسی­نین باش­یازاری­دیر. بوندان داها اؤنَملیسی، ذاتن اؤیکوچودور!

***

منی قالدیرین لوطفن!

حامد احمدی

"آدیم قارا لیست..."

محمدرضا لوایی

گئجه ایدی، قاچیردیم. یاغیش یاغیردی. هارا گئتدیییمی دوشونموردوم. بیر آندا ییخیلدیم. قاچیردیم، قاچماغیمین سببینی سوروشما. هر یئریم سو اولدو. قیزیشدیم. اوچماق حیسسیم وار ایدی، نه اوچون ییخیلدیغیمی بیلمیرم. سانکی اؤلو بیر زاد ایدیم. یاغیش یاغیردی اوستومه. الیمین دریسی سویولموش، شالواریم ایسه جیریلمیشدی. اؤلموشدوممو یوخسا اؤلمکده ایدیم؟ آغرینی حیس ائتمیردیم آخی.

ـ "او نییه اوزانیب یئره؟"، کوچه­دن سوووشان بیری یولداشیندان سوروشدو. اونلارین چتیرلری وار ایدی، قاچمیردیلار دا. گلدیلر باشیم اوسته ـ "گؤره­سن اؤلوب؟" دئیه  او بیری سوروشدو.

یوخ دیری­یم. منی قالدیرین لوطفن...

ـ "بلکه ماشین ووروب... یاخشیسی بودور دایانمایاق." ...

بیزیم اؤیکو 16. (ساعات اون ایکیده کیشی هله ده آغلاییر، آتیلا اسکندانی)

مین بیر گئجه: ایل­لر بویو آوانقارد بیر اؤیکوچو کیمی چالیشدیغیندان، آتیلا اسکندانی اؤزللیک­له تبریزین ادبی چئوره­لرینده تانینمیش بیر آددیر. اونون لاپ یئنی­جه یازدیغی آشاغیداکی اؤیکو، بیرینجی دؤنه اولاراق، مین بیر گئجه­ـدن یاییلیر.

***

ساعات اون­ایکیده کیشی هله ده آغلاییر

آتیلا اسکندانی

 ساعات گئجه­نین اون قیرخ­دوققوز دقیقه­سی، تیک... تاک... اوچ ثانیه سونرا، بیر حادیثه باش وئره­جک. قادین، اوشاق­لاری شام یئمه­یه چاغیریر. ایکی ثانیه اؤنجه، ساعات اون اللی دقیقه اولوب. آنا، باخ، مویاد قویچاغیمین ساچ­لایینی یویدو... اوننان نه ایشین وار موراد؟!... کیشی، اوغلووا بیر سؤز دئیه­نمیسن؟!... تیک... تاک... آنا باخ، قویچاغیمین باشی چئچل اویدو... ماجرا باشلانیر. کیشی اوتاقدا ایش­لرینه باخدیغیندا، زامان دایانماییر. زامانین یئرینی هئچ زاد دولدورمایاجاق. قادین، الینی قالدیریر. مطبخ بیچاغی پاریلداییر. اوتاغین ایشیغی چوخالیر. هر شئی، زامانین دوستاغیندادیر... کیشی، چارپایادا ییرغالانیر. چارپایانین جیریلتیسی، قادینین سسییله قاریشیر. سیقار یاندیریر. سیقار توستوسو، قالین بیغ­لاری­ آراسیندان چیخیر. زامان، کاغیذلارا ساری یورویور...

"مین بیر اؤیکو" فئستیوالینین آنیتی

اؤیکوجوک 7.

بیر اؤیکوجوک

رضا کاظمی

سئوگیلی سعید موغانلی­ـیا؛

 

 تاكسيدان دوشدوكده، خيابانين او تايينا كئچمك‌ اوچون سول ساغينا هئچ باخمادي. باشيني آشاغي سالميش، اوره‌يينده‌جه دونن ائشيتدييي ماهني‌نين بير پاراسيني اوخويوردو. ماهني‌نين ايكينجي سطرينده، اول ساخلاج سسي، سونرا ايسه سوروجونون سسيني ائشيتدي. سوروجو كيمسه‌يه يامان يوز ياغديريردي...

خيابانين او تايينا يئتيشجك، بؤیوک دمیر قاپی­یا باخدي. یولداشییلا گؤروشه­جک زامانا، هله بیر ایکی ساعات قاليردي.

