اؤیکوجوک 14.

 

بَستنی­چی اوغلان

رضا کاظمی

 

چَمنلييين اورتاسيندا دورموش قيز، توپو اونا ساري هئلَلتدي. اوغلان كؤينه‌يي قولويلا آلني­نين تَريني سيلدي. توپ دوز آياغي قاباغيندا دايانمیشدي. قيز گولدو. اوغلان ایسه آغاج كؤلگه‌سي‌ آلتيندا اَيله­شميش قيزين آتاسيیلا آناسينا باخدي. اونلارين باشي دانيشيغا قال ايدي.

دوندورما جعبه‌سيني چيينيندن آچيب یئره قويدو. سونرا، توپو قيزا طرف شوتله‌دي. قيز چيغيريب توپون داليیجا قاچدي. هؤرولموش ساچي‌نين اوجونا بير كَپنك باغلانميشدیر. اوغلان ايكي آغاج آراسيندا دایاندی. قيز الیيله توپو گؤتوروب اوغلانا ساري دؤندو.

گونش گؤیون اورتاسينا چیخاناجاق، اونلار بير بيریيله اويناديلار، آتيشديلار، گولوشدولر. قيز ترله‌ميش، اوغلان ترله‌ميش!

كيشييله قادين صندليدن قالخيب قيزي چاغيرديلار. توپ يئره دوشدو. نه قيز، و نه ده اوغلان اونا ساري قاچماديلار. قيز تريني سيله‌ سیله، اَييليب توپونو گؤیول­سوزجه گؤتوردو. آتاسييلا آناسي يولا دوشدو. قيز‌ گولومسه‌ييب، قاچا قاچا اونلارين آرخاسيیجا گئتدي.

اوغلانين بوغازي قوروموشدو. دوندورما جعبه‌سي‌نين يانينا كئچيب اونون قاپاغيني قالديردي. ايچينده‌كي دوندورمالارین هامیسی اَريميشدي.

 

ــــــــــــــــــــــــــــــــــ

دوندورما: بستنی

 

اؤیکوجوک 13.

 

اؤلمک

                                                                                        جومک کلسکی

رضا کاظمی

ایکی پولیس بیر آز سوواشیب کیشی­یه زیلَلندیلر.

ـ «دیری­دیر؟»

ـ «گؤزلری تَرپه­نیر.»

ـ «چوخ چکمز.»

ـ «یوخ.»

ایلدیریم پاریلتی­لاری اوزاق داغا چاخدی.

ـ «یازیق کیشی!»

ـ «نه­یه باخیر؟»

ـ «نه دئییم؟! یالنیز اؤزو بیلیر... »

بالاجا قیزی لئیلَک گئده­رک، سئوینجلی سئوینجلی، کیشی­نین قاباغیندان سوووشوب سون­سوز چیچک­لرینی یئره سَپه­له­دی.

ـــــــــــــــــــــــــــــــــ

. سوواشماق: مایل شدن (خم شدن)/

      . یاخین گله­جکده، دوخسان دوققوز اؤیکوجوکدن عیبارت اولان "بیر، ایکی، اوچ" آدلی اؤیکوجوک توپلوسو، بو قلمین ترجومه­سی ایله ایشیق اوزو گؤره­جکدیر. اوستده­کی اؤیکوجوک، آدی گلمیش کیتابین حیکایه­جیک­لریندن بیری­دیر.

 

اؤیکوجوک 12.

باشلانغيج

ديويد دو وس

چئویرنی: رضا کاظمی

 

تلفون يئنه زنگ چالدي. قادين گؤزلريني يوموب آه چكدي.

وجودونون بير پاراسي كيشي‌نين خيانت رؤياسيندا شريك اولماق ايسته‌ييردي. بارماغينداكي قيزيل اوزوگو يئرينده‌جه اويناديب ساعاتا باخدي. "باب" ساعات اون بيره قدَر ائوده اولمایاجاقدی. قادين ياواشجا دسته‌يي گؤتوردو.

ـ «يالنيز، بو بير دفعه‌ني! آمما هئچ واخت یئنه تکرار اولمایاجاق»،‌ كيشي‌يه دئدي.

