□□□

... ايلك گون­لر تئي چكيب، سوپورمك اوره­ييني سيخسا دا، گئتديكجه، ايشينه ورديش ائديردي و اوتانيب ائله­مه­سي آزاليردي. اونسوز دا، «صباي سبز»ـين آرم­لي پالتاريندا تانينماديغيني، ظنن ائديردي. دؤنه­لرله عسگرليك و يا اؤيرنجي­ليك دوست­لاريني گؤرسه­ ده، اونلار اونو گؤرمه­ميشديلر. قاچاراق، قاپي­لارا يويوروب، آغيزلارينا قدَر جاماعاتدان دولو قاطارلارا تپيلميشديلر. مئترويا گلن­لر، دونيانين ان تَلسن آدام­لاري ايديلار.

احد هرگون ايش باشينا يئتيشركن، پالتارلاريني دَييشيب، اؤز ايش منطقه­سينه گئديردي. ايشي­نين يئري، ساعاتي، فرقلي دوراجاق­لاردا، آيري-آيري شيفت­لرده، دَييشيلسه ­ده، سوپورگه، تئي و جوره جوره زيبيل­لر دَييشيلن دئييلديلر. احد سوپوروردو، يويوردو، تمييزله­ييردي و يئره آتيلان توخوم قابيق­لاريندا، بيليت كاغيذلاريندا، دؤشه­مه­يه­ ياپيشان ساققيز- شاقالات اَزيك­لرينده و قدغن اولماسينا باخماياراق، مئترو گيره­جه­يينده يئره آتيليب تله­سيک آياق­لار آلتدا ايچري شوتويَن سيقارئت كؤك­لرينده، اوخويوب دوشوندويو كيتاب­لار و اييرمي­آلتي ياشينا قدَر كئچيرديیي خاطيره­لره دوغرو، بير پاجا آچيب، گونونو كئچيريردي.

سحر دئميشدي: ـ «دا گئتمز كي.»

مسئله ائله بوراسيندا ايدي. بعضي شئي­لري گؤتورمك اولور، بعضي­لريني سيلمك، بعضي­لريني يوماق، بعضي­لريني حتتا پاكا دا چيخارتماق اولمور. يعني دا گئتميرلر. آغيرلانيرلار و نفس قاباغيني كسن بير شئي كيمي اونوتماق ايمكانيني دا آدامدان آليرلار.

او گون ده مئترويا گيريب، ايش منطقه­سينه يئتیشمک اوچون قاطارا مينمه­لي ايدي. سككي­يه کئچيب قاطارا ميندي. فورم پالتاريندا نظافتچي­ليك ايله، شخصي پالتاردا موسافير حيسسينده قاطارا مينمه­نين فرقينه دوشوندو و ايلك دفه اولاراق، قاطارين ايجباري سوكونو وئرديیي تأممولده، موسافيرلرين شوشه داليندان نئجه دالدا قالان سككي­لره باخمالارينا فيكير وئردي. بو حيسسي تكجه مئترودا ايشه گؤتورولن آدام دويا بيلردي.

قاطاردان ائنه­نده، دوراجاق ضابيطي «منصوري» اونو گؤردو:

ـ «جبارزاده! تو لباساتو عوض نكن! كارت دارم.»

احد اوره­يينده ـ «آللاه خئير ائله­سين»، دئدي.

ـ «بگير! اين بسته رو بِبَر حراست، بده به آقاي شكوري، بعدش لباساتو بپوش.»

بسته نازيك نايلون ايچينده قيرميزي- ساري خط­لري اولان دويونلو قالين دسمال ايدي. «شكوري»ـني اوتاغيندا تاپماق اولاردي، تاپماسايدي يئريني اؤيره­نمك چتين دئييلدي. ان اوزونو ياريم ساعات گؤزله­يه بيلردي.

احد الينده­كي نايلونا باخدي. گؤره­سن بو نايلون ايچينده نه واريميش كي، منصوري سحر ايشه گيرمه­دن، اونون آپارماسيني تكليف ائتميشدي. بونو هئچ شراييطده منصوري­ـدن سوروشماق اولمازدي. قايدا بئله دئييلدي و منصوري­نين سؤزو حتتا «صباي سبز»ين مودوروندن ده، كئچرلي و ايجرا اولونمالي ايدي.

شكوري­ني اوتاغيندا تاپمادي.

ـ «اون بئش ده­يقه­يه گلر»، دئديلر.

ـ «ايشين اولسا دئه!»

ـ «ممنون دؤزه­رم.»