ـــــــــــــــــــــــــــــــــــــــــــــــــــــــــــــ

ساخلاج: ترمز/  سوروجو: شوفر، راننده

1001 اؤیکو

هو الجمیل

مین بیر اؤیکو فئستیوالی

 

اینترنت اوزره کئچیریله­جک "مین بیر اؤیکو" آدلی ادبی یاریشدا، هر بیر سیاسی باخیشدان اوزاق گزه­رک، یالنیز و یالنیز ادبیاتا دوشونمک مقصدینده­ییک. بو یولو، بوش ال ایله باشلاساق دا، سیزین دولغون یازی­لارینیزا گووَ­نمیشیک. 

"مین بیر اؤیکو" فئستیوالیندا، اؤیکولرین سئچیمینده هانسی سؤزون دئمه­سی نظرده آلینماییب، سؤزون نئجه دئمه­یی اوستون توتولاجاق­دیر. دیل عمومییتده و اؤیکو دیلی (زبان داستانی) اؤزللیکده، هر هانسی یازیچی­نین اثرینی اوخوماقدا اساس فاکت­لاردان بیری ساییلاجاق­دیر. دیل عمومییتده یعنی: اؤیکونون آذربایجان تورکجه­سینده یازیلماسی. دیلیمیزین قورولوشونا اویغون اولان یارادیلیجیق­لار، ان چوخ نؤمره­لری قازاناجاق­لار. بوردا، "یارادیلیجیق" سؤزونو دئدیییمیزده، چاغداش بیر اؤیکونون قایدالاری اساسیندا یازیلمیش اثرلردن دانیشماقداییق. الیمیزه چاتاجاق اثرلر ایچره­سینده، یالنیز، قرامئر باخیمیندان دوزگون­جه­ یازیلمیش یازی­لارا ده­یر وئریلمه­یه­جک­دیر؛ اونلارین چاغداش بیر اؤیکونون اؤزللیک­لرینی داشیدیق­لاری دا، کسکین­له نظرده آلیناجاق­دیر. 

اؤیکو دیلی دئدیییمیزده ایسه اؤیکونون قوللوغوندا اولان دیل مقصددیر. بوردا ادبی دیل دئییل، سؤیلم (روایت)ـین گره­ک­لرینی نظرده آلاراق، حتتا یوزه یوز ادبی دیل ایله ده اوست اوسته دوشمه­ین یازیچی­نین قونداردیغی دیلدن دانیشیریق. اؤیکو دیلی، سؤیلمین دوغما آلینماسیندا بیرینجی رولدا اویناییر.

ژوری هئیت: محمود مهدوی، آتیلا اسکندانی، رضا کاظمی

 

***

ـ "مین بیر اؤیکو" ادبی یاریشی، یالنیز، اؤیکو ساحه­سینده کئچیریله­جک­دیر.

ـ یازیچی هر بیر یاشدا اولورسا اولسون، بو ادبی یاریشا قاتیلماق اوچون سن محدودیتی قویولماییب­دیر.

ـ هر یازیچی ان چوخو ایکی اؤیکو گؤندَره بیلر.

ـ گؤنده­ریله­جک اؤیکولرین بیر یئرده چاپ اولوب اولماماسی اؤنملی دئییل.

ـ یازی­لارین Word  فایلیندا، Tahoma فونتوندا گؤنده­ریلمه­سی اؤنه­ریلیر.

ـ یازیچی­یا عایید اؤزل بیلگی­لر، او جومله­دن آد، سوی آدی، دوغوم ایلی، ایلگی قورماق اوچون تلفون (یوخسا موبایل) نؤمره­سی گره­کلی­دیر. یازیچی­نین قیسا ادبی بیوقرافی­سی بونلارا آرتیلیرسا، داها آرتیق یئرینه دوشر.

ـ اؤیکولر، آذر آیی­نین 10 ـجو گونونه قدَر [e-mail] آدرسینه گؤندَریلمه­لی­دیر. (بو مؤهلت، هئچ بیر شراییطده تمدید اولونمایاجاق­دیر.)

ـ سونوج­لار (نتیجه­لر)، بو ایلین قوربان بایرامیندا، آذر آیی­نین 19 ـجو گونونده Www.Oykuler.blogfa.com بللی اولوناجاق­دیر.

ـ فئستیوالا گؤندَریله­جک اؤیکولرین ایچیندن، ژوری هئیتین نظری ایله اوچ اوستون اؤیکو سئچیله­جک­دیر.

ـ بیرینجی یئری قازانمیش اؤیکونون یازارینا 120000 تومن، ایکینجی­سینه 100000 تومن، اوچونجوسونه ایسه 80000 تومن اؤدول وئریله­جک­دیر. بونلاردان علاوه، سئچیلمیش یازیچی­لارا بورونج تقدیر لؤوحو، بیر ده بیر پارا هنری اثرلر هدیه اولوناجاق­دیر. ­

اؤیکوجوک 6.

