1001 تبریکلر!
مین بیر گئجه: چندی پیش پایگاه اطلاعرسانی "جایزه ادبی صباحی" با معرفی اثر برگزیده این جشنواره اینترنتی به کار خود پایان داد (1392.9.1). مین بیر گئجه به خاطر علائق مشترک داستانی، ضمن تبریک مجدد برگزاری موفق این جشنواره به دستاندرکاران گرامی آن، به دلیل اهمیت متن حامد احمدی (یکی از اعضا محترم هئیت داوران و از داستاننویسان نام آشنا) بار دیگر شما را به خواندن آن دعوت مینماید.
***
حیکایهمیزدن دانیشاندا نَدن دانیشیریق؟
"صباحی اؤیکو اؤدولو"نه گؤره آچیقلامالار
حامد احمدی
نم هانسی یازیچیدان اوخوموشدوم: «بیر یازیچینین گؤزل خاطرهلریندن بیری، اؤز چاغداشلارینین اثرلرینی اوخوماق ساییلا بیلر». آذربایجانیمیزین ادبیاتیندا کیتاب قیتلیغی، درگی یوخلوغو و بیر آز دا تنبللیک (چالیشیرام بیراز ادبلی یازام!)، اؤز اثرلریمیزی اوخوماق فورصتلرینی گئتدیکجه آزالدیر. بیر یاندان دا شعرین حیکایهیه غالیب گلمهسی و ادبیاتچیلارین چوخونون شعر آلانیندا آت چاپدیرماغی، حیکایه گؤیونو تبریزین گئجهلرینه تای اولدوزسوز بوراخیر. بو آرادا گاهدان بیریلرینین ماراقلانیب بیر حیکایه فستیوالی قورماغی، بارات گئجهسینده فیشفیشا بازلیغا اوخشاییر و اونو دَیرلندیریب اونا اؤنم وئرمک، لاپ کیچیک گؤرهویمیز ساییلا بیلر. بورا کیمی بئش حیکایه یاریشماسیندا قاتقیم اولوب؛ بیرینجیسی "بیرلیک" و "یاشماق" درگیلرینین واسطهسییله قورولموش «سونای حیکایه اؤدولو» ایدی. سانیرام سونای حیکایه اؤدولو بیزیم آذربایجاندا بیرینجی دفعه اولاراق، بیر حیکایه یاریشماسییدی. سونایدان سونرا، رضا کاظمی جنابلارینین چالیشمالارییلا «مین بیر گئجه حیکایه اؤدولو» ایشیق اوزو گؤردو. بیر دفعه ده سایین دنیوی همتییله قورولموش «آنامین یایلیغی» یاریشماسیندا داور اولدوم. آزادلیق رادیوسونون 2013-جو ایلده کئچیریلن ادبی یاریشمادا دا بیرینجی یئری قازانا بیلدیم. (بو اؤدولو مندن بیر ایل اؤنجه، حؤرمتلی خانیم رقیه کبیری ده قازانا بیلمیشدی.) و نهایت، بو ایلده «صباحی اؤیکو اؤدولو»نون داورلییینه فخرلندیم.
بوتون بو یاریشمالاردا یئنی سسلری ائشیتمک منی ماراقلاندیریردی. داها دوغروسو، آدام گاهدان اؤز هندهوریندهکی آداملارین سؤزونو ائشیتمکدن یورولور. من بیر یازیچی اولاراق، گؤیلوم ایستیر بیلم بیر اورمولو، زنگانلی، اردبیللی و... ادبیات پنجرهسیندن دونیایا نئجه باخیرلار؟ اونلار بیر کاراکتئرین آغزینا هانسی دیالوقلاری قویورلار؟ هانسی موتیفلر اونلاری حیکایه یازماغا ماراقلاندیریر؟ دیله نئجه باخیرلار؟ و مینلر بئله سوال. عومومن ده بو یولدان چوخلو ادبی دوستلار قازانا بیلمیشم. بو موسابیقهلرین گؤزل بیر یؤنو ده وار، اوخودوغون اثرلرین هئچ بیرینین یازیچیسینی تانیمیرسان، بعضیلرینی بلکه اوخشادا بیلرسن «مثلن حامد احمدی چوخ یامان یؤوز یازار اثرلرینده، بو حتمن اونوندو!»، آنجاق نهایتده اثرین اؤزونه نؤمره وئریرسن (البته من بو نؤمره وئرمکله موشکولوم وار و اونو دا آچیقلایاجام) و بو مسئله اثرلری داها دیققتله اوخوماغا ماراقلاندیریر.