احد اوتاقدا دورمادي. اوتورماق ايله آراسي يوخودو. سالونا چيخيب آدديم آتماغا باشلادي. بالاشلي آزادليق منطقه­سي ايدي. آغاج­لارا، اوجا- اوجا چينارلارا و دووارلارا ديرماشماق اولوردو. قاچيب گيزلنمك اولوردو.

شؤوكت دئميشدي:

ـ «قيغيلجيمدي يئتيمچه، يئره گؤيه چنگل سالير.»

كلثوم خالا:

ـ «اوغلان اوشاغي بئله اولار دا. بيزيمكي هله قيز خئيلاغي­دي، بير ده­يقه ديش دورور كي»، دئميشدي و سؤزو احددن آزديرميشدي.

شهر ال ائوينده اولماق آنلاميندا ايدي و احد شهرده هر آن، هانسي معلوم اولمايان مسئله اوزره خيرتده­ييندن ياپيشيلب، سورغو- سوالا چكيلمه­سيني گؤزله­مك ايضطيرابي دويوردو. بو حيسسي­نين يارانماسيندا آتاسي موصطافا جاببارزاده­ني موقصصير بيليردي و هر بير بوجاقدان، حتتا يوخولاريندا دا، بئله موصطافا كيشي­نين بيردن چيخيب: ـ «سن بير اليمه كئچ!»، دئمه­سيني خاطيرلاييردي. بالاشلي آمما گئنيش ايدي. ال چاتمايان چينارلاري و بوللو- بوللو قاچيب گيزلنمه يئرلري واريدي و ...

گؤرونور شكوري يوباناجاقميش. احد تووالئته گئديب ال- اوز يويانا ياخينلاشدي. نايلونو آسقيدان آسلادي و آينادا، آلنينا دوشن قيريشيق­لاري گؤردو. نظرينه هميشه قيسا گلن اييرمي آلتي ايل عؤمرو، چوخدا اوزون گلدي. ال- اوزونو يويوب، آسقيدان آسلاديغي نايلون ايچينده­كي قيرميزي- ساري دسمالا باخدي. هئچ كيم يوخودو. نايلونو گؤتوروب دسمالين  بوش دويونونو آچدي. گؤرونور ائحتيياطلا دويونلنميشدي. ايچينه باخدي. دسمالين ايكينجي قاتيندا الي برك بير شئيه دَ­يدي. نه گؤروردو؟ قاني قيريلان يئرلرينده، لَخته­لنميش اوچ نازيك قادين بارماغي؛ اورتا بارماق، اوزوك بارماق و چچله بارماغي. اورتا و اوزوك بارماق­لاري­نين ايكي بَندي كاميل  و بير بندي ياريمچيليق اولسا دا، چچله بارماقدان تكجه ايكي بند قاليردي. اوزون و سلقه­ ايله قوورالانميش لاك­لي ديرناق­لارين بيري­نين قيراغي سينيب، آتميشدي و بارماق­لارين كؤكدن اَزيليب قوپمالاري بللي ايدي. احدين جاني گيزيلده­دي. بير ساعاتا ياخين بو بارماق­لاري اؤزويله گزديرميشدي. بوفيكيردن سويوق تر جانيني بورودو و تله­سيك دسمالي اؤرتوب، نايلونا بيراخدي. ال­لري تيتره­ييردي و  ديل دوداغي قوروموشدو. اؤزونو اله آليب اوز-گؤزونه يئنيدن سو چيرپدي. نايلونو گؤتوروب ائشييه چيخدي. شكوري گلميشدي. نايلونو وئريب، نه كؤكده اؤزونو ايش باشينا يئتيردي.

تامام گونو بارماق­لارا فيكيرلشدي، اؤزونو قاطار آلتينا آتان قيزا و ...

نايلونا باخماسايدي، يقين هئچ نه بيلمه­يه­جه­يدي. آپاريب وئريب گله­جه­يدي و بو اوچ آي دوققوز گون آچيليش- ساكين­ليك گون­لري­نين آرديندا عؤمور سوره­جه­يدي. هر نه اؤز ريواليندا قالاجاقدي. آمما بو اؤز ريواليندا قالماق هئچ نه­يي دَ­ييشمه­يه­جه­يدي. فاجيعه فاجيعه ايدي و فاجيعه اولماغينا هئچ كيمين خبرلي اولماغيني گؤزله­مه­يه­جکدي. احد خبرسيز، بارماق­لاري اؤزويله گزديرنده ده، فاجيعه، فاجيعه ايدي. بير قيز اؤزونو قاطار آلتينا آتميشدