بیزیم اؤیکو 15. (بو منم، اؤز قوجاغیمدا، شریف مردی)

مین بیر گئجه: اؤیکوجوک 5 ـدن علاوه، بیزیم اؤیکو 12 ـده شریف مردی­نین قلمی ایله تانیش اولوب­سونوز. آشاغیداکی متن، اونون لاپ یئنیجه یازدیغی اؤیکوسودور. بو یازی­نین "اؤیکو قورولوشو" هله قیراقدا قالسین، اونون "دیل قورولوشو"ـنا گؤره قلمداشیمیز شریف مردی­ـنی اورکدن تبریک ائدیرم. ایراندا، دیلیمیزجه دوزگون یازا بیلن یازیچی­لاریمیزین سایی آز اولماسا دا، چوخ دئییل. بو آجی گئرچه­یی نظرده آلاراق، بیر دوست کیمی، سایین شریف مردی­ـدن داها و داها چوخ یازماسینی دیله­ییرم...

آشاغیداکی اؤیکو، هم عرب الیفباسیندا، همی ده لاتین الیفباسیندا سیزین قارشینیزدادیر.

***

بو منم، اؤز قوجاغیمدا!

شریف مردی

تزجه کرپيجدن چيخميش اوچ قات بير تيکينتيده باساماق­لاري ]پیلله­لری[ ائنيرم. نه من وارام، نه سن. يئره ائنديیيمده، قارانليق بورويور هر ياني. بير قاپي ... سونرا ايسه او بيريسي... قاپالي قاپي­لار آرديجيل اولاراق، شاققاشاق آچيلير. قارانليق گولور اوزومه. گؤزوم دیکیلیر یئره.

اوزون سوره­لي باساماق­لار. ديش قيجيردير منه کرپيج­لردن باش چيخاران قورداق­لار. آغزي قوخويان قورداق­لارين ديش­لري تؤکولوب، منه گولوشورلر. باش­لاريندا ايسه بؤرک. يوخو بؤرکو! منه ساري باخيب باش توولاديقدا، بؤرک­لري­نين قنتوزو توولانير.

ايته­له­نيرم. آياق باسديقجا، قورداق­لار پيرت پيرت آياغيمين آلتيندا پارتلايير. گؤزلري ايسه سيچراييب ياپيشير قيچيما. ائنديکجه، بؤيويور قيچيما ياپيشان گؤزلر. پيرت ها پيرتين سسي ايسه اوجالير. ييخيليرام. يوخو باسير مني... 

اوجادان سوزولن سو، اوچوشان قوش­لارين سسينه قوووشوب اويادير مني. باشيم بيري­نين ديزي اوستونده­دير. سيغاللانير. گؤزومو آچديقدا، اؤزومو گؤرورم. نه گؤزل! ساچ­لاريم اوزون آلنيملا گؤزومو باسيب. يئلَلنديکجه توک­لريم، گؤروکور گؤزلريم. گولومسه­ديیيمده، آغ اينجي ديش­لريم گؤز قيرپيميندا گؤروکوب دوداق­لاريمين آرخاسيندا يوخ اولور... گوموشه بَنزر بوينوم و... بو... منم اؤز قوجاغيمدا!...  

دوروب قوجاقلاشير، اؤپوشور، سيخيشيريک بير بيريميزه... يوخ!... اونلار اؤپوشوب، گولوشور، قوجاقلاشيب­لار! 

اؤنجه گؤردويوم او گؤزل "من"، ایندی بير آيريسيني قوجاقلاييب اؤپور! نه کيفيردي! اوز گؤزوندن ايیرنج سو آخير. اونلار آيريلديقدا، گؤرورم اونو... اؤزومم. ديش­لريم تؤکولموش، قاشيم يوخ! توک­لريم ايسه پيسليک توتموش آدام­لارا بنزَر. نه ايسه اؤزومم و دادلي... قوجاقلاييب باغريما باسيرام اونو... اؤزومو. 

 

 Bu mənəm, öz qucağımda!

Şərif Mərdi

 

Təzəcə kərpicdən çıxmış üç qat bir tikintidə basamaqları enirəm. Nə   mən varam nə sən. Yerə endiyimdə qaranlıq bürüyür hər yanı. Bir qapı ... sonra isə obirisi ... Şaqqa şaq ardıcıl qapalı qapılar açılır. Qaranlıq gülür üzümə. Gözüm dıkılır yerə.

Uzun sürəli basamaqlar. Diş qıcırdır mənə kərpiclərdən baş çixaran qurdaqlar. Ağzı qoxuyan qurdaqların dişləri tökülüb, mənə gülüşürlər. Başlarında isə börk. Yuxu börkü! Mənə sarı baxıb baş tovladıqda börklərinin qəntozu tovlanır. İtələnirəm. Ayaq basdıqca qurdaqlar pırt pırt ayağımın altında partlayır. Gözləri isə sıçrayıb yapışır qıçıma. Yalnız gözlərin ağı ödəyir məni qaranlıqda. Endikcə böyüyür qıçıma yapışan gözlər. Pırta pırtın səsi isə ucalır. Yıxılıram. Yuxu basır məni...

Ucadan süzülən su, uçuşan quşların səsinə qovuşub oyadır məni. Başım bırının dızı üstündədir. Sığallanır. Gözümü açdıqda özümü görürəm. Nə gözəl! Saçlarım uzun alnımla gözümü basıb. Yelləndikcə tüklərim, görükür gözlərim. Gülümsədiyimdə ağ inci dişlərim göz qırpımında görüküb dodaqlarımın arxasında yox olur... gümüşə bəmzər boynum və ... bu ... mənəm öz qucağımda!

Durub qucaqlaşır, öpüşür, sıxışırık birbirimizə .... YOX! ....onlar öpüşüb, gülüşür, qucaqlaşıblar!

Öncə gördüyüm o gözəl "mən", indi bir ayrısını qucaqlayıb öpür! Nə kifirdi! Üz gözündən irənc su axır. Onlar ayrıldıqda görürəm onu... ÖZÜMƏM. Dişlərim tökülmüş, qaşım yox! Tüklərim isə pıslık tütmüş adamlara bənzər. Nə isə özüməm və dadlı... Qucaqlayıb bağrıma basıram onu...ÖZÜMÜ.