بیزیم اؤیکو 41. (سیچان، مهدی نظری)
مین بیر گئجه: مهدی نظری (اردبیل، ۱۳۶۰). سوسیولوژی لیسانسلیدیر. اردبیلین گنج سینما درنهیینه (انجمن سینمای جوانانینا) اؤیه اولاراق، کارگردانلیق مقامیندا «ساندویچ» و «قاب خالی» آدلی ایکی تجروبی قیسا فیلم ایشلهییبدیر. قاباقلار، تئاتر صحنهسینه ده چیخارمیش. هر دن ده سناریو یازار. ایندییه کیمی، سناریولارینا گؤره بیر نئچه فئستیوالدان اؤدوللر قازانیبدیر. آزدان چوخدان، تنقید یازماقدا دا اَلی وار. لاپ یئنی ایشلریندن دئسک، «وحید علیرضایی» باشدا اولاراق، او بیری امکداشلارلا بیرگه «فرهنگ فیلمفارسی» آدیندا جامع بیر کیتابین حاضیرلانماغیندا اشتیراکی وار. «سیچان» باشلیقلی اؤیکو، اونون یازدیغی ایلک حیکایهسیدیر.
***
سیچان
مهدی نظری
قیز قاپییا زیللَنمیشدی. الیندهکی تیکهنی کاسایا قایتاریب، گؤزونو قاپیدان گؤتورمهدن یاواشجا دالا اوتوردو. دوواردان دؤنه دؤنه "تیریپ تیریپ" سسی گلدی. قیزین ـ «وای آنا!» جینگیلتیسی ایله کیشی دیکسینیب، آغزینداکی لوقمادان بوغازینا سیچرادی. آرواد اونون کورهیینی یوموروقلایاندا، او تایدان دا، اَلینی اوزادیب تلهسیکجه پارچدان سو گؤتورمک ایستهین اوغلان، سویون یاریسینی دا جالادی سوفرایا. آرواد بیر اَلییله لیوانی کیشینین قاباغینا توتوب، او بیری اَلییله ایسه اونون کورَیینی یوموروقلا یوموروقلایا، اوزونو قیزا دؤندَریب، ـ «یاریمایاسان! نه اولدی؟!» دئدی.
اوغلان باشی آشاغی، سویو پارچا ییغا ییغا دئدی: ـ «ائله بیل دالدان سیچان کئچدی!»
یاواش یاواش اؤزونه گلن کیشی الینی اونا آتدیغیندا، اوغلان یئریندن سیچراییب قیراغا چکیلدی. قادین اوغلانین بیلهییندن یاپیشیب، ـ «بو نئینهسین، او یاریمامیشین جینگیلتیسی زهریمی یاردی» دئیه اونو یئنیدن اوتورتدو سوفرا باشیندا.
پیشیگین "موو" سسینه هامی قاپییا دؤندو. ساری، کؤک پیشیک اونلارا باخیردی. کیشی ـ «توو گؤزووه! ائوین سیچانین توتماق عوضینه، دایجا چؤلدن ائوه سیچان قوناق گتیریر» دئیه یانینداکی یاش دسمالی اونا تولازلادی. پیشیک توواراق چؤله چیخدی. قادین قورو چؤرکلری یاشلاردان آییریردی. کیشی بیغلارینی ائشه ائشه، ـ «ییغیشدیر بابا! زهریمیز اولدی» دئدی.
قادین تیلتانین سون تیکهسینی اودوب، کاسالاری بیر بیرینین ایچینه قویوب آیاغا قالخدی.
***
اوغلان اوپنـین دووارینا دایاناراق، فیکره گئتمیشدی. ساری پیشیک قاباغیندا اویناقلاییردی. چنهسی الیندهکی آغاجدا، گؤزو پیشیکده؛ او قیرمیزی دیلی ایله اوستو باشینی یالاییردی. آغاجلا پیشیگین قیچلارینی قووزاییب آشیراندا، پیشیک قاچیب اؤزونو قادینین قیرمزی دونونا سورتدو. قادین ـ «قانجیق!» دئیه اونو قووالایاندا، پیشیک گئدیب کیشینین قاباغیندا کورهیینی خالچایا سورتدو. کیشی قیزین باشینی تومارلاییردی. قیزین گؤزو تلویزیوندا دالاشان کیشییله اوغلاندا ایدی. کیشی پیشیگه ایشاره ائدرک، قادینا یان دؤندو. ـ «گئجه یاریسی چیخماسایدیم، اؤلموشدو ها.»
قادین چؤرک قیرینتیسی یئره دوشمهسین دئیه دونونون اَتهیینی سوفرا کیمی قاباغینا سرمیشدی. اَتهیی الینده ایکن مطبخه دؤنَنده، تیکهنی گوجله اؤتوروب لیوانی باشینا چکن اوغلانا گؤزونو آغارتدی. اوغلان ـ «هاه!» دئییب، سولانمیش گؤزلرییله کیشییه باخیب دئدی: ـ «یئرینده اولسام، قویارام او قارا ائرکک بونو پارچالار.»
کیشی: ـ «هله سن گؤزتله پارتلامایاسان!»
قیز آلتدان یوخاری آتاسینا باخیردی، ـ «آتا! من سحرهجک یاتمایاجاغام.»
