قاپی

 

رامین جهانگیرزاده

 

اوچ قدم او یانا... !  اوچ قدم بو یانا... ! سحر آچیلینجاق آددیملادی... اوچ نفرین آددیم سسینی ائشیدیب دایاندی. قاپی­یا زیللنرکن، تیتره­دی بدنی. آددیم­لار یاخینلاشدیقجا، بوتون بدنینه قورخو یاییلیردی.

بیر آددیم... ! ایکی آددیم... ! اوچ آددیم... ! بیرینجی قاپی­نین آچیلماسی­نین سسی بئینینه دوشدو.

بیر... ! ایکی... ! اوچ... ! ایکینجی قاپی­نین سسینی ائشیدیب قولاق­لارینی توتدو. گؤزلرینی یوموب سس­سیزجه آغلادی.

بیر... ! ایکی... ! اوچ... ! بیر آن، آددیم­لارین سسی کسیلدی. سونونجو قاپی آچیلدی. اوچ نفر ایچَری کئچدی. گؤزلری گؤزلرینه ساتاشدی. اودقونوب یئرینده­جه قورودو. بیر سؤز دئمه­دن گؤزلری دولدو. سونرا سینه­سینی قاباغا وئره­رک، باشینی دیک ساخلادی. ـ «من حاضیرام، آپارا بیلرسیز!»، دئدی.