بیزیم اؤیکو 49. (من و او گونلر، سعید فیوضات)
مین بیر گئجه: سعید فیوضات (اردبیل، 1349). تقریبن
یوز ایل بوندان قاباق، اولو باباسی رحمتلیک "میرزه یوسوف"، رحمتلیک "تربیت"
ایله بیرگه اردبیلین ایلک مدرسهلریندن بیرینین تَمل داشینی قویور. اؤزو دئمیشکن
یئددی آرخاسی معللیم ایمیش. تبریز دانیشگاهیندا مکانیک اوزره مهندسی اوخویوب،
اردبیلین لاپ آدلی - سانلی ارشد مهندسلریندن ساییلیر. 1365- جي ايلدن بَری شعر
يازسا دا، اؤیکو یازماغی آنجاق تزه باشلاییبدیر. بيرينجي کیتابی، 1392 ـده
یاییملانمیش "اونوتما مني" آدلی شعر توپلوسودور. "من و او گونلر" ایلک دؤنه اولاراق، "مین بیر گئجه"دن یاییملانیر.
***
من و او گونلر
سعید فیوضات
«"گئنگونبَز1
"ین باجاسیندا بیریسینی گؤردوم. قولاقلارینی شَکلهمیشدی،
ائشیتدییینی یازیردی... »
بیریسی قاباغیمی کسدی. پیچاغی
چیخاردیب منه وئرمک ایستهدی. باخدیقجا لاپ آوارا قالدیم. آغزیم آچیق قالدی. پیچاغی آلماق ایستهمهدیم. گولومسوندو.
نَدی، اؤلومه یئریکلهیَن من ایدیم؟ تئز اول آل اَلینه پیچاغی. هئچ اینانا بیلمهدیم.
اؤلومه یئریکلهدیییم چاغلاردان چوخ کئچمیشدی. او گئجیکمیشدی. حالیم هئچ دئمهیه
گلمز ایدی. دئدی: نهیه باخیرسان؟ ائله بیلیرسن یوخوداسان؟ دئدیم: یوخودا اولاندا دا
بئله ایشلر باشیما گلیب. سونرا قیشقیردیم. آخی بئله یوخولاردا قیشقیراندا، سَسیم
باتیردی. تَرپشه بیلمیردیم. زوران - گوجَن اَلیمی اوزادیردیم. آمما بو دؤنه سَسیم بوغازیمدا بوغولمادی، هئچ، لاپ
کوچهنی دولدوردو. بو دؤنه، نه اؤزومو یوخولو سانا بیلیردیم، نه ده اؤزومو او یولا وورا بیلیردیم.
هله اینتحار قدَر بؤیومهمیشدیم. هر دن، بیر ناغیلی قوراشدیرمیشدیم. نه بیلیم داوا
یئدیم اولمادی. مریضخانادا منی قورتاردیلار... یوخسا بئلنچی سؤزلر. آمما سؤز
بوراسیندایدی، نَدن بو آدام هر نهیی بیلیردی. آوارا قالمیشدیم. سؤزو بیر تَهر دَییشمک
ایستهدیم. گولدو. سؤزو دَییشمه، دئدی. داها نه دئمهیه آوارا قالدیم. هر دن
گولومسهییردیم، هر دن باشیمی دولاندیریردیم. آمما یئنه اَل چکمهییردی. سؤز تاپیب
دئیه بیلمهدیییمه گؤره، سؤزلریم دولاشدی. یاواش یاواش داعوا هَنگی دانیشماغا
باشلادیم: نه دئییرسن؟ اَل چک مندن، یوخسا... تئز دئدی: یوخسا نه؟ یئنه دیلیم
دولاشدی. قورخدوم. باشیم دؤندو. ائوده اؤزومه گلدیم. دوروب ایشکافلاردان
آلبوموموزو تاپدیم. آلبوملارا باخدیم. تبریزدن گلندن سونرا، هئچ عکسده یوخ
ایدیم. خاطیرلادیم. چوخ قاباقلار، منی تبریزده قورخوتدولار. "آبرسان2"ـداکی
قبریستانین قاباغیندان سووشاندا، بیر زیبیلچی قبریستانین آلچاق دیواریندان سَکییه
آتلاندی. قورخو، قورخو گتیرر. داها قورخدوم. یولدان کئچَنلرین بیری "قورخانا3" دئیهنده، زَهریم یاریلدی. "قورخانا"نی تانیمیرسان؟ دینمهمیش قاباغیندان
سوزولدوم. او گونلرین آغیرلیغیندان، باشیم گیجَلدی. اؤزومه گلنده، بو دؤنه، "آلا قاپی4"نین "دربندلیلر5" کوچهسینده ایدیم. "سوتگه ممد6"ین دوکانیندان اوزاق ایدیم. "مشه قافور7"ـون موراد آتلاری کیشنهییردیلر.