مین بیر گئجه: آتیلا اسکندانی (تبریز، 1354)، اؤیکوچو، شاعیر، عکاس.

***

انتیحار نه چتین­دیر!

آتیلا اسکندانی

ماشین ائله­ بیل اوچور. سورعتله قاباغا گئدیر. ویژیلتی سسی اوجالیر. اتوبان بورولور، دوزه­لیر. قوجا کیشی نفسینی ساخلاییب، گؤزلرینی قیسیب، یولا باخیر. داها یئیین، داها یئیین، داها یئیین. ماشینی داغا داشا چیرپیر، اتوبانین سینیرلارینا. دمیر دمیره توخونور. ماشین تیتره­ییر. بیر تله­سمک گؤرسه­نیر بو ماشیندا. سیقنال سسی، یئل سسی هر یانی بورویور. بو دؤنومدن سونرا، قوجا کیشی یئتیشیر اوچوروما. یئیین، یئیین، یئیین. سونرا، بیر گؤیرچین کیمی اوچوروما اوچور. ماللاقلانیر گؤیده، یئره دوشور. دمیر داش­لارا دَ­ییر، تورپاغا تاخیلیر، تورپاق اولور، اود اولور، قوجا کیشی پؤشله­نیر، پیشیر، یانیر، قورتاریر.

□□□

کامپیوترین اؤنوندن دورور. Game قورتاریر. آیری اویونلارا فیکیرلشیر. بلکه ده باشقا بیر انتحاری داداجاق صاباح. آمما هئچ Game، ماشین اویون­لاریجاق، ائولادی­نین اؤلومونو یادینا سالمیر.

بیزیم اؤیکو 15. (بو منم، اؤز قوجاغیمدا، شریف مردی)

مین بیر گئجه: اؤیکوجوک 5 ـدن علاوه، بیزیم اؤیکو 12 ـده شریف مردی­نین قلمی ایله تانیش اولوب­سونوز. آشاغیداکی متن، اونون لاپ یئنیجه یازدیغی اؤیکوسودور. بو یازی­نین "اؤیکو قورولوشو" هله قیراقدا قالسین، اونون "دیل قورولوشو"ـنا گؤره قلمداشیمیز شریف مردی­ـنی اورکدن تبریک ائدیرم. ایراندا، دیلیمیزجه دوزگون یازا بیلن یازیچی­لاریمیزین سایی آز اولماسا دا، چوخ دئییل. بو آجی گئرچه­یی نظرده آلاراق، بیر دوست کیمی، سایین شریف مردی­ـدن داها و داها چوخ یازماسینی دیله­ییرم...

آشاغیداکی اؤیکو، هم عرب الیفباسیندا، همی ده لاتین الیفباسیندا سیزین قارشینیزدادیر.

***

بو منم، اؤز قوجاغیمدا!

شریف مردی

تزجه کرپيجدن چيخميش اوچ قات بير تيکينتيده باساماق­لاري (پیلله­لری)ائنيرم. نه من وارام، نه سن. يئره ائنديیيمده، قارانليق بورويور هر ياني. بير قاپي ... سونرا ايسه او بيريسي... قاپالي قاپي­لار آرديجيل اولاراق، شاققاشاق آچيلير. قارانليق گولور اوزومه. گؤزوم دیکیلیر یئره.

اوزون سوره­لي باساماق­لار. ديش قيجيردير منه کرپيج­لردن باش چيخاران قورداق­لار. آغزي قوخويان قورداق­لارين ديش­لري تؤکولوب، منه گولوشورلر. باش­لاريندا ايسه بؤرک. يوخو بؤرکو! منه ساري باخيب باش توولاديقدا، بؤرک­لري­نين قنتوزو توولانير.

ايته­له­نيرم. آياق باسديقجا، قورداق­لار پيرت پيرت آياغيمين آلتيندا پارتلايير. گؤزلري ايسه سيچراييب ياپيشير قيچيما. ائنديکجه، بؤيويور قيچيما ياپيشان گؤزلر. پيرت ها پيرتين سسي ايسه اوجالير. ييخيليرام. يوخو باسير مني...   

فیطر بایرامینیز موبارک!

عکس: رضا کاظمی

فیطر بایرامی بوتون موسلمان­لارا، اؤزللیک­له بو وئبلاقین سایین گؤروجولرینه و اوخوجولارینا موبارک اولسون...