 

ــــــــــــــــــــــــــــــــــــــــــــــــــــــــــــ

مین بیر گئجه: یاخین گله­جکده، دوخسان دوققوز اؤیکوجوکدن عیبارت اولان "بیر، ایکی، اوچ" آدلی اؤیکوجوک توپلوسو، بو قلمین ترجومه­سی ایله ایشیق اوزو گؤره­جکدیر. اوستده­کی اؤیکوجوک، آدی گلمیش کیتابین حیکایه­جیک­لریندن بیری­دیر.

 

اؤیکوجوک 11.

بیر اؤیکوجوک

رضا کاظمی

 

ـ «قاباغی سؤکوب­لر عمی... بو تایدان کئچ!»

سسیندن اون، اون­بئش یاشلی اوغلانا اوخشاییر. یئریمده­ دایانیب الیمی سسه ساری اوزادا اوزادا ـ «هانسی تایدان؟» دئیه سوروشورام.

قولومدان یاپیشیب منی ساغ طرفه یؤنه­لدیر. سونرا الینی بوراخیب ـ «ائله بورانی دوز گئت»، دئییر. 

ـ «ساغ اول بالا!» دئییب سؤزوم هله قورتارمامیش آیاغیمین آلتی بوشا کئچیر.

بیر ایکی متیرلیک قویویا دوشموشم ائله­بیل.

دیرسک­لریمین بیری گؤینه­ییر، الیمده­کی چلیک ده نم­هارا دوشوب­دور. بیر نئچه اوغلان اوشاغی­نین گولوش سس­لری قویویا دولور. 

 

اؤیکوجوک 10. (چئویری)

مین بیر گئجه: آمئریکالی "روبرتا آلن" یازیچیلیقدان باشقا بیلیم­یورددا اوستاد کیمی ایشله­ییر، دالبادال اینجه­صنعت (هنری) سرگی­لری قورور، ایدمان اؤیرتمنی کیمی ده چالیشیر. بو یازیچیدان یوز اللی­ اؤیکو آیری آیری درگی­لرده یاییلمیش، بعضیسی ایسه آلمان و ژاپون دیل­لرینه چئوریلمیش­دیر. اوندان ایکی اؤیکو توپلوسو (The Traveling, Certain People Women)، رومان قالبینده بیر اؤیکوجوک توپلوسو (The Daughter)، بیر یولچولوک یازیسی (سفرنامه، Amazon Dreams) چاپ اولموش­دور. اؤیکو ادبیاتیندان باشقا، اؤیکوجوک (Fast Fiction) یازماغا گؤره ده بیر کیتابی وار.

***

اویدورماچیلیق

روبرتا آلن

چئویرنی: رضا کاظمی

آتام کیمی قومارباز اری داغ­لارین آراسیندان لاپ سورعت­له سوردویو حالدا، اوگئی باجیم ماشینین قاباق صندلینده اَیله­شیب چیغیر باغیر سالیر. هاوا ترنینه مینمیشیک ائله­بیل. اوگئی باجیمین اری "لاس­­وگاس"ـا چاتیب آروادی­نین پول­لارینی کورلاماغا تله­سیر. اوغلویلا قیزی دال صندلده، ـ من اوتوردوغوم یئرده ـ بیر بیریندن برک برک یاپیشیب­لار. اوگئی باجیمین قیزی ـ مندن ده بؤیوک­دور هله! ـ قیشقیریر. بورنومو پنجره­یه دیره­ییرم. من قورخمورام.

اوگئی باجیمین اری قهقهه ووراراق، سورعتینی آزالتمامیش یوخسا سیقنال چالمامیش داغلیق یولون دؤنوم­لریندن دؤنور. هر بیر دؤنومو سوووشدوغوموزدا، اوگئی باجیم بیر سئری چیغیریب یاواش گئتسین دئیه ارینه یالواریر. او یالواردیقجا، اری داها وحشی­لر کیمی سورور. باجیم سسینی آتیر باشینا: ـ «هامیمیزی اؤلومه وئره­جک­سن!»

