مین بیر گئجه: سایین سلیمان جعفری (تبریز، ۱۳۵۷) ایندی­یه کیمی اول شاعیر، سونرا ایسه چالیشقان بیر ژورنالیست کیمی تانینمیشدیر. او آنجاق، اؤیکو ده یازیر. اونون یول ـ قار آدلی اؤیکوسو ایلک دؤنه اولاراق، مین بیر گئجه­ـدن یاییلدیغینی سئوینجله اوخوجولارا سؤیله­مه­لی­یم. 

***

 

يول- قار

سلیمان جعفری

آيسل قورخا- قورخا ال­لريني ساچ­لارينا سورتدو. یایلیغی­نین آلتیندان چیخمیش ساچلاری­نین اوجو دونموش، بیر آز دا آغیرلیق ائدیردی.کولک آجيمادان اوزونه ووروردو. قیز، اوپ­ اوزون جادده يالقيزجا ایره­لی گئدیردی. بو هاوادا گمی­نین قالخمادیغینی بیلسه ده، یئنه گؤله ساری یورویوردو. باشقا يولو يوخ ، ليمان شهردن داها ياخين ايدي. اؤزونو گؤلون اؤبور الینه چاتدیریب ائوه دؤنملی ایدی. بيليردي ائوده ایندی اونون یولونو گؤزله­ییرلر. دالبادال ساعاتا باخماقدان بئزدی. ساعاتین دویمه­سینی باسیب اونو ایشله­مکدن ساخلادی. داها يورولموشدو. يولون قيراغيندا داياندي. بير ماشین اومیدییله گؤزلريني يولا تيکدي. کولک قار ده­نه­لريني گؤزلرينه ووروردو. گؤز ایشلَتدیکجه یول اوزونوندا بیر زاد گؤره بیلمه­دی. يولدا بير ماشینین ایزي بيله يوخ ايدي. کيم بيلير سون ماشین نئچه ساعات اؤنجه گئتميشدي؟ 

يئنه يولا دوشدو. ان آزيندان ليمانا ياخينلاشيرام دئدي. نئجه الجک­لريمي اونوتدوم؟ اونلاري هئچ زامان پالتومون جیبيندن چيخارتمامالي ايديم. کئشکه تئز يولا دوشسيَديم. کئشکه يولداش­لاريمين سؤزونه باخسايديم. بو بير گونو ایجازه آليب تئز ائوه گئتمه­لي­ ایديم. نه بيلئیديم هاوا بئله اولاجاق؟ بورانین هاواسي دا، آدام­لارینا تاي­دير. نئجه اولاجاغي بللي اولمور. خبرلرده هاوانین خوش اولدوغوندان دئمیشدی­لر. نه ده خوش اولدو! آتام دوز دئییر تلویزیون سؤزلرینه اینانما. سويوق لاپ دريمي سويور. هاوا یوزماق­لاری دا يول چکمک­لرينه بنزه­یير. نئچه ايل­دير بو گؤلون اوستونده بيرجه کؤرپو سالدیرا بیلمه­ییب­لر. الینی آغزینا ساری آپاریب، نفسی­ ایله بارماق­لارینی ایسیندیرمک ایسته­دی. بیر ده، بو سئری شهره گئتسم، اوز کئرئميمي دَييشديرمه­لي­يم. زهله­م قاچمیش کیشی گؤر نه وئریب منه. دریم آز قالا چاتلاق چاتلاق اولسون.

شاختا اوزونو يانديرميشدي. آياق بارماق­لاري سويوقدان زوققولداییردی. یئنه ساعاتينا باخدي. اونو ایشدن سالدیغی یادینا دوشدو. گؤزلرييله گونشي آختاردی. هاوا آلا قارانليق اولموشدو، آنجاق آخشام اولماميشدي هله. قارا بولودلارين آلتيندان بير چيمديک ايشيق ايزي گؤرونوردو. ساعاتی ال هاواسینا قوروب یئنیدن یولا دوشدو. یورودوکده، اوشومه­سی آزالیردی.کولک داها اسمیر، هاوا ایسه بالا بالا یوموشالمیشدی. آيسل اؤز ـ اؤزونه دوشوندو: ليمانا چاتسام چوخ ياخشي اولار. بلکي گميلر قالخدی، گؤلدن ده کئچه بيلدیم. يا دا بير ماشین تاپيب شهره دؤندوم. اوندا گؤلون چئوره­سيندن گئدرم. يوبانسام دا يئتيشرم. ليمانا چاتا بيلسم!! يوخسا ايشيم چتين اولاجاق. آبريميز گئده­جک. کئشکه ماشیندان ائنمه­سه­يديم. سوروجونون بير تهر باشيني قاتيب ليمانا چاتمالي ايديم. بو دا منيم شانصيمدان ايدي. بير بئله ماشیندان گؤر هانسینا مينديم؟ گؤر کيمه راس گلديم؟ اوتانماز کيشي! مندن نه ايسته­ييردي؟  

 قار لاپ آجيغيني چيخارميشدي. آياق­لاري ايله قارلاري سپله­دي. حيرصيني بوشالتماق ايستيردي. يولون قيراغينا توپلانمیش  قارلاري تپيکله­دي.  

بو قار هئچ زامان يئرينده ياغمادي. اوشاقلیغیمدان بري بئله­دير. اؤيرتمن­لر سیناق آلدیغی گون­لر ياغمازدي، بوش گون­لر، تعطيل­لر، هفته سون­لاري ديزه قدَر ياغاردي.  

