مین بیر گئجه:

ـ سون گون­لرده، نهایت "یاشماق سایبر درگیسی" ده یاییملاندی. بو درگی­نین بوتون امکداش­لارینا داها بؤیوک اوغورلار آرزوسویلا، ـ بو سایتین آچیلیشینا گؤره ـ بیر اوخوجو کیمی ایلک اؤنجه اؤزومه، سونرا ایسه هر هانسی ادبیات­سئور اوخوجویا گؤزلَریمیز آیدین دئییرم. سایین یازیچی "حامد احمدی"ـ­نین ادبی باش­یازارچیلیغییلا بوراخیلان بو الکترونیک درگینی اوخوماق اوچون، بو آدرسی تیکله­یه بیلَرسینیز:  http://www.yashmaq.com/

ـ "اؤیکوجوک ۱۴" باشلیغی آلتیندا یاییملانمیش "بستنی­چی اوغلان" حیکایه­جییینی یاییملادیغیمدان سونرا، کامئنت­لر بؤلومونده چوخ دَیرلی باخیش­لارلا اوز اوزه گلدیم. گؤستریش­لرینی اَسیرگه­مه­دیک­لرینه گؤره، بوتون سئوگیلی یازیچی ـ اوخوجولارا اؤز سایغی­لاریمی بیلدیره­رک، سایین­لار "نادر ازهری" و "ایلقار مؤذن­زاده"ـ­نین اؤتَری باخیش­لارییلا بیرگه، اؤیکوجوک­له باغلی یازدیغیم بیر یازینی دا بیرلیکده بوردان اوخویوروق: 

***

نادر ازهری: بوتون اؤنم، دوندورمانین اَریمه­یینده­دیر البتته. دوندورمالارین اَریمه­یی، قونونو تام بَسیط­لیغی ایله دراماتیک دوروما سوخور، او دا ایکی دوزئیده: بیریسی رئال دوزئیده، یعنی دوندورما ساتان اوغلانین اولان­قالان آزاجیق یاتیریمی ایتیب باتیر و اوندان اؤنَملیسی سانکی دوندورمالارین اَریمه­یی رئال حیاتین اَسکیک و آجیماسیز قورال­لاری­نین صاف و رومانتیک ایلیشگی­لر قارشیسیندا اؤز دایانیشما و دوزه­نی­نین ایتیرمه­سینی قانیتلاییر. دئمک، بو اؤیکوجوک دوندورمانی دوغال فورمادا، بیر سیمبولا دا چئویریر. بورادا، اؤیکوجویوموزون صینیف­سال قونویا دا سورتوشمه­یینی آنیمسامالی­ییق. باشقا یؤندن، اوخوجونون آرتیق­تاماهلیغی جاواب­سیز دا قالا بیلیر. اؤیکوجوکده قیزین دورومو سونونا قدَر ایضاح اولونور و سونا چاتیر؛ آمما گرَکلی اولمایاراق، کئشکی اونون دویغوسوندا دا، بیر دراماتیک اولایی یاشاردیق. آنجاق بو ایش گوج­سوز فورمادا حیاتا کئچیرسه، اؤیکوجویون بوتونونو محو ائده بیلیر. سون اولاراق، بو اؤیکوجویون قونوسو اینسان­لارین ایلیشگیسی اوزره و جیفت قارشیلیق دوروموندا یازیلمیشدیر.

ـــــــــــــــــــــــــــــــــ

اؤنم: اهمیت/ قونو: مؤوضوع/ دوروم: موقعیت/ دوزئی: سَویه، ساحه/ یاتیریم: سرمایه/ قورال: قاعیده/ ایلیشگی: رابیطه/ قانیتلاماق: آنلاتدیرماق، بیر نؤوع خاطیرلاتماق، باشا سالماق/ دوغال: طبیعی/ جیفت قارشیلیق: تقابل دوگانه/

 

ایلقار مؤذن­زاده: هر اؤیکوده (حئکایه­ده) بو کؤکسل اصلییته دیققت ائتمه‌ییمیز گرَ‌کلی­دیر:
یازیچی اؤز بللی مقصود و آماجینی یئتیرمکده، نه قدَر اوغور قازانیب؟
اؤیکو بونو دئمک ایسته‌ییر: یوخسول بیر بستنی (دوندورما) ‌ساتان اوغلان، سئوگی و سئویب‌ سئویلمَک دویغولارینی نئچه آن­لار اله گتیرمک اوچون، ("ازهری" جیناب­لاری ‌دا‌ قئید ائتدییی کیمی،) بوتون یاتیریمینی ‌دا الدن وئرمه‌یه حاضیر اولور و یا یوخسول بیر اوشاق، قیسیق بیر زاماندا دا اولموش اولسا، شَن آن­لاری یاشاماغا، آغیر هزینه‌لر اؤده‌ییر.
بو اثری گؤزه‌للَندیرن‌، اؤیکوجویون سونوندا بستنی‌لرین اَریمه‌یی­دیر. بوردا، بستنی‌نین اَریمه‌ییندن چوخلو یوزوم‌لار ائتمک اولار. یوخسوللوقدا یاشایان بیر اوشاق نه قدَر پول قازانسا دا، سئوگی و اَیلنجه نیازلارینی آرادان قالدیرماغا، بوتون وارلیغیندان واز کئچمه‌لی­دیر و یا بستنی‌لری اَریدن گونش دئییل، قیز ـ اوغلان آراسیندا یارانان سئوگی‌نین حرارتی­دیر! و ...