آنجاق سرخوش اری هئچ اونون سؤزلرینی ائشیتمیر. من ده قولاق آسمیرام. رؤیالاریمی قاتسین دئیه هئچ کسه ده ایجازه وئرمیرم: "ژان" آدلی بو فرانسالی اوغلانلا "نیویورک­"ـا قاییتمیشام. بیز "سنترال پارک"ـیندا، گؤلون اوزونده کورَک وورماقداییق. بیزه اولدوقجا خوش کئچیر.

 

ـــــــــــــــــــــــــــــــ

قایناق: Micro Fiction: an anthology of really short stories، خرده داستان­ها (بهترین داستان­های کوتاهِ کوتاه آمریکا)، انتخاب و ترجمه سارا و پژمان طهرانیان، نشر مان کتاب، 1387

اؤیکوجوک 9.

بیر اؤیکوجوک

گؤزلریم باخا باخا سس آلدادیب آپاریر منی!

شریف مردی

 

اوزون بیر دره­­ده یورویورم. باشماق­لاریم دولو سویلا. آیاق بارماق­لاریم اؤلوشگه­ییب قوخو قالخیر آیاق­لاریمدان تپه­مه قدَ­ر. دره اوزو یوخاری بورخولدوقدا، یالنیز قاباغیمی گؤرورم. اوزاق­لار قارانلیق. باش قالدیریب گؤیه ساری باخا بیلمیرم. دولور باشماغیما خیریم­خیردا داش­لار، قانادیر آیاغیمی. دوروب اونلاری  چیخاردا بیلمیرم. دور­سامسا، ایته­له­نیرم. یالنیز گئتمه­ییم گرَک. گئتدیکجه اوزاقلاشیر دره. هردن آنجاق اوزون بیر قامچی­یا بنزَر دره­لر، آیریلیب یوخاری بورخولوب هئچ اولور. اورالاردا هئچ نه­یی سئزه بیلمیرم. آیریلان بوداق­لاردان ایکی اوچ دره­نی کئچمیشم، ­هریان ایسه سوسقون. قایالار بره­لیر یان­لاردان. اوزاق­لاردا نه اولاجاغینی بیلمیرم. دورمادان یورویورم. آیاغیم زویگَش بیر داشین اوستوندن زویوب قوپور باشماغیمین آلت قابیغی. بودَ­ره­ییب ال­لریم اوسته ییخیلیرام. تاق سینیر بیله­ییم. دورسامسا، کلله­مین کاساسی پارتلایاجاق دئیه دوشونورم. آخ دئمه­دن سینیق بیله­ییمی کؤینه­ییمین دویمه­سی آراسیندا قوینوما باسیب ایره­لی سورونورم. گئتمه­ییم گرَک. بیر آن کلله­مین پارت داغیلماسینا دوشونورم. گولونج اولار. دوداغیم قاچیر... هارای قوپور. سس­لر اوزاق یاخین قایالاردان یانقیلانیب بیر بیرینه قوووشور. قاچماغا هئییم یوخ. باخا بیلمیرم اویان بویانا. داش­لارین قوپوب داغیلماسینی ائشیدیرم. اوجالاردان سینیب تؤکولور. دایانماغا باجاریغیم یوخ. داشا دایانسام، کلک اولماغیم جانلانیر اؤنومده. گئدیرم آنجاق. توخونماییر منه داش­لارین هئچ بیری. گولوش­لر کسیلیب، یالنیز، داش آخیمی­نین سسی گلیر. گئت­گئده یوخ اولور او دا، بیر توز قونمادان اوستومه. نفس چکیب راحاتلاشیرام. سینه­مده قالیر نفسیم. بیر دره آیریلیب یوخ اولور اؤنومده. پیچیلتی گلیر. باخا بیلمیرم. قابیغیم دارا دوروب. ـ "یوخ... یوخ!" سس منیم سسیم­دیر، اوشاقلیق سَسیم. بیری آلدادیر منی. ـ "گل... سن گل... اولار... سن..." باغیریرام وار گوجومله. بوغازیم شیشیب آچیلا قالیر آغزیم. سس چیخماییر بوغازیمدان. بره­له بره­له قالیر گؤزوم. اوزاتماق ایسته­دیییمده الیمی، یئکه بیر داش دالدان بوینوما توخونوب شیپ یئره دوشور جسدیم. باشیم گؤیده فیرلانیر... گؤزلریم باخا باخا سس آلدادیب آپاریر منی...