او پاسلانمیش ساری ایله قیرمیزی "جوانان" ماشینلاری دئییرم. کوچهنین آغزیندا بوخؤولانمیش ایدیلار. "توانا"نین، نؤووتچی دوکانینین سَکیسینده،
"اَسی8" بئکار اَیلَشمیشدی. سنگکخانادا، داش پیشیریب وئریردیلر خالقا. اونو یئنه
گؤردوم "اکبر آغا9" قاپانینین یئکه تاختا قاپیسینین قاباغیندا دورموشدو. اوردان بئله "آلا قاپی"یا چیخماق ایستهدیم. یئنه قاباغیمی
آلدی. ایَرلی گئتمک ایستهدیم. گئدهنمهدیم. دیوار کیمی قاباغیمی کسدی. سن هئچ
یانا تَرپشه بیلمزسن. دای دئمیرم منیم اؤلومون اوستوندن کئچهسن، دئدی. قیشقیرماغا
باشلادیم: من اؤلهسی دئییلم. دئدی: اوندا گرَک منی اؤلدورهسن. دئدیم: من نه
اؤلدورورم، نه اؤلورم... سن کیمسن؟ هاردان گلیبسن؟ منه باخماغا باشلادی. باخیشلاری
منی اینجیتدی. دوداغینداکی گولوش، گؤز قیسماغی منی سانجدی. هر دن "دَلی سعدالـه10"ـا هئله11 باخاردیم. باشیمدان آغری توتدو. آغزیم قوپقورو
اولدو. تَرلهدیم. تَر کؤینهییم ایسلاندی، تَر اییسی قالخدی. قولتوغومون آلتینین
تَر اییسینی لاپ یاخشی تانیییردیم. هر کیمدن ساوایی، او قوخونو سئوَردیم. الیندن
قاچسایدیم، دومبهله دوز دوکتورا گئدهجک ایدیم. هئچ تلفون وورماغا دا، آمان وئرمهدی.
ائله پیچاغین تییهسینی بوش بؤیرومه دورتوردو. اَل قولومو اؤلچمهیه باشلادیم. نه
دئدیییمی هئچ اؤزوم ده آوارمادیم. سینهسینه بیر ایتهلَتمه ووردوم. ایکی آددیم
دالا گئدیب، یئنه گلیب قاباغیمی کسدی. بیر دوه دیزی آتدیم، بوروق وئردی. یاخالادیم.
یولومو آچیب قاچماق ایستهدیم. یاخاسی الیمده قالدی. قولوندان یاپیشدیم. ائله گوجو
منیم گوجوم ایله بیر گلردی. قولونو بوردوم، بیردن پیچاغی قویدو اووجوما. پیچاغی
آتماق ایستهدیم. الیمی توتوب پیچاغی باسدی اووجوما. قیشقیریردیم. گؤزلریم کللهیه
چیخمیشدی. اونون دا گؤزلری بَرهلمیشدی. پیچاغین سینهمه ساری یاخینلاشماسینی
گؤردوم. ایلک اینانا بیلمهدیم. چَکیش برکیش منی لاپ هئیدن سالدی. گوجومو
توپلادیم، جییهردن قیشقیریب، قولونو آرخایا آپاردیم. بیردن قوللاری هئیدن دوشدو.