"رضا کاظمی" بوردا فقر و یوخسوللوق ژانرینا باشقا آچیدان باخماقلا و یوخسوللوغون ایچینده سئویملی بیر سئوگی یاراتماقلا، فورم باخیمیندان، گؤزَ‌ل بیر اثر یاراتماقدا اوغور قازانیب­دیر.
"بولود مرادی" جیناب‌لاری­نین دئدییی‌نین تَرسینه اولاراق، دئمک ایسته‌ییرَ‌م، بیر ـ ایکی اؤزه‌للییی نظرده آلماساق، بو یازی مینیمالیسم سَبکینده‌دیر و چوخلو چئشیدلی چَرچیوه‌لر ایچیندن، "مینیمال فیکشن" (یالنیز "مینیمال" دئمک یالنیش­دیر) و یا "fast fiction" قالیبینه یاخین‌دیر. بو نَدن‌لره گؤره، من بو یازینی مینی‌مال سَبکینده یازیلمیش بیر اثر آدلاندیریرام:
a- ساده و سرراست بیر طرحی وار.

b- مضمون و ایچَریک بوروشدورولماییب و ایچ ـ ایچه دئییل.

c- اصلی باخیش، بیر اولایین اوستونده‌دیر و بیر بؤیوک رویداد باش وئرمیر.

d- رویداد قیسا بیر زامان و مکاندا باش وئریر.

e- مکان دَییشیلمه‌سی یوخدور.

f- ناغیل یاشامدان کَسیلمیش بیر پارچانی ایفا ائتمکده‌دیر.

g- مینیمال ناغیل­لارد ]اؤیکوجوک­لرده[ طرحین کانونو بیر شخصیت یا بیر اؤزَ‌ل اولای­دیر (بستنیچی اوغلان و توپ اویناماق) و یازیچی دوغال اولاراق، شخصیته پرداخت ائله‌میر و اوشاغین یاشامیندان یالنیز بیر اؤزَ‌ل لحظه‌نی ائکرانا قویور.

آمما آخساقلیق (البته منجه!) باخیمیندان بیر نئچه نکته‌نی آرتیرمالییام:

1- بو قالیب‌لرده، یازی­لارین سونو چوخ اؤنملی‌دیر و سوندا یازیچی اوخوجونو دیسکیندیره بیلیرسه، دئمک داها چوخ اوغور قازانیر، آمما بوردا ناغیلین سونو اوخوجونو چوخ ماراقلاندیرمیر.

2- بو سایاق یازی­لاردا یازیچی عاددی بیر اولایی غیر عاددی بیر اولایا چئویریب، یئنی تجروبه‌لر اورتایا گتیرمه‌لی و اوخوجونون دوشونجه، دویغو و فیکیرینی آلیشدیرمالی­دیر. آمما بوردا عاددی بیر اولای غیرعاددی بیر اولایا چئویرلمیر.

3- اوخوجو ایلک باشلانیشدان سطیرلرین سونونا قدَر، صبیرسیزلیک­له ناغیلین سونون گؤزله‌میر، یعنی ناغیلین دراماتیک گئدیشینده و یارانان چکیش­بکیشینده، اوخوجویا یئتَرینجه اشتیاق یارانماییب و باش وئرمیش اولای اوخوجونو راضی ائتمیر (قیزین او سایاقدا چیخیب گئتمه‌یی کیلیشه‌دیر). اوخوجو سونونا چاتماغا هیجانلا تلَسمیر و ناغیلین فضاسیندا اوخوجو بیر بولماجانی چؤزوب سئوینَن بیریسی کیمی اولمور.

ـــــــــــــــــــــــــــــــــ

آماج: هدف، مقصد/ اوغور: موفقیت/ اَیلنجه: تفریح/ نَدن: سبب، عیللت/ اولای: حادیثه/

                        

رضا کاظمی:  Flash fiction  آنلامیندا ایشله­نن "اؤیکوجوک"، "اؤیکو" دئییلسه ده، اونون تعریفینده آنجاق اؤیکو سؤزجویوندن یارارلانماق مجبورییتینده قالیریق! اؤیکوجوک بیر صحیفه، نئچه سطیر و یا حتتا نئچه سؤزجوکدن عیبارت اولان لاپ قیسا اؤیکویه دئییلیر. ]سون ایل­لرده، بعضی یازیچی­لاریمیزین طرفیندن، او جومله­دن سایین مرتضا مجدفر، سایین حمید آرغیش، سایین ایواز طاها و باشقالاری طرفیندن اؤیکوجوک سؤزجویو عوضینه "بایاتی کیمی حئکایه"، "کیبریتی حئکایه"، "کیبریت­لیک حئکایه"، "ان قیسا حئکایه"، "حئکایه­جیک­"، "حیکایه­جیک" و بئله کیمی سؤزلر ده ایشله­نمیش­دیر.[ اؤیکوجوک یازماقدا، ایجاز صنعتینی باجارماق چوخ اؤنملی ساییلیر؛ آمما قیساجا یازیلمیش هر اؤیکویه (حتتا مینی­مالیست اؤیکولره) اؤیکوجوک دئمک اولمور. ایلک باخیشداکی اوز اوخشارلیق­لارینا باخمایاراق، اؤیکوجوک­له "قورغو" (Plot، طرح) ایکی باشقالانان قونولاردیر. قورغویا دورغون دورومون توصیفی دئدیییمزده، اؤیکوجوکده (و اؤیکوده) بو دورغون دورومون آخیب روایت اولدوغونو گؤروروک...