اؤیکوجوک 8.

مین دوققوز یوز...

سید حیدر بیات

 

حامامدان ائشییه چیخدی؛ ایچینده پارادوکسیکال بیر دویغو وار ایکن.

دوغرودان هاچاندان باشلاندی بو سئوگی؟ خاطیرلایا بیلمه­دی. حاماما دؤندو. کاغیذلاردا بیر شئی اوخونموردو. دفترلر، ایل­سایارلار ورق ورق سو اوزونده اوزوردو.

ایل­سایارین نایلون جیلدینده­کی رقم­لر هله پوزولمامیشدی: مین دوققوز یوز ...

 

اؤیکوجوک 7.

بیر اؤیکوجوک

رضا کاظمی

سئوگیلی سعید موغانلی­ـیا؛

 

 تاكسيدان دوشدوكده، خيابانين او تايينا كئچمك‌ اوچون سول ساغينا هئچ باخمادي. باشيني آشاغي سالميش، اوره‌يينده‌جه دونن ائشيتدييي ماهني‌نين بير پاراسيني اوخويوردو. ماهني‌نين ايكينجي سطرينده، اول ساخلاج سسي، سونرا ايسه سوروجونون سسيني ائشيتدي. سوروجو كيمسه‌يه يامان يوز ياغديريردي...

خيابانين او تايينا يئتيشجك، بؤیوک دمیر قاپی­یا باخدي. یولداشییلا گؤروشه­جک زامانا، هله بیر ایکی ساعات قاليردي.

ـــــــــــــــــــــــــــــــــــــــــــــــــــــــــــــ

ساخلاج: ترمز/  سوروجو: شوفر، راننده

اؤیکوجوک 6.

مین بیر گئجه: آتیلا اسکندانی (تبریز، 1354)، اؤیکوچو، شاعیر، عکاس.

***

انتیحار نه چتین­دیر!

آتیلا اسکندانی

ماشین ائله­ بیل اوچور. سورعتله قاباغا گئدیر. ویژیلتی سسی اوجالیر. اتوبان بورولور، دوزه­لیر. قوجا کیشی نفسینی ساخلاییب، گؤزلرینی قیسیب، یولا باخیر. داها یئیین، داها یئیین، داها یئیین. ماشینی داغا داشا چیرپیر، اتوبانین سینیرلارینا. دمیر دمیره توخونور. ماشین تیتره­ییر. بیر تله­سمک گؤرسه­نیر بو ماشیندا. سیقنال سسی، یئل سسی هر یانی بورویور. بو دؤنومدن سونرا، قوجا کیشی یئتیشیر اوچوروما. یئیین، یئیین، یئیین. سونرا، بیر گؤیرچین کیمی اوچوروما اوچور. ماللاقلانیر گؤیده، یئره دوشور. دمیر داش­لارا دَ­ییر، تورپاغا تاخیلیر، تورپاق اولور، اود اولور، قوجا کیشی پؤشله­نیر، پیشیر، یانیر، قورتاریر.

□□□

کامپیوترین اؤنوندن دورور. Game قورتاریر. آیری اویونلارا فیکیرلشیر. بلکه ده باشقا بیر انتحاری داداجاق صاباح. آمما هئچ Game، ماشین اویون­لاریجاق، ائولادی­نین اؤلومونو یادینا سالمیر.

اؤیکوجوک 5.

مین بیر گئجه: سایین "شریف مردی"­ ایله اینترنت اوزره تانیش اولموشام. اؤیکو ادبییاتی ایسه بیزیم اورتاق ماراغیمیزدیر. اونون ایجازه­سییله هله­لیک آشاغیداکی اؤیکوجویو "مین بیر گئجه" اوخوجولاری­نین قارشی­سینا قویورام. دئمه­لی، "بیزیم اؤیکو" آدلی سیرا حئکایه­لرین اون­ایکینجی اؤیکوسو، اونون قلمیندن اولاجاق­دیر. "حامد احمدی" دئمیشکن یاشاسین ادبیات، یاشاسین قارداشلیق!