آيسل بونلاري دئييب يئردن بير آز قار گؤتوردو. ال­لرينده قار توپو دوزلدیب، باشيني گؤيه توتاراق، وار گوجویله قار توپونو بولودلارا ساري تولازلادی.  

  ـ بس­دير داها! نه قدَر ياغاجاقسيز دئيه باغيردي. 

   مينديیي ماشینی خاطيرلادي یئنه. نئجه باشارا بيلمه­ديم؟ سوروجونو دانيشيغا توتمالي ايديم. اؤزومو ليمانا چاتديريب سونرا بير تهر اليندن قورتاراردیم. ايلک باخيشدا پيس آداما بنزميردي ها. يوخسا ماشینینا مینمزدیم. نه بيلئيديم بئله ائده­جک. آخماق کيشي منه دئيير ليماندا نه ايشين وار، گَل سني اوردان گؤزل بير يئره آپاريم. کئشکه عاغليمي بیر آز ايشلتسه ايديم. چؤلون اورتاسيندا ماشیندان ائنمه­مه­لي­ ايديم. نازلانا ـ نازلانا داورانیب کیشینی آلداتمالی ایدیم. اولسون! اؤنجه ليمانا گئدک، ايشيم قورتاراندان سونرا سيز دئيَن يئره ده گئده­ریک دئمه­لي ايديم. بوش يئره قورورلانديم. کيشيني آلداتيب ليمانا چاتمالي ايديم. اوردا يئره دوشندن سونرا، او کيم من کيم؟ يولومو چکيب گئدرديم. چوخ دانيشسايدي، اونو اوردا اولان پوليس­لره وئره­رديم. يوخ او دا دوز ايش دئييلدي. بس قادينليق قوروروم نئجه اولسون؟ آللاه بیلیر مندن قاباق نئچه ـ نئچه قادين بو دورومدا قاليب، اؤلومو گؤزه آليب بئله ايش­لري يوخ. منيم قانيم اونلاردان قيرميزي دئييل کي. ائوه چاتسام تئلفونو گؤتوروب باشیما گلن­لری پوليسه آنلاتاجاغام. پلاکيني گؤتورموشم اونون. 

هاوا گئت ـ گئده قاراليردي. قارانليقلا بيرليکده قورخو دا آيسل­ـين اوره­يینه ائنيردي یاواش یاواش.  

آنام ائله بو ايش­لردن اؤترو دئييردي: تانري آروادي ائوه ياراديب، ائرکه­یي چؤله! یازیق آرواد نه­ قدَر دئدي ايشه گئتمه. آللاها شوکور بيزيم سنين پولونا احتياجيميز يوخدور. اوتور ائوده آدام کيمي اره گئت! قوی گؤزوم اوستونده اولسون. 16 ايل­دير درسيم وار دئييب اليني آغدان قارايا وورماميسان. بير آز دا ائو ايشي اؤيرن یوخسا صاباح دئيه­جک­لر ائولره قيز يولا سالان بئله ـ بئله اولاسان. ايندي بو آخشام ائوده اولماسام نه اولاجاق آللاه؟! ايندي آنام یئددیسینی دوغوب، سککیزینی بوغوب. آتام دا بيغ­لاري­نين اوجونو بورا ـ بورا گئدير گلير اوتاقدا. هله گئجه­نين قوناق­لاريني دئمه. نئجه بير ايکي گون مرخصی آلماديم.  

يئنه ده ال­لريني جيبيندن چيخارتدي. کيپريک­لرینه قونان قار دنه­لرینی سيلدي. اوزاقدان بير قارالتي گؤرونوردو. آيسل آلاقارانليقدا قارالتي­نين نه اولدوغونو سئچمه­يه چاليشدي. یولون اورتاسینا بیر آددیم یاخینلاشدی. گؤزلريني زورلا آچيق ساخلاییب باخيردي. قار يئنه چوخالميشدي. آرتيق، قارالتي­نين بير کاميون اولدوغونو اؤیرندی. اؤزونو يولون اورتاسينا آتدي. ال­لريني آچيب، قوش­لار کيمي قاناد چالماغا باشلادي. آغ قارلارين اوستونده قارا گييسي­لريني اسديريردي. سوروجو کاميونو ساخلاماغا چاليشدي. کاميون ساغا ـ سولا زویوب، تَگرلردن سيچرايان زیغ­لار یان یؤره­ده­کی آغ قارلاري لکه­لندیردی. آيسل زورلا اؤزونو نئچه آدديم دالييا آتدي. کاميون اونا بير آز قالان داياندي. آيسل سئوينجک اوشاق­لار کيمي سوروجویه ساري قاچدي.  

ـ مني ليمانا قدَر گؤتورون، دئدي 

ـ آمما باجيم ! بو هاوادا گمي قالخماز، سوروجو دئدی. 

ـ اولسون! يولدا قالماياجاغام کي. 

ـ  بو هاوادا، بوردا نه ايشين وار؟ 

ـ يوخاري کندده اؤيرتمنم. گئجه ائويميزده سؤز دانيشما وار. من اؤزوم ده اوردا اولمالي­يام. 

سوروجو گولومسه­دي. ـ بيز ده لیماندا ایشچی­ییک. آرخا ياندا يولداش­لارين يانينا کئچ. 

آيسل ایندی ايشچي­لرين يانيندايدي. کاميونون آرخاسيندان سون آياق ايزلرينه باخيردي. قار سئیرک ياغيردي. آيسل اوتانا - اوتانا ايشچي­لرين قول­لارينا باخیب ، ساعاتي اؤيرنمک ايسته­ييردي. گئجه ائولرينده سؤز دانيشماسي ايدي. اونون کبينيني دانيشاجاقدیلار.