بئش بارماق
محمود مهدوي
من آذربايجانلي بير ايشسيز، سيغورتاسيز
ـ دومان اردم ـ
بيز بئش يولداش هاميميز عالي تحصيل آلاندان سونرا، پايلاشديق اؤز آراميزدا بئش بارماغي، قمهني، بيچاغي، نانچكو و قاييرما توفنگي. ايشسيز اولدوغوموزا گؤره، خيابانلارا دوشوب بيرليكده قورخا قورخا گزيشدیك.
يولداشلاريميزين بيري دئييردي: تاكسييا مينجهيين ان ياخين مسيرده دوشون، مقصده چاتماسانیز دا اؤنملي دئييل، يولون قالانيني پياده گئدرسينيز. او بيري دئييردي يولدا گئده گئده يان يؤرهنيزي دؤردگؤز گؤزلمهليسينيز، هئچ بللي دئييل بيري قمهني كورهيينيزه تاخسين... سيز ایسه جان وئرهرک، او دا يازيسي اوخونمايان كارتيني گؤسترسین، باشينيزين اوستونده اَيلشيب دوداغيني ترپهده ترپهده اوزونوزه پيلهسین... سونرا اوتانمازجاسينا سيزله ساغوللاشسین دا. يا دا گئجهلر ائوه قاييتدیغیمیزدا، ديوار ديبييله گلن کیمسه بیزی اؤلدورهجك قصديیله گلیر دئیه دوشونوردوک، بونو ایسه سؤیلهییردیک بیر بیریمیزه دالبادال.
آژانلاری دا گؤرنده اونلارا ياخينلاشيب گولر اوزله دئييرديك: قفهخانالاردا قليان ييغيشاندان بري، بيز سيقاري دا قويموشوق يئره! تكجه چاي ايچيريك، او دا ايجازهنيزله ايلمانقيسیندان.
اونلاردان آيريلدیقدا، يئكه زيبيل قابيندا گيزلتديیيميز سيلاحلاري گؤتوروب يئنيدن سيلاحلانيرديق بیز. اونلاري ايشلتدييیمزده قراريميز بئله ايدي؛ بئشبارماغي بيزه هجوم ائدنلرين یالنیز قولويلا قارنينا، دوروموموز آنجاق پيرتلاشيق اولسايدي سينهسينه توخوندوراجایدیق اونو. بيچاقلا اوزدن گئتمه جيزيق سالاجايديق بيزه اَيري باخانلارين صيفتينه. قمهیه گلدیکده آمما، آژانلار قمهچيلری خيابانلاردا گزديرديكلرينه گؤره، باشا دوشموشدوك قمه چكمک اصلن بيزيم ايشيميز دئييل.
هميشه سيلاحلانجاق قورخوموزا بير آز دا آرتيردي. سيلاحلاري يئره قويان همن زاغ زاغ اسيرديك. تك باشينا دولاناندا دا آز قاليردي قورخودان اورهييميز آتيليب يئريندن چيخسين. قورخو دامارلاريميزا ايشلهدييینه گؤره، يوخولاريميزدا هميشه كؤلگهلر بيزي دؤورهلهييب قوووردولار. بيز ايسه سيلاحلارین ايشلتديیيني بيلمهدن اَلي يالين قاچيرديق قارانليقدا. آژانلارين اَللريندهكي قيرميزي چيراقلارين ايشيغي اوزوموزه دوشدوكده، كورَك كورهيه وئريب، اؤزوموزدن ایسه آسيلي اولماياراق ديشلريميزين بير بيرينه دَيمه چيق چيق سسينه قولاق آسيرديق. كؤلگهلر ده بيزي ايشيقديرك تئللريندن آسيب اؤزلريني قوجاغيميزا آتيرديلار. بيز ايسه خيريلدايا خيريلدايا دئييرديك: بيز آجي چايدان باشقا هئچ نه ايچمهميشيك، قفهدن سونرا بير يئر تانيميريق دا. او آندا قفهچي ايشيقديرك بويدا اوردا حاضير اولوب بوينوموزداكي ايپي ديشييله خينجيب دئییردی: لومولو چاييم حاضيردي، واختينيز اولسا بويورون! بيزسه هوسله يوخودان آتيليب يان يؤرهميزدهكي لومو ايييني ايزلهيرك قفهيه گئديردیك. قفهنين قاپيسينا وورولموش "معتادلارين بورا گلمهيي كسكين حالدا قاداغاندي" كاغيذيني گؤرجک ديكسينيب، او ياخینلیقداکی توالئته تپيليب گؤزوموزه عَمللي باشلي باخيرديق. گيزلَتديیيميز سيقار قوطولاريني دا توالئته تؤكوب سيلاحلاري پايلاشاندان سونرا، باشي اوجا قفهيه قايیديرديق. آنجاق بيزدن قاباق قورخونون اورا يئتيشمهيیني دويوردوق همیشه. قفهده پيتي يئيَنلر بيزه اَيري اَيري باخيب بير بيريیله قاش گؤزله دانيشيردلار. بيز ده جوذاميلر ساياغي قورخا قورخا چاييمیزی دا پيلهمهدن ايستي ايستي ايچيرديك. آغزيميز يانیرديسا دا سسيميزي ايچيميزده بوغوب جيبلريميزدهكي گيزلي سيلاحلاري سیغاللاییردیق. او گونلردن بري قفهدن ده آياغيميز كسيلدي یاواش یاواش. سونرالار آيري آیری، شهردن قيراق گؤروشوب سيلاحلاريميزلا آغاجلارين دريسينده اورك شكيليني چكيب آغلاييرديق. هرهميز بير بارماغيميزي بيچاقلا كسيب يانديرديغيميز كومهنين اودونا آتيرديق. قورخو ايسه اسينتييله قاريشيب بيزي دؤورهلهييردي. بيز كؤنوللو اولاراق بير بيريميزي يارالاييرديق. قانيميزي ايسه چكيرديك آغاجلاردا قازديغيميز اوركلرين اوستونه. هر يئريميزدن قان آخا آخا، قانلي سيلاحلار اليميزده ايكن شهره دوغرو يولا دوشوردوك. قورخو اسينتييله بوغوشوب اونو آغاجلار آراسيندا بنده چكرکن اؤزونو بيزه يئتيريردي همیشه.
بيز اونونلا آلتي نفر اولوردوق. mahmudmahdavi@gmail.com
ـــــــــــــــــــــــــــــــــــــــــــــــــــــــــــــــــــــ
"بیزیم اؤیکو" سیرا حئکایهلرین چوخو بیرینجی دؤنه اولاراق، مینبیر گئجه وئبلاقیندا یاییملانیر. اونلاردان هر بیر یئرده استیفاده ائتمک اوچون، قاباقجادان RizaKazimi@gmail.com طریقی ایله وب اوتاغینین یییهسیندن و یا اؤیکو یازیچیسینین ایمئیلی ایله اوندان ایجازه آلماق گرَکلیدیر./ ائدیت: مین بیر گئجه.