***

ایگید بابا

شریف مردی

قولوندان یاپیشیب یئرینده اَیلشدیردیم. بؤرکونو ایسه الینه وئردیییمدن سونرا، اونو قویدو باشینا. سونرا، جیبیندن پاکئتی چیخاریب ایچیندن بیر سیقارئت گؤتوردو. دیلی­نین اوجویلا اونو باشدان باشا یالاییب تاخدی موشلویونه. الی اسه­­اسه موشلویو قالدیریب دوداق­لاری آراسیندا یئرلَشدیردی. دوداق­لاری آچیلار آچیلاماز، ـ "بالا او کیربیتی وئر منه" دئدی.

ـ "آتا! قوی من آلیشدیریم"، دئدیم.

او آنجاق، ـ "اؤلمه­میشه­م هله... دئدیم وئر منه" دئدی.

 کیبریتی وئردیم اونا. ایچیندن بیر چؤپ آراییب، چتین­لیک­له گؤتوردو. سونرا، سیقارینی آلیشدیرماغا چالیشدی. اولمادی کی، اولمادی. من دینمز سؤیله­مز اوتورموشدوم. باشینی قالدیریب منه باخدی. کیبریتی بوراخدی دؤشه­یی­نین اوستونه. بیر آجی گولومسه­مک دوداق­لاریندا چارپیندی. سونرا ایسه بیر سؤز دئمه­دن موشلویونو یئره قویوب یئنه اوزاندی.

اؤیکوجوک 4.

آلتي

رضا کاظمی

 اول ماشينين سسي باتدي، سونرا ايسه داياندي. من صوبحه ياخين ياتميشديم‌سا، يول آنجاق هله‌ ده قارانليقلا بورونموشدو. ماشينين يئنيدن ايشه سالا بيلمه‌ديييمي بيليرديم. شیشه‌ني آشاغا چَكه­رك، سس‌  ائشيتديم. ال‌ ساخلاييب دينله‌ديم. نئچه قورد بيرليكده اولاييرديلار. شیشه‌ني ياواش ياواش يوخاري چكديم. نسه ضربله شیشه‌يه چيرپيندي. شیشه‌نين آرخاسيندان يئره سريلميش قارا بير قورد گؤردوم. گؤز دولانديراراق، قوردلارين بير‌ بير قارانليقدان چيخما‌لاريني دويدوم. كيبريتي اليمه آليب بيريني آليشديرديم. اونلارين باشچيسي بورنونو شیشه‌يه ياخينلاديب گولدو. من تله‌سيك‌جه سيقار آليشديرديم. آت بويدا قوردون يوخوما گيردييي­نين يوزومو نظريمه ياخشي گلمه‌دي. قوردلار بير بيرلرییله پيچيلداشيرديلار. بؤيوك‌لري نئچه دؤنه ماشينين چئوره‌سينه دولاندي. ندنسه كافكانين «عرب و قورد» آدلي اؤيكوسو ياديما دوشدو. اؤيكوده پاسلانميش بير قايچي دا وار ايدي. يئنه كيبريت آليشديريب شیشه‌يه ساري توتدوم. قوردلار ماشينين دالينا توپلاشميشديلار. آه! اونلار ديش‌لرينی دميره باتیراراق، من ‌آيدينجا خيرچيلتي‌سيني ائشيديرديم. ماشين یانمامیش، اؤز اؤزونه یولا دوشدو. آياغيمي ساخلاجين اوستونه باسماق ايسته‌ديكده، بوشا كئچدي. ماشين دايانار دايانماز يئنه ده سس‌سيز سوروندو. گؤزومون قاباغينا بير شئي‌ين سيچراماغيني دويدوم. كافكا يوخ، بؤيوك قورد شیشه‌نين قاباغيندا شؤنگه‌ميش، قويروغونون اوجو ايسه بؤيرومده‌كي شیشه‌نين آرخاسيندا يئلله‌نيردي. اونون قوخوسو باشيمدايكن، گؤزلريمي باغلاديم و تانريدان يئددينجي يوخويا قاپيلماغيمي ايسته‌ديم.  

ــــــــــــــــــــــ

مین بیر گئجه: بو اؤیکوجوک، 1383 ـجو ایلین دي آييندا، يارپاق قزئتي­نین ايكينجي ساييندا چاپ اولموشدور.   

اؤیکوجوک 3.

بیر اؤیکوجوک

رضا کاظمی

 

دؤردونجو، بئشينجي و آلتينجي كيبريتيني آليشديرديقدا، يئل در جا اونو سؤندوروب عوعولدويا عوعولدويا اوزاقلاشميشدي كيشيدن. سوواقلي ديوارا سوواشمیش، يانماميش سيقارين كؤتويو ايسلانميشدي آغزيندا. يئنه آدديملادي كيشي، بيتمه‌دي ايشي. كوچه آغزينداكي ايلديريسكي‌نين ]ایشیق دیره­یی­نین[ يانيندا بير داها آياق ساخلاياراق، اليني اوووجلاييب يئنيدن كيبريتي چاخدي قوطوسونون قويوردونا. گيرمان يئلي ]اردبیلده یئرلی بیر یئلین آدی[ یئنه بارماق‌لاري آراسيندان كيبريت آلووونو پوفله‌ديکده، كيشي قاش­قاباقلا آدديملاييب ايره‌لي‌لدي. توز تورپاق قولاغي‌نين ايچينه دولوردو، يئل اونا گولوردو. كوچه‌نين ساققاخاناسي قاباغيندان سوووشدوقدا، دمير داراق‌لارين او تايينداکی ياريسيناجاق يانميش بير شمعه ساتاشدی گؤزو. كيشي دايانيب يئنه داماغينا آلدي سيقاري. دمير داراق‌لاردان ياپيشاراق، بورنونو ايچَري سوخدو. ديل‌آلتي اوچ صلوات چئويريب شمعين تيتره‌ك آلووويلا آليشديردي سيقاريني. 

 

اؤیکوجوک 2

يولچولار

رضا کاظمی

 

گنج اوغلان، ساعاتي بيله‌ييندن آچميش، اونونلا ایسه اويناييردي.

ـ «ساعات نئچه‌دير؟»،    سوروجو دئیه سوروشدو.

اوغلان ساعاتينا باخدي، ـ «اون ياريم.»   

دالدان اورتا ياشلي بير كيشي سسلندي: ـ «اينانميرام!» و الينی گؤزونون قاباغینا کیمی قالديردي. اطمينانلا دئدي: ـ «ساعات اون ايكيني كئچير بير ربع.»

اونون يانيندا اَيلشن آيري‌ بير كيشي ساعاتينا باخا باخا گولدو، ـ «نه دئييرسن آغا، ساعات دوز دؤردياريم‌دير.»       

اونون بؤيرونده‌كي قادين، مانتوسونون قولونو بير آز چكدي يوخاري، ـ «ولي منيم ساعاتيم ايكي قيرخ بئش دقيقه‌ني گؤسترير.»           

ماشين دؤنومدن سوووشوب اوتوبانا گيردي. سوروجو آياغيني پدالا باساركن، دونن فيكري‌نين يايغين اولدونونا گؤره ساعاتي‌نين ايتيرمه‌سيندن دئدي. د‌نده‌ني دَ‌ييشيب ماشيني داها يئيين سوردو، آنجاق فيكري‌نين نييه يايغين اولدوغونو هئچ سؤيله‌مه‌دي.

 

اؤیکوجوک 1.

بیر اؤیکوجوک

 

رضا کاظمی

 

قومپارا نئچه متير اويانليق پارتلادي. او قارني اوسته سرت‌جه‌سينه يئره سريليب باشيني ايسه ايكي الي آراسينا آلدي. يان‌يؤره‌سي دولويدو باروت و قان قوخوسويلا. بيردن بيره بورنو يارپيز اييسيندن دولدو. يئرينده‌جه قيميلدانيب گؤزلريني آچدي. داش‌تورپاغين ايچينده، دوز بورنونون قاباغيندا بالاجا بير يارپيز كولو بيتميشدي. ايچدييي يارپيز دملنميش‌لري يادينا دوشدو، بير ده قوجا آناسي…

يئنيدن دوروب قاباغا يورودوكده اونون گؤزلري دولموشدو.