مین بیر گئجه: حامد احمدی (تبریز، ۱۳۶۴). تهران عللامه بیلیم­یوردونون بیرلیک آدلی اؤیرنجی درگیسی­نین باش­یازاری­دیر. بوندان داها اؤنَملیسی، ذاتن اؤیکوچودور!

***

منی قالدیرین لوطفن!

حامد احمدی

 

 

گئجه ایدی، قاچیردیم. یاغیش یاغیردی. هارا گئتدیییمی دوشونموردوم. بیر آندا ییخیلدیم. قاچیردیم، قاچماغیمین سببینی سوروشما. هر یئریم سو اولدو. قیزیشدیم. اوچماق حیسسیم وار ایدی، نه اوچون ییخیلدیغیمی بیلمیرم. سانکی اؤلو بیر زاد ایدیم. یاغیش یاغیردی اوستومه. الیمین دریسی سویولموش، شالواریم ایسه جیریلمیشدی. اؤلموشدوممو یوخسا اؤلمکده ایدیم؟ آغرینی حیس ائتمیردیم آخی.

ـ "او نییه اوزانیب یئره؟"، کوچه­دن سوووشان بیری یولداشیندان سوروشدو. اونلارین چتیرلری وار ایدی، قاچمیردیلار دا. گلدیلر باشیم اوسته ـ "گؤره­سن اؤلوب؟" دئیه  او بیری سوروشدو.

یوخ دیری­یم. منی قالدیرین لوطفن...

ـ "بلکه ماشین ووروب... یاخشیسی بودور دایانمایاق."

 

یوخ ماشین زاد منه وورماییب، اؤزوم ییخیلمیشام. منی قالدیرین لوطفن.

ـ "گل گئدَک" دئدیک­لرینده، قوجا بیر کیشی اورا چاتدی. ـ "نه اولوب آی قارداش؟ نییه ییخیلیب؟"

آه... نییه­سینی سوروشما، قاچیردیم آنجاق.

ـ "بیزده بیلمیریک! گلیب گؤردوک بئله دوشوب"، بو بیری دئدی.

قوجا کیشی یاواشجادان ـ "اؤلوب؟" دئیه سوروشدو. او بیری اَییلیب نفس چکمه­ییمی دویدوغوندا، ـ "دیریدی" دئدی، ـ "آی قارداش نه اولوب سنه؟ دانیش گؤرک!"

ییخیلمیشام، قاچیردیم. یاغیش دا ایندیکی کیمی یاغیردی. ندن ییخیلماغیمی سوروشما.

دانیشیردیمسا، سسیمی ائشیتمیردیلر آنجاق. او آندا، بیر قیزلا اوغلان گلدیلر باشیمین اوستونه. ـ "نه اولوب؟ اؤلوب؟ کیم ووروب؟" اوغلان تئز تئز سوروشدو.

ـ "بیز ده بیلمیریک... ائله گؤردوک ییخیلیب. آمما دیری­دیر. نفس چکیر."

ـ "گرک اورژانسا زنگ آچاق..."، قوجا کیشی دئییب اونلارین اوزونه باخدی.

او بیریسی ـ "یوخ"، دئدی، ـ"پولیس چاغیرمالیییق. اورژانس گلیب سالار بیزیم باشیمیزا..."

اوغلان ایسه موبایلینی جیبیندن چیخاریب ـ "بئله ایش­لره آتش­نشانی یئتیشر"، دئدی.

یوخ آغالار! فقط منی قالدیرین لوطفن...

بو دورومدا، بیر آیریسی گلیب اؤزونو دوکتور آدلاندیردیقدان سونرا، ـ "اؤلوب؟" دئیه سوروشدو.

ـ "یوخ"، دئدیلر، ـ "نفس چکیر!"

دوکتور اَییلیب موبایلی­نین ایشیغینی گؤزومه سالدی، ـ "هه دیریدی..."، دئدی، ـ "آی قارداش نه­ییندی؟ هاران آغریییر؟ نییه ییخیلمیسان؟..."