صباحی اؤیکو (بیز دالی قالمیشلار حیکایه دئییریک
بونا، هله من گاهدان کیریخیب داستان دا دئیرم!!!) اؤدولو ده اؤزونه گؤره
گؤزل بیر فورصت ایدی بو آرادا. یازینین آردیندا
چالیشیرام اؤز گؤروشلریمی بو یاریشمادان آچیقلایام، بونلارین بعضیسینی بیر
اوستونلوک کیمی، بعضیسینی ده بیر آخساقلیق کیمی دوشونورم. عین حالدا چالیشیرام
اطرافلی بیر باخیشیم اولسون حیکایه دونیامیزا، بو گونکو گنج ادبیاتیمیزا. (بونو دا
آرتیرمالییام که هله سونوجدان خبریم یوخدو و البته بو مسئلهنین هئچ بیر تاثیری ده
اولا بیلمز بو یازیدا.)
صباحی یاریشماسینا 50 حیکایه چاتمیشدی. سیز بونو نئجه دَیرلندیریرسیز؟ من
شخصن هئچ اولماسا بیر 20 یازیچی تانیییرام، هردن بیر اولانلاری دا آرتیرسام، 40
آد سایا بیلَرم. بیر یاندان دا، 30 میلیون تورک آدلاندیردیغیمیز آذربایجاندا هئچ
اولماسا هر 100 مین نفردن بیری الی قلملی اولسا، 300 نفر اولارلار. (بونون دا یاریسینی
دا چون سیزسیز چیخیرام، قالار 150!) منجه هئچ اولماسا 100 حیکایه گؤرمهلییدیک
بوردا. نییه گؤرموروک؟ بعضیلر یازیر آمما (منه تای!) کیلاس قویوب یوللامیر. بعضیلری
ایستیر یازسین، آمما فیسبوکدان باش آچیب واخت آییرا بیلمیر (ایندی تو خود
حدیث مفصل بخوان از این مجمل!)
آمما بو 50 حیکایهنین ایچینده، بلکه 10 یا 15 حیکایه
منیم نظریمی اؤزونه ساری چکه بیلدی. قالان یازیلار یا ناغیل ایدیلر، یا دوز یازی
یا دا ایرفاقلا پلات حددینده قالمیشدیلار. آنجاق سئودییم او 15 اثر ده بوتونلوکده
منیم قوراللاریمی یئرینه یئتیره بیلمیردی. بیرینین سونوجو سونسوز ایدی، بیرینین
باشلانیشی ایرادلییدی، بیرینین دیالوقلاری عئیبجر ایدی، بیری بوتون گؤزللیکله بئله
پیرتلاشیق و داغینیق ایدی و ... (دیققت ائلهسز من باشقالارینا تای دیلشوناس دئییلم!
بیر ادبی اثرده، دیلدن ساوایی منی ماراقلاندیران چوخلو زادلار وار. یوخسا دیل مسئلهسینی
ده نظرده آلساق، بعضی ایشلرده آخساقلیق واریدی، آمما هانسی دیل؟!!!).