کیشی: ـ «نییه قیزیم؟»
قیز قالخیب اونون بوینونو قوجاقلادی، ـ «سیچانا گؤره!»
کیشی: ـ «قورخما! داما کی چیخا بیلمز.»
قادین اَتهیینی سیلکهلهییب، قیزا دؤندو: ـ «گؤزتله سیچان اَتووی یئیَر!»
اوغلان اوپنین قاباغیندا آغاجی توولاییردی. قادین یانیندان سوووشاندا، یاواشجا اونا دئدی: ـ «به بیز نئیلهیک؟!»
قادین دیرناق توتان الینده، گلیب یئرده اوتوردو. اوجا سسله دئدی: «من نئیلهییم، بوش اوتاغیمیز اولسایدی، اوردا یاتاردیز.»
کیشی قادینا ساری دؤنوب، موضوعو باشا دوشنده، اوغلانا باخدی: ـ «به اَده! بالاجا قیزی تک دامدا یاتیرداق!»
اوغلان باشینی آشاغی سالیب، یاواشجا دئدی: ـ «منه نه! من کی سیچاندان قورخمورام.»
کیشی بیغلارینی گمیریردی، ـ «اون اوچ یاشین وار، هله ایندی اوشاقلار کیمی اَدا تؤکورسن» دئیه قیزی اؤزوندن آییردی.
قادین ـ «وای!» دئدی. سونرا آیاغینی الینه آلیب، باش بارماغینی آغزینا سالدی. ـ «فیکریم سیزده قالدی، مایامی قاناتدیم بابا! هله گودون بلکه چیخدی...»
کیشی قادینین یانینا گلیب، اونون بارماغینا باخدی: ـ «بیر شئی اولماییب!» سونرا گئدیب ائوین بوجاغینداکی یوکه سؤیکَندی. قادین آیاغا قالخدی. فیکره دالمیش اوغلانی سوزه سوزه، قیزا ساری دؤنوب تلویزیونون سؤندورمهسینه ایشاره ائلهدی. سس باتاندا، اوغلان قیزا ساری ایمکلهدی: ـ «سؤندورمه! بیر آزدان فوتبال وار.»
کیشی بالیشین اوستونده اوتورموشدو. ـ «فوتبال زاد تعطیلدی... ایشیم وار سحر!»
قادین اووجوندا دیرناقلاری سایا سایا، اونا یاخینلاشیب، یاواشجا ـ «سحر جومهدی» دئدی.
گولومسهین کیشی ـ «گؤزلرین آیدین!» دئییب، بالیشین اوسته ییرغالاندی.
قادین قاپی آغزیندا ـ «ائله بیل اوشاقلیغین یادووا دوشوب. آت مینیبسن؟!» دئیَندن سونرا، پیققیلداییب حیطه چیخدی.
اوغلان آیاغا دورموش، قیز قورخویلا اونا باخیردی. قادین ایچری قاییداندا، یوکه ساری گئدیب یایلیغین اوجویلا اؤزونو یئللهدی، ـ «چؤل ائودن ایستیدی!»، سونرا گؤزونو سیلیب قیزا دؤندو، ـ «ایندی جانین چیخسین، یورغان دؤشهیی چیخارت داما.»
کیشی گؤزو یومولو اوغلانا سسلندی: «اَده! دور! اونون ایشی دئییل.»
اوغلان قادینا باخیب اوزونو تورشوتدو. ـ «سن قویمادین توتاق!»، یاواشجا دئدی.
قادین گؤزویله کیشینی گؤرسهدیب، آلت دوداغینی دیشلهدی.
کیشی ـ «سنین بوردا یوخون یوخدی، بلکه دامدا یاخشی یاتاسان» دئدی. اوغلان قادینا اَیری باخا باخا ائشییه چیخدی.
***
سیچان کابینتلرین آلتیندان چیخیب قاپییا ساری گئدنده، پیشیک اونو یاخالاییب بوینوندان یاپیشدی. سیچان کییریمیشدی. پیشیک سیچان آغزیندا، دؤنوب اوتاقدان سیزان حزین ایشیغا باخیردی. ایشیغین آلتیندا، سالینمیش یورغان دؤشکده، قادینلا کیشی شاشقین حالدا اونا باخیردیلار. پیشیگین گؤزلری ایشیلدایاراق، اونلارا زیللنمیشدی. قادین یاواشجا ـ «دور ایکیسینی ده چیخارت، قاپینی دا اؤرت!» دئدی.
کیشی دوروب، یاواشجالی ـ «پیشته!» دئیه دئیه ایکیسینی ده ائشییه چیخارتدی.
قاپی آغزیندا، پیشیک سیچانلا اویناقلاییردی. سیچانی توتوب بوراخیردی، اوزانیردی، اللرینه گؤتوروردو، اونو دیشلهییردی، اییلهییردی، ...
[ به عنوان شهروندی ایرانی که ادبیات تنها دلمشغولیش میباشد، همواره به این جمله کافکا اندیشیده ام که روزی گفته بود: "من فقط ادبیاتم!..." در قالب یک وبلاگ آنهم در حوزه ادبیات داستانی، "مین بیر گئجه" پیش روی شماست. ]