ساللاندی ایکی یانا. گولوشو لاپ اییرنج ایدی. اللرینده هئچ نه گؤرمهدیم. یئری
آختاردیم. پیچاق یوخا چیخمیشدی. آرخایا چکیلدیم. گولمهیه باشلادی. سَسی قولاغیما
دوشدو. اللریمی قولاغیما قویوب باشیمی اَیدیم. گؤزلریمی یومدوم. یاواش یاواش
گؤزومو آچیب قاباغیما باخدیم. یوخ اولموشدو. لئشی ده یوخ ایدی. گؤزومو دؤیدوم. هئچ
کیم یوخ ایدی. بوش بؤیروم آغریییردی. ائله بیل اوستومه ایستی سو تؤکوردولر. گؤزلریم
قارالدی. باشیم دولاندی. ماشینین اووولتوسو باش بئینیمی آپاردی. قولاقلاریم
آچیلدی. پولیس ماشینی یئیین گئدیردی. کیم زنگ ائلهمیشدی پولیسه؟ باشیمی آشاغییا
سالدیم. قیزارمیشدیم. تَر آلنیمدان سوزوردو. منی پتویا بوکموشدولر. من ده هئچ قولباغینی
خوشلاماز ایدیم. دؤنوب هئچ کیمین اوزونه باخا بیلمیردیم. بیردن ماشین دوردو. باشیمی
قالخیزدیم. هله "کلانتری"یه یئتیشمهمیشدیک. بَس نییه دوردوق؟ "شاه باغی12"نین دَلیسی یامانلاماغا باشلادی. گَلنه
سؤیوش وئریردی، گئدنه سؤیوش وئریردی. پولیسلر باخیردیلار. بوینونون دامارلاری شیشمیشدی،
گؤزلری کللهسینیه چیخمیشدی. دؤنوب ماشینین ایچینه باخدی، منی گؤردو. اورَییم
اوزولدو. الیمی باشیما قویدوم. گلدی دوز قارشی
شیشهنین او تاییندا دوروب منه دونوخدو. گؤزلریمی یومدوم. سس گلمهدی، گؤزلریمی
آچدیم. پیچاقچی بازاردا "مشه
ناغی13" جَفتهلره آچار سالیردی. دئدیم: جَفتهمی گتیریم؟ دئدی: سنین جَفتهنه
آچاریم یوخدور. نفَسیمی اؤتوردوم. بؤیروم سانجیدی. الیمی پتویا آتدیم. الیم قانا
بویاندی. هئیدن گئتدیم. پولیس ماشینی "شیر خورشید14" کوچهسینه کئچدی. دوکتورون
آلنینداکی تَر، مونجوقلاندی. تیکدیلر، بَرکیتدیلر. یاتماغا، زیندانیما گئتدیم. هر نه
اؤز یئرینده ایدی. کیتابلاریمین توزونو آلدیم، آتامین شکیلینین رَمکهسینی دَییشدیم.
ساعاتلارجا اوتوروب، کَردییه باخدیم، سو وئردیم. گئجه گوندوز نئجه کئچیر؟ دؤرد دیوار
آراسیندا، آییرد ائلهیه بیلمهدیم. آیاقلاریم ایشه گئدندن سونرا، الیم هئچ ایشه
گلمیردی. بیر کیتاب گؤتوروب "بؤیوک مَچید15"ـه ساری یولا دوشدوم. بلکه کئچن گونلرین
دوستلارینی گؤره بیلدیم. "بؤیوک مَچید"ین قاپیسینا "شیخ احمد16"ین اؤلوم خبرینی آسلامیشدیلار. مَچیدین ایچینه باخدیم. ایکی "علیریضا17"نین، "سیامک18"ـین دای آرامیزدا اولمادیقلارینی
خاطیرلادیم. قالان – قولان، قوجا کیشیلر ایدیلر. "قیزیلچی بازار19"ین ایچیندن بئله ووروب "ائرمنیستان20" کوچهسینه چیخدیم. "ائرمنیستان"ـدا هامی مسلمان ایدی! ائله "میسگره بازار21"ی اونا گؤره یاخین تیکمیشدیلر. میس
آفتافانین اوستونده باش یاریلیب گؤز چیخیردی. "جهان علوم مدرسهسی22" هله یئرینده ایدی. گؤودهمه
قیزدیرما گلدی. کئچدیم کیلاسلارین بیرینه. معلم، محصللره قیشقیریب دئییردی: اینانماسان
دَدووه لعنت! هئچ کَسدن سَس چیخمادی. ناظیم گلدی قارا حالوا پایلادی. قابینین اوستونده
یازمیشدی "دَدووه رحمت23". منه آیران یئتیشدی. ایچدیم، یوخوم
گلدی. والایلایا والایلایا مدرسهدن چیخدیم. "قدیم کیلسه24"نین یانیندا نئچه "ائرمنیستان"لی منی یاخالادیلار. هارالیسان،