بو آرادا ایجرایی هیئت، اثرلری گؤزلجه بیر یئره توپلاییب هامیسنی ساهمان بیزه گؤندرمهسی ماراقلی ایدی. آمما داورلرین آدینی سونوجلار بیلینمهدن آچیقلاماق، منجه بیر سهو ایدی (ایجرایی هیئت بو مسئلهنین ایضاحیندا، خاریجی اؤلکهلرده بو ایشین اولدوغونو دئییب بو ایشی یاسالاماق ایستهسه ده، آنجاق من بورا اورتا دوغودو دئیه بئلنچی «قرتی بازی»لره اینانمادیغیمی بیلدیرمهلییم!). دئدیییم کیمی او تانیدیغیم 30 نفرین 20-سی بو یاریشمایا اثر گؤندرسه، من هئچ اولماسا او اثرلرین بئشینی اوخوموش اولارام. بو اوزدن بیر یاندان من اثر صاحیبینی تانیدیغیما گؤره، بیر اوزدن ده اثر صاحیبی منی تانیدیغینا گؤره ایش لاپ پیرتلاشیق دوشور. اونا گؤره ده تانیدیغیم اثرلره نؤمره وئرمکده سیخیلیردیم، بوندان بئله کی او اثرلر چوخ گوجلو ایدیلر (و آمما نؤمره مسئلهسی).
ایجرایی هیئت بیزدن اثرلره نؤمره
وئرمهیی ایستهمیشدی. بیرینجی مرحلهده 50 اثره صیفردن اونا کیمی نؤمره وئرمهلییدیک.
من اثرلرین هئچ بیرینه صیفر وئره بیلمهدیم، نییه کی اونلارین بعضیسینده گؤزل
پارچالار وار ایدی (اونسوز دا جسارت ائدیب اؤز اثرینی بیر یاریشمایا گؤندرمهیین
هئچ اولماسا بیر نؤمرهسی اولمالیدیر)، عین حالدا اثرلرین هئچ بیرینه ده 10 وئرمهدیم،
نییه کی دونیادا بیر ایکی یازیچیدان (قطعن اونلارین بیری من دئییلم!) ساوایی هئچ
کیمی بوتون نؤمرهیه لاییق بیلمیرم. (یئری گلمیشکن بیر خاطرهنی تعریفلهمهلییَم
(ایندی قاباقکی سؤز ده یادیمدان چیخاجاق!) – پارانتئز ایچینده پارانتئز آچماقدا او
ایشلردندی!- لیسانس دؤرونده درسلرین بیرینده کیلاسین هامیسی 14، 15 و بئله نؤمرهلر
آلمیشدیلار. آنجاق کیلاسیمیزین لاپ زیرنگ شاگیردی خانم نَمنمنه 19 آلا بیلمیشدی.
بو خانیم، اؤزگووَنلیکله (مندن بئش بَتر!) اوستادین یانینا گئدیب اؤزونه یوخاری نؤمره
آلدیغینا گؤره، 20 ایستمیشدی. اوستادیمیز گؤزلویونو چیخاریب، سینمایی گولوب - بو
سینمایی گولمهیین تعریفینی منیم فیسبوک صفحهمدن تاپا بیلرسیز- دئدی:
«دخترم! خود جناب فروید هم بیان اینجا، من بهش 20 نمیدم! 20 مال کسیه که
همه چی رو از این علم بدونه!»)