سن بیل آللاهینیز نییه ییخیلماغیمی سورمایین، منی قالدیرین لوطفن...

اوغلان دوکتوره اوز توتوب ـ "دوکتور! دئییرم قالدیراق اونو. بلکه دورانمیر..."، دئدی.

هن هن، دئدیم، منی قالدیرین لوطفن...

دوکتور تله­سیک ـ "یوخ، بلکه بیر یئری سینیب­. اصلن ال دیمه­مه­لیییق اونا، فلج اولماق احتیمالی وار"، دئدی.

سونرا موبایل­لارینی چیخاریب بیری اورژانسا، بیری پولیسه، او بیری ایسه آتش­نشانی­یه زنگ آچدی.

گئت­گئده آدام­لارین سایی چوخالیردی. یاغیش ائله بایاقکی کیمی یاغیردی، آنجاق بویلانیب منه باخان آدام­لارین چوخ اولدوغونا گؤره، دامجی­لار داها اوستومو ایسلاتمیردی.

آژیر سسی گلدی. بیلمه­دیم اورژانس ایدی، یوخسا پولیس، یوخسا آتش­نشانی. ـ "چکیلین اویانا"، دئییب، باشیم اوسته گلدیلر، ـ "نه اولوب؟!"

هامی بیرلیکده ـ "بیلمیریک! ییخیلیب یئره دورانمیر"، دئدیلر.

قیرمیزی بؤرکلو آتش­نشانی ایشچیسی اَییلیب اوزومه باخدی.

منی قالدیرین لوطفن، دئدیم...

ـ "بو بیزیم ایشیمیز دئییل. اورژانسی چاغیرین"، دئییب آژیرلرینی ایشه سالاراق، اوردان چیخیب گئتدیلر.

دالیسی اورژانس آدام­لاری گلدی. ـ "چکیلین اویانا! قویون هاوا دَیسین اونا"، دئییب منه باخدیلار.

ـ "نه اولوب؟" دئیه سوروشدولار.

ـ "بیلمیریک!"، دئدیلر.

منی قالدیرین لوطفن...

دئدیلر پولیس گلمه­یینجه اونا ال دَیَنمه­ریک.

پولیس­لر گلیب ـ "نه اولوب؟"، دئیه سوروشدولار.

سیزی آللاهینیز منی قالدیرین لوطفن...

کوروکی چکدیکدن سونرا، اورژانسچی­لارا منه ال وورماق ایذنی وئردیلر.

اوزو قویلو ییخیلمیشدیم، قاچا قاچا، یاغیش...

هر یئریمی ماینا ائله­دیلر. قالدیرماق ایسته­دیلر منی، قالدیرانمادیلار.

ـ "یاپیشیب یئره"، دئدیلر. هره گلیب منی قالدیرماق اوچون بیر دؤنه اؤزونو سینادی.

قالدیریلمیردیم. یاپیشمیشدیم یئره.

آغلاییردیم یوخسا یاغیش دامجی­لاری ایدی بو؟

پولیس­لر مسئله­نین امنیتی اولدوغونو بیلدیریب هامینی داغیتدیلار. هامی منه باخاباخا گئری چکیلدیلر. سونرا بی­سیم ووروب یوخاریدان مسئله­نین امنیتی اولدوغونا گؤره، یاردیم ایسته­دیلر.

هلی­کوپترین سسینی ائشیتدیم. بؤیوک ماشین­لار، صیفر سربازلار، بیر ده یان­یؤره­مه سیم­خاردار چکمک­لری­­نین سسینی. جیب­لریمی آختاردیلار. کیملیییمی قارا بیر لیسته یازدیلار. بی­سیم­لری­نین سسی قولاغیما ایشله­ییردی...

سنی ایناندیغینیز منی قالدیرین، لوطفن.