دئدیلر. دئدیم: "آلا قاپی"لی. دئدیلر: بیز سیزون خولاز25 دئییلیک! بوردا نییه آشیرسان؟
ایکی جوت بیر تک اولانیمی دا سویدولار، منی یولا سالدیلار. نه واختدان نه واختا،
اؤزومه گلدیم. "موللا مؤمون26" مَچیدینین قاپیسی آغزیندا
ییخیلمیشدیم. دوکتور "معماری27"نین مطبیندن چیخان کور، منی گؤردو. جومدو
اوستومه. قولتوغوما گیریب ائوه آپاردی. گؤزلریندن اؤپدوم. دئدی: گئت "آغ آببا28"نین یانینا. آغریلاریمی آپاردیم
اورا. "آغ آببا" اَلیمی ایستکانا سالدی. چیی اَتله یومورتانین ساریسینی قاریشدیریب
تَپدی آغزیما. سونرا اَل سیلن29 له آغیزیمی باغلادی. دئدی: هله
دانیشما. اَنگین چیخیب یئریندن. "زئینال30"ـدان "آلا قاپی"یا دؤنمهیی اونوتدوم. دوز گئتدیم "درمان بوینو31"نا ساری. اورا یئتیشمهمیش دؤندوم
سولا. "نجفزاده32"گیلین دیوارلاری چوخ اوزوندور. آغاجلاری سایا سایا یئتیشدیم "عباسیه33"یه دؤنَن تینه. سولداکی ائوه گؤز آتدیم.
کولَک یوخ ایدی، هاوا وام ایدی. آمما "عطایی34" گیلین ائوینین پردهلری
دالغالانیردی. دؤندوم کوچهیه. "میرزا یوسوف35"ـون ائوینین یئرینده دؤرد مرتبهلی
ائو تیکمیشدیلر. ائودن بیری چیخدی. دئدیم: بورا منیم اولو بابامین ائویدیر. دئیَنمهدیم. اوندا
گؤردوم، "میراث ایدارهسی"نین مامورو قاباغیمدا دوردو. دئدی: بورا "میراث ایدارهسی"نه باخیر. چکیب قوپارتدیم اَل سیلنی
آغزیمدان. بیلمهدن چیی اَتله یومورتانی اوددوم. هر نه بوغازیمدا قالدی. گئتدیم
قاباغا، "َاسی"گیلین کوچهسینه باخدیم. "َاسی"نین اَرَبهسینه تابلو آسمیشدیلار. اوخوماق
اوچون قاباغا گئتدیم. دالیما دوشَن "میراث" مأمورو فیت چالدی. یولومو چکیب
گئتدیم. تیکه بوغازیمدا یومورلانیب قالمیشدی. "اعتیماد36" تَنگهسیندن دؤندوم "قَجهله37"یه ساری. "نَجی38" عَمیدن سو ایستهدیم. سَهنگی
چیخارتدی. سویو تؤکدو بارداغا. دئدی: ایچ "اَهلیمان39" سویودور، احسانِ ایمام حسین. ایچدیم.
بوغازیم آچیلدی. دئدیم: آللاه سنه رحمت ائلهسین! "َنجی" عمینی آپاردیلار. پروانهسیز بؤتکهسینه
تیر چیخمیشدی. بؤتکهنی "میراث" مأمورو داشیندیردی. منه ده اَیری اَیری باخیب، دئدی: دئیهسن دینج
قالمیرسان! قاچدیم. زیندانیم داریخمیشدی. نئچه گون باشیمی آتیب یاتدیم. یوخومدا قاپی
دؤیولدو. قاپی دؤیَن! گؤروشومه گلمیشدیلر. قارا خبر ایدی. آتامین مئیَتینی
یویوردوم. آتاما دئدیم: بو یاخینلیقدا سنه قوشولاجاییق. او دقیقه اونا داریخدیم. او
قاباغیمی کَسهنه ده، پیچاغینا دا بئله. زوران-گوجَن یوخودان آییلدیم. باشلادیم
اونا مکتوب یازماغا. بارماقلاریم بیر بیرینه دوبالاق آتیردی. بیر تَهر قلمی کاغیذ
اوستونده سوروشدوردوم. نئچه ایل قاباغا قویدوم مکتوبومون تاریخینی. یئنه یاتاغیمدا
اوزاندیم. یورغانی آلتیما سالدیم، یورغان
یاپریخدی. فیکیرلر منی آغیرلاتمیش ایدی. گئجهلر بَتر تَرلهییردیم. اؤسکورَک
آمانیمی قیرمیشدی. قارنیما قویوق سالمیشدیلار ائله بیل. سانجیلانیردیم. چؤپچی "لئیلا
خالا40"نین یانینا گئتدیم. دئدی: گؤبهیین دوشوب. دئدیم: اونو
کسیبلر. یئنه یورغان دؤشهیه دوشدوم. قاپی قونشو گلدی گؤروشومه، بیرجه او گلمهدی.