ایکینجی مرحلهده ده داورلرین بیر عیددهسینین ایستهیینه
رغمن، یئنه ده نؤمره مسئلهسی واریدی. بو دفعه اول 10 حیکایهیه یوزدن نؤمره وئریلمهلی
ایدی. (نه فرق ائلهدی جریان؟ هئچ زاد، منه تای تنبل داور گؤتوروب وئردییی نؤمرهنین
قاباغینا بیر صیفر قویسایدی، ایش حل ایدی!) داورلرین بعضیسینین ایستهیی بو ایدی کی،
بیر گون هامی بیر یئره توپلاشیب او 10 اثره گؤره دانیشیب نظرلریمیزی بیلدیرندن
سونرا، هئچ بیر شک - شوبهه اولمادان، بیرینجی اثری اعلام ائلهَیک. بو آرادا، هر داور
دَیرلندیردییی اثره گؤره، اؤز باخیشلارینی آچیقلایا بیلردی و سئچیلن اثر بوتون داورلرین
دوشونجهسیندن آسیلی بیر نظر اولا بیلردی. سئچیلن اثرده هر بیر ایراد دا اولسایدی،
داورلرین بوینونا دوشَردی. بو قرار یئرینه گئتمهدییی زامان، من و داورلرین بیری، دؤرد
اثر اولویتسیز سئچیلسین دئیه ایجرایی هیئته اؤنَردیک، آنجاق بو مسئله ده قبول اولمایینجا،
ایشین قئیدینی ووروب قوراللارا بویون اَیدیم. (شخصن بو مسئلهدن چوخ اوزولدوم. اصلینده دؤرد بیرینجی
اثر منیم باخیشیمدان بیر سیرادا یئرلشیردیلر و هئچ بیرینی بیرینجی آدلاندیرا بیلمیردیم.
البته بو آرادا ایجرایی هیئتین اؤزونه گؤره توضیحلری واریدی. اونلارین دئدییینه گؤره،
یاریشمانین توتدوغو قوراللار پوزولمامالی ایدی، آنجاق چوخلو فستیواللاردا متمایز
بیر اثر اولمایینجا، نئچه اثری بیر سیرادا تانیتدیرارلار - مثلن سونای حیکایه اؤدولونده
بو ایش اولدو).
آمما بیر اثره نئجه نؤمره وئرمک اولار؟ یعنی بیری صاباح گلیب منیم یاخامدان یاپیشیب سوروشسا: نییه منیم حیکایهمه 8 وئردین، یا منیم اثریمه 5، نه دئیه بیلرم؟
بو مسئلهنین بیر چوخ بؤلومو، هر اینسانین تنقیددن اؤنجهکی باخیشینا قاییدیر. بیر اثری اوخویارکن و قورتاراندان سونرا، منده بیر حیس یارادیر. بو حیسسین منیم نؤمرهلریمده ائتکیسی اولور. بو حیسده اثرین آدی، اونو اوخویارکن حالیم و... ده تاثیری اولار بیلر. آمما بیر یازیچی اولاراق، نؤمرهنین چوخ بؤلومو آشاغیدا سیرالادیغیم فاکتورلاردان اولوشور:
ـ اثرین منطق رواییسی: هر بیر اثرین بیر سؤزو وار. بو سؤز نه قدَر رئال دونیایلا اوست اوسته دوشه بیلیر؟ (البته سئحیرلی رئالیزم و یا سورئالیستی اثرلرده ده روایی منطق واردی.) منجه، یازیچی بیر حرفهای یالانچیدیر. یالانچیلیق باشارمایان اینسان، یازیچی اولا بیلمز. آنجاق حیکایه او زمان یارانیر کی، دئدییین یالانی او قدَر گؤزل دئیهسن کی اوخوجو اینانا. مارکز کیمی «یوز ایل تنهالیق»ـدا. گراهام گرین کیمی «گؤزل آمریکالی»ـدا، کافکا کیمی «مسخ»ـده.