آدیمی بیلگی­سایارا وئردیلر، شکیلیمی چکدیلر، اوردا ییخیلدیغیم یول­لارین باغلانماسینی تکلیف ائتدیلر. یاغیش کسیردی دئیه­سن. آلاتورانلیق اولوردو هاوا. گلیب گئدیب رنگ به رنگ سورغولار سوروشدولار.

منی قالدیرین لوطفن...

گون چیخجاق، ژورنالیست­لر ده گلدیلر. مندن دالبادال شکیل چکدیلر، سورغو سوروشدولار، پولیس­لر ایسه جاواب وئرمه­دن اونلاری قوودولار. آدیم قزئت­لره گئتدی، شکیلیم ده. پولیس­لر بئزیکمیشدیلر. صیفر سربازلاری منی قوروماق اوچون حیصارین دؤوره­سینه کئشیک قویموشدولار.

منی قالدیرماق اوچون جرثقیل گتیردیلر. ـ "باغلادیق، چَک!"

چکیلمه­دیم یوخسا چکیلَنمه­دیم؟

قالدیرین منی لوطفن دئییب قیشقیردیم.

ائشیتمه­دیلر یوخسا ائشیدنمه­دیلر؟

دونیانین باشا باشیندان منی گؤرمک اوچون گلدیلر، پولیس­لر ایسه اؤزلرینی توریست­لرین اؤنونده یاخشی آپارمالییدیلار.

توریست­لر منه یاخینلاشیب سایغییلا؛

-          ces`t que se?

-          what`s the matter of you?

-          ماذا بک؟

-          efendim sana ne olub?

-          چی شده؟

-          و...

دئیه سوروشدولار. من ایسه منی قالدیرین لوطفن! دئدیم.

گون­لر کئچدی، آی­لار کئچدی. دؤولت پولیس­لرله چکیش­برکیشدن سونرا، منه گؤرمه­لی بیر آبیده کیمی صاحیب چیخیب اطرافیما شیشه­دن دیوار چکدیردی. جاماعات منی گؤرمک اوچون، الینی جیبینه سالمالی ایدی.

داها نه یاغیش اوستومه یاغیردی، نه قار.

نه گون شاخیردی اوستومه، نه آی.

شیشه­نین ایچی همیشه هالوژن­لرله ایشیق ایدی. داها یاتا بیلمه­دیم. نییه قاچدیغیمی، کئچه­جه­یی ده اونوتموشدوم. یادیما بیر زادلار گلیردی، آمما اونلاری بیر بیرینه دویونله­یه بیلمیردیم. تیکه­لری ایتمیش بیر پازئل ایدیم سانکی. شعر یازاردیم، ـ بوراسی یادیمدا ـ ، شعرلریمه گؤره منی آختاریردیلار. هر گون بیر شهرده، بیر اؤلکه­ده یاشاییردیم. منی شعرلریمه گؤره آختاریردیلارمی؟...

آی­لاردان سونرا، بیر گون پولیس­لر آژیر چکه­رک گلدیلر اوزاندیغیم یئره. یاخیندان منه باخیب بیر شکیلله منی توتوشدوردولار. شیشه­نین دالیندان ـ "اؤزودو!"، دئدیلر. شیشه­نی سیندیرماق ایسته­دیلر. او آندا قالدیریلدیم، گئتدیم لاپ گؤی­لره. هامی مات قالیب حیرتله منه باخدی. اوشاق­لار ال­لرییله منی بؤیوک­لره گؤستردی. من آنجاق گئتدیم ها گئتدیم. اوچماغیمی حتمن صاباح یازاجاق ایدیلار قزئت­لرده...

بولودلاردان آشدیم، اوزون لایه­سینی کئچدیم، بوش بیر یئره چاتدیم. قانادلی بیر نئچه نفر گلیب یاخیندان منه باخیب قیافه­می بیر شکیلله توتوشدوردولار.

ـ "اؤزودو!"، دئدیلر. آپاردیلار منی، آپاردیلار...

من یالنیز، قاچیردیم. هارا قاچدیغیمی دوشونموردوم، قاچماغیمین سببینی سوروشما...