بیر گون، آغریلاریمین ایچینده قاپی دؤیولدو. آیفوندان باخدیم. پُست مأمورو ایدی. قاپییا
ساری گئتدیم، دئدیم: کیمسن؟ دئدی: کیلیمچی! یومولدوم قاپییا. بو پُستچی ایله بیر
مدرسهده اوخوموشدوق. منه مکتوب وئردی. ایمضانین یئرینه آدیمی یازیب دفتری
باغلادی. دئدی شوتو وئریلیب. کئچدیم ائوه. اونون مکتوبو ایدی. بوینوز چیخارتدیم. من
اونا مکتوب یازمیشدیم، او دا منه. تاریخینه باخدیم، گؤردوم منیم سانادیغیمدان
سونرادیر. مکتوبو آچدیم، بیر آدرس گؤردوم. باشماغی چکدیم آیاغیما. دابانچَکنی
تاپمادیم. دابانینی یاتیرتدیم، آدرسی یوخلادیم. مکتوب منی "قاسیمیه41"یه ساری سوردو. هله ده "عظیم"گیلین ائویندن توستو قالخیردی. توستو
"میراث ایدارهسی"نینکی ایدی. ائوین قاباغیندا فرانسه ایستکانیندا شربت پایلاییردیلار.
هامی باشماغیمین سورولمک سَسینه گؤره دؤنوب منه باخیردی. قولاغیمدا بومبا پارتلاییردی.
دیسکیندیم. هه! "چَرشنبه"یه آز قالیردی. مکتوب منی "استرآباد42" قبریستانلیغینا یئتیردی. بیر ده
گؤردوم آتایلا بابامین بیرگه قبیرلرینین باشی اوستهیَم. مکتوبدا یازمیشدی: بوردا اؤزونه یئر
جورلا. قبیر قازانی تاپدیم. یالوار یاخار ایش وئرمهدی. یئر یوخ ایمیش. جیبینه قاش
گؤز ائلهدیم. ائله او قبیری آچماغا سؤز وئردی. کولونگو گتیردی. آخشام ایدی. گؤز
گؤزو گؤرمه ییردی. قبیرین داشینی ساغ ایستهدیم. کولونگو داشین بؤیرونه ووردو، فیت سسی
قالخدی. مئراث مأمورو گؤبهلک کیمی قاباغیمیزدا یئردن بیتدی. منه باخدی، دئدی: دئمهدیم
دینج قالان دئییلسَن. دئدیم: بو آتا بابامین قبریدیر. دئدی: یوخ! بورا "میراث ایدارهسی"نه باخیر. گئتمهیه دوزَلدیم. قبریستانلیقدان
چیخاندا، پولیس مأمورو دوردو قاباغیمدا. دئدی: سویماغا گلیبسن؟ دئدیم: بوگون منیم
اؤزومو اؤلدورهجک ایدیلر، لاپ بئله جیبلریمی ده سویدولار. دئدی: ائله هامیز بئله
دئییرسیز. قولومدان توتوب منی آپاردی ماشینلارینا ساری. بویلاندیم ماشینین ایچینه باخدیم. قاباق اوتوراجاقدا،
شاه باغینین دَلیسی اوتورموشدو. اَلینی سینهسینه قویوب، باشینی اَییب، منه سلام
وئردی. آرخا صندله باخیب، بیردن اونو گؤردوم. قورویوب قالدیم. هئچ گؤزلهمیردیم. اَلیندهکی
ده ائله او پیچاق ایدی. دینمهدی. اَلیمی اوزالتدیم پیچاغا. تَرپنمهدی. دوروب
فیکیرلَشدیم. پیچاغی گؤتوروب، دایاندیم. تئز قولومو سیییردیم. پیچاغین کَسَریندن
توتوب تییهسینی سورتدوم قولومون بیلَییندن یوخارییا. یئری قیزاردی. سونرا بیر
ناخیش چکدیم. گؤز قاشینی قویمادیم، آمما دوداغینی گولَر چکدیم. ماشینین
شیشهسینه باخدیم. تک گولومسهیَن، ائله من ایدیم...