ـ شخصیت بسلهمک (کاراکتریزاسیون): شخصیتلری بَسلهمک، تکجه اونلاری قولچاق کیمی اویناتماق دئییل. لاپ حرفهای قولچاق اوینادانلارین دا قولچاقلارینین ساختا اولدوغونو راحاتجاسینا حیس ائده بیلَریک. عین حالدا شخصیتی بسلهمک، تکجه اونون باش گؤزونو توصیف ائتمک ده دئییل. بو ایشی هر کیم گؤره بیلر. هم ده، شخصیتی بسلهمک، بیر نفرین اوستونه آد قویوب، آغزینا دیالوق یاراشدیرماق دا دئییل. او زامان، شخصیتی بسلهمک نَدیر؟ شخصیتی بسلهمک، منجه یوخاریدا دئدیکلریمین هامیسی حرفهای دورومدا و بیر سیرا باشقا زادلاردی. شخصیت ائله هندهوریمیزدهکی آداملاردی، محللهمیزین باققالی، تاکسی شوفئرلری و... شخصیت، بالزاکـین باباگوریوسودو؛ رومانی قورتاراندان سونرا اوتاغیندان چیخیب آغلارکن دئدی: باباگوریو اؤلدو! دوغروسو بیزلر شخصیتلریمیزله نه قدَر ایلگیلیمیز وار؟ نه قدَر تانییریق اونلاری؟ یوخسا ائله بیر آد اولسونلار دئیه اونلاری کاغیذلاریمیزین اوستونه گتیریریک؟
بو 50 حیکایهنین ایچینده، آداملارین چوخو شخصیت یوخ بلکه تیپ حددینده قالمیشدیلار. بعضیسی ده هئچ کؤلگه دئیه بیر شئی دئییلدیلر. مثلن بیر تیرئلی شوفئرینین تیپیک کاراکتئری وار، اونون دینلهدییی موسیقی ایبراهیم تاتلیسس (تاتلئس!!!)، بارماقلاریندا "دست دلبر" اوزویو، ائشمه بیغلاری وار، قولوندا دا "سلطان قلب مادر" کیمی بیر شئی دویدوروبدو. بو شوفئر، او زامان کاراکتئر اولا بیلر کی: باشقا شوفئرلرله بیر فرقی اولسون، بیر تیکی اولسون، اؤزَل بیر ایشلر گؤرسون. چوخلو سانتیمانتال اثرلرده تیپیک آداملاری گؤره بیلریک. فالچیلار دا ائله بو تکنیکله بیزیم آلینیازیمیزی اوخویورلار، «بیر موسافیرته گئدهجکسن، یولونو گؤزلهین وار، یاخشی بیر ایتتیفاق دوشهجک و ...».
ـ روایتین اتمسفئری یا فضا یاراتماق: هر حیکایهنین اؤزونه مخصوص بیر هاواسی وار. بلکه بوتون صنعتلرده بو مسئلهنی گؤرمک اولار. غملی بیر ماهنییا شاد موسیقی یاراشدیرماق اولماز، جینایی بیر فیلمه تئمپوسوز و یاواش صحنهلر اویغون دئییل. بو مسئلهنی اثرین بوتونلویونده یاراتماق، یازیچینین هنرینی گؤرسَدیر. حیکایهلرین بعضیسینده، خوصوصن سئچیلن 10 حیکایهده، بو مسئلهنی گؤزَلجه گؤرمک اولاردی. یازیچیلاریمیز حیکایهنین موضوعسونا اویغون ریتملر سئچه بیلمیشدیلر و آدام حیکایهنی اوخودوقجا لذت آپارا بیلیردی.
ـ تئکنیک و فرم: مدرن حیکایهنی کلاسیک حیکایهدن آییرا بیلن اصلی فاکتورلاردان بیری تئکنیک و فورمدو. حیکایهده رومانا رغمن یازیچینین الی باغلیدی. من بو ایکیسینی آجیله بنزهدرم. رومانی چَرشنبه یئمیشینه بَنزتسک، آنجاق حیکایه بادام یا پوسته اولا بیلر. ائله او اوزدن، ایجاز مدرن حیکایهنین اصلی عنصرلریندن بیری اولا بیلر. اوخوجونو آخماق و قانماز فرض ائتمهمک، سؤزون بیر آزینی دئییب قالانینی اوخوجویا تاپشیرماق ایجازین اصلی شرطیدی. تاسسوف کی، اثرلرین بیر چوخوندا بو مسئلهیه دیققت اولمامیشدی. بعضیسینده ده او قدَر سؤزلر گیزلَنمیشدی، آدام گیجهلیردی. (البته تئکنیک و فورم مسئلهسینه گؤره، چوخلو سؤزلر ده وار آنجاق داها دوغروسو حالیم یوخدو یازام! سیز ده ائله بیلین کی بیلمیرم!!!). بیر ده اثرده سؤزو گئدن مدرن و شهری فضا، منیم اوچون اؤنملی بیر مسئله ساییلیر. بو مسئلهنین سئچیملریمده آز تاثیری اولمامیشدی.
ـ دیل: دیل مسئلهسی بیزیم ادبیات آلانیمیزدا همیشه بیر مسئله اولوب و نظره گلن هله ده چؤزولمَز بیر مسئله کیمی قالاجاق. اؤزلرینی تنقیدچی آدلاندیران چوخلاری، دانیشماغا سؤز تاپمایاندا بیرینجی دیل آخساقلیقلارینا بارماق قویورلار. اونلار دیل مسئلهسینده «دیل قورولوشو»، «فارسجا دوشونوب تورکجه یازماق» و «یئرسیز سؤزجوکلرین ایشلنمهسینی» اَزبرلهییب یئرلی یئرسیز ایشلهدیرلر. اصلینده من بئلنچی تنقیدچیلری گؤرنده، رحمتلیک (جوما آخشامی گلدی رحمتینی آپاردی!) چخوف جنابلارینین سؤزونه دوشونورم. آمما بو حیکایهلرده، دیل مسئلهسی منیم اوچون لاپ سون سیرادا یئرلَشیردی. داها دوغروسو بعضی حیکایهلری اوخویا بیلمهدیم بو آخساقلیقلارا گؤره یا بیر سیرا اثرلرده یازیچی اؤزو ده قالمیشدی نئیلهسین، بعضی یئرلرده تورکجهسی اولان فارسجا سؤزجوکلر ایشلهدیردی، بعضی یئرده ده عجاییب غراییب استانبول تورکجهسینی... هر حالدا، دیل باخیمیندان بیر ادبی اثره باخماق (اؤزو ده بیزیم دوروموموزدا) منجه بؤیوک اینصافسیزلیک اولا بیلر ادبیاتیمیزا.
بو قارماقاریشیق اوزون یازینین سونوندا اعلام اولونان نتیجهدن و ایشین پروسهسینین بعضی بؤلوملرییله راضیلاشماسام دا، اثرلرینی بیزلرله پایلاشان بوتون یازیچیلارا یاشاسین دئییب، قلملری وار اولسون آرزولاییرام. هم ده صباحی اؤیکو اؤدولونون ایجرایی هیئتیندن منه داورلیق تکلیفینی وئردیکلرینه گؤره، اؤز تشککورلریمی بیلدیرمهلییم. و بو آرزویلا بو مکتوبو باشا چاتدیریرام کی: بو ایش داواملی اولسون و صباحی اؤدولو گلهجک ادبیاتیمیزدا گؤتوردویو آددیملار سونسوز قالماسین؛ اونسوز دا بیز بو یولدان بیر نئچه یازیچی قازانا بیلدیک ادبیاتیمیزا، مینلر اولسون بو ... (مینلر ده اولا بیلر، میندن منظور میندی بوردا!)
آبان آیینین ایییرمی
اوچو، ایللردن مین اوچ یوز دوخسان ایکی، تبریز
اَتک یازی: ـــــــــــــــــ
یازینین عونوانی "ریموند کارور"ین حیکایهلرینین بیریندن آلینیب.