اَتک یازی دا اؤیکونون اصلی مَتنی کیمی ساییلیر. ــــــــــــــــــــ
1- اردبیلین اوستو اؤرتولو
بازاریندا اولان گؤزل بیر گونبَز.
2، 3ـ تبریزین محللهلریندن.
4، 5، 12، 14، 20، 26، 30،
31، 33، 36، 37، 41ـ اردبیلین قدیمی محللهلریندن.
6- سوتگه ممد اردبیلین آلا
قاپی محللهسینده دوکانچی ایدی. ایندی رحمته گئدیب.
7- کئچمیشده آلا قاپیـدا
ماشین کیرایه وئرن مشه قافور.
8- اردبیلین نیسگیللی
ناغیلی اولان اَرَبهچیسی. رحمته گئدیبدیر.
9ـ اکبر آغا قدیم اردبیده
تانینمیش قاپانچیلاردان بیری ایدی./ قاپان: قدیمی باسکول.
10- تانینمیش اردبیلین اَسکی
دلیسی. رحمته گئدیبدیر.
11ـ "هئله"
اردبیل دئییمینده همن "ائله" دئمکدیر.
13- رحمتلیک جَفتهچی مشه
ناغی(نقی).
15ـ بؤیوک مَچید: اوستو
اؤرتولو بازارین ایچینده تیکیلَن قدیم مسجیدلردن بیری. محصللرین بعضیسی درس
اوخوماغا اورا گئدیردیلر، گئدیرلر.
16- رحمتلیک شیخ احمد، بؤیوک
مَسجیدین پئشنامازی.
17- رحمتلیک شهید علیرضا
کیافر، رحمتلیک علیرضا عالم.
18ـ رحمتلیک شهید سیامک
علیارزاده.
19، 21- اردبیلین اوستو
اؤرتولو بازاریندا یئرلَشن قدیم بازارلاردان.
22- کئچمیشده اردبیلین
آدلی سانلی کئچمیش دبیرستانی.
23- آلا قاپیـدا آدلی قارا
حالوا ساتان. رحمته گئدیبدیر.
24ـ "ائرمنیستان کوچهسی"ـندهکی کیلسه.
25- اردبیلده 6 آنا محلله
وار: آلا قاپی، اونچو مئیدان، چئشمه باشی، تاوار، اوچ دوکان، پیر عبدلملیک. قالان
محللهلر بو آلتی آنا محللهنین "خولا"سی ساییلیر.
27- اردبیلین آدلی سانلی
شاعیری، ائلهجه ده گؤز دوکتورو اولان سایین یوسف معماری.
28- اردبیلین زئینال محللهسینده
یاشایان آدلی سانلی سینیقچی.
29- زئینال محللهسینده
دستمالا، یایلیغا دئیَرمیشلر.
32- نجفزاده عایلهسینین
ائولری. اسکی ائولردندیر.
34ـ آدلی سانلی شاعیر و یازیچی
صالح عطایینین آتا بابا ائوی.
35- رحمتلیک میرزه یوسوف
فیوضات. رحمتلیک تربیت ایله بیرلیکده اردبیلده ایلک مدرسه قوروجولاریندان.
38- اردبیلین قَجهله محللهسینده،
بؤتکهده باققاللیق ائلهیَن رحمتلیک نجی عمی.
39- اسکی آلا قاپیـدا، موللا
هادییا گئدنده بیر بولاق ایمیش. ایندی تزه تیکیلمیش خطایی بازارینین آلتیندان
جوشوب قَنولارا تؤکولور.
40ـ زئینالدا چؤپچیلیک
ایشینه باخان لئیلا خالا.
42- قاسمیه محللهسینین
قبریستانی.
[ به عنوان شهروندی ایرانی که ادبیات تنها دلمشغولیش میباشد، همواره به این جمله کافکا اندیشیده ام که روزی گفته بود: "من فقط ادبیاتم!..." در قالب یک وبلاگ آنهم در حوزه ادبیات داستانی، "مین بیر گئجه" پیش روی شماست. ]