ــــــــــــــــــــــــــــــــــــــــــــــــــــــــــــــــــــــــــــــــــــــــــ
"رضا عبدی" بیرینجی صباحی اؤیکو اؤدولونو قازاندی
«صباحي اؤيكو ياريشماسي»نين بيرينجي ايلي ارديبهشت آیينين 22 سينده فئستیوالین وئبلاقیندا بير بيلديريش يايماقلا باشلاندي. اثرلرين سون مؤهلتينهدك (31 شهريور1392) 50 حكايه گليب اليميزه چاتدي. بو حكايهلرين هر بيريسينه بير كُد وئرهرك، حؤرمتلي داورلريميزه يوللاديق. 15 آبان گونونده عزيز داورلرين وئرديييي امتيازلار اساسيندا، ايلك اون حكايهميز اوزه چیخدی. ايكينجي مرحلهده داورلر بو ايلك اون حكايهني اينجهلهييب بيريني سئچديلر. بو اساسدا بيرينجي صباحي اؤيكو اؤدولو "رضا عبدي" جينابلارينا عاييد اولوندو. رضا عبدي يازديغي "اؤلوم دئيیل كي" حكايهسينه گؤره، بو ياريشمانين بيرينجي يئرينده داياناراق، بير ميليون تومن اؤدولو قازاندي. بو عزيز يازاريميزي تبريكلهييب، ياريشمايا قاتيلان باشقا حؤرمتلی يازارلاردان، ها بئله دَیرلی داورلردن تشككوروموزو بيلديرهرك، هاميسینا اوغورلار آرزولاييريق. دوققوز داها حكايهنين يازارلارينا دا ياديگارليق بير هديه يوللاييب تقدير ائدهجهييك. اومود ائديريك حكايه ساحهسينده چاليشان بوتون دوستلار گلن ايللرده بيزه قاتيليب بو ياريشمانين داها گوجلنمهسینه یاردیمجی اولسونلار.
ادبییاتیمیزا اوغورلار!
صباحی اؤیکو اؤدولونون اجرایی هئیتی (ابوذر جعفري، رويا احمدي)
ـــــــــــــــ ایلک اون اؤیکو: ـــــــــــــــ
1. اؤلوم دئيیل كي، رضا عبدي (تبریز) 2. گؤزومو يوموب آچيرام، هليا بشيرزاده (تهران) 3. ساري، ايلقار مؤذنزاده (خیوو) 4. اورَييمده پالتار يووان خانيم، رضا جاوان (سالماس) 5. اؤلوم ماهنیسی، رحیم اقدم خواجه (تبریز) 6. ايلان ايلي، فرانك انصاري (اردبیل) 7. چیلپاق سؤیود آغاجلاری، مجید راستی (تبریز) 8. آغاجلارین آراسیندان گلن خیشیلتی سسی، پری آخته (اردبیل) 9. گلدی-گئدر، سعید نجاری (کویو) 10. پنجره، مهدی اصولی (خیوو)
ــــــــــــــــــــــــــــــــــــــــــــــــــــــــــــــــــــــــــــــــــــــــــ
" 1ـ بو لیستده ایلک اون حکایهنین یازارلارینی هله گتیرمهمیشیک. 1 آذر گونو بو اون یازارین آدینی دا اعلان ائدهجهییک. 2ـ حکایهلر گؤندهریلن تاریخلر اساسیندا سیرالانیبدیر. 3ـ بعض حکایهلر باشقا یاریشمالارا قاتیلیب یا دا درگیلرده و سیتهلرده یاییملانمیشدیر. بو سببلردن اؤترو, بو حکایهلری بیرینجی مرحلهده داورلیک ائدیلندن سونرا سیرادان چیخارتدیق. (داورلر بو حکایهلری اوخویوب امتیاز دا وئردیلر، آنجاق اجرایی هئیت طرفیندن کنارا قویولدولار. ) امتییازلار اساسیندا کنارا قویولان حکایهلر ایچینده اوچ حکایه ایلک اون حکایه ایچَریسینه گیره بیلیردیلر، آمما تاسفله یاریشمانین بیلدیریشینده قئید اولونان قایدالار اساسیندا حذف اولوندولار. بو اوچ حکایهنین حذف اولمالارینین سببلری:
ـ تکجه بیر گون (عظیمه کریمزاده): اردبیلده "سیب" آدیندا بیر فستیوالا قاتیلیب بیرینجی یئری قازانمیشدیر. (1391-جی ایلده)
ـ سیبئرییادا قالماق اولارمی؟ (مرتضی سلمانی): "چیراق" آدلی درگیسینین سیناق ساییندا چاپ اولونموشدور. (1389-جی ایلده)
ـ بیزیم تنگه (علی بخشپور): "مین بیر گئجه" آدلی وئبلاقدا یاییملانمیشدیر.
کُد/ یازارین آدی/ اؤیکونون آدی:
1/ عباس نعیمی/ سازسیز، سؤزسوز. 2/ ایرج محسنی/ آجي گولوش. 3/ داور زمانخانی/ سَحَر سَحَره قدَر ياتمادي!؟ 4/ معصوم جبارپور/ بو گئجه بوتون گوزگولره قان جالانير. 5/ کریم چایچی/ قیز قوشقووان 6/ مسعود سبزی/ ائرکک دونیا. 7/ احد فرهمندی/ قورخاق كيشي. 8/ ائلشن پورحسن/ اعلانلار. 9/ حسین اقبالیان/ بَنؤوشه اؤلومو. 10/ ***/ چيلپاق سؤيود آغاجلاري. 11/ محمد رزاقی/ بير گونده ياشاديق. 12/ رسول ملکزاده/ قارین قولو خان جماعتی. 13/ رقیه وعیدی/ يانقين. 14/ افراسیاب نورالهی/ قارانقوش اوشاق. 15/ حسن رفیعی/ ملكاميت. 16/ شریف مردی/ قیز. 17/ ***/ گلدي-گئدر. 18/ ***/ ساری. 19/ خسرو باریشان/ نورماللارين نورمالي. 20/ امیر نصیری/ یولداشلار اونودولمایاجاقدیر. 21/ نازخند صبحی/ سویوق گئجه. 22/ میلاد باقری/ رسولولنان داوودون ناغیلی. 23/ علی قاسمی/ میلچک. 24/ علی اصغر اوجاقلو/ آسیلی. 25/ حسین واحدی/ دووارلار مهلرکن. 26/ ***/ پنجره. 27/ فاطمه زلفی/ بو گزینتیدن. 28/ احد محمدی/ ساققیزلارینی اوغورلادیلار. 29/ شعله مرتضی سیلاب/ بیر داملا یاشام. 30/ ***/ اؤلوم ماهنیسی. 31/ عظیمه کریمزاده/ تکجه بیر گون. 32/ ***/ ایلان ایلی. 33/ ***/ گؤزومو یوموب آچیرام. 34/ نسترن اکبرزاده/ سونونجو شام. 35/ علی بخشپور/ بیزیم تنگه. 36/ پریسا علیزاده/ دؤرد دووار. 37/ ***/ آغاجلارین آراسیندان گلن خیشیلتی سسی. 38/ پریسا میرزایی ماهر/ بیر دسته چؤل قازی. 39/ توران قربانی صادق/ قاپی. 40/ مصطفی جباری سابق/ منی ده آپارین. 41/ مجید اسکندری/ هیچ زادین ظاهرینه آللانما. 42/ سعید فیوضات/ بخت اولدوزو. 43/ سارا خداکرمی/ سووخا. 44/ سنبله قاسمپور/ ایکی قورد کیمی. 45/ مریم احدپور/ آغ چادرالی آرواد. 46/ مرتضی سلمانی/ سیبئرییادا قالماق اولارمی؟ 47/ مهدی آقازاده/ یاشایانلار بیر گون اؤلور. 48/ پارلا ائل سئون/ دوغرو حایات. 49/ ***/ اؤلوم دهییل کی. 50/ ***/ اورهییمده پالتار یووان خانیم. "
[ به عنوان شهروندی ایرانی که ادبیات تنها دلمشغولیش میباشد، همواره به این جمله کافکا اندیشیده ام که روزی گفته بود: "من فقط ادبیاتم!..." در قالب یک وبلاگ آنهم در حوزه ادبیات داستانی، "مین بیر گئجه" پیش روی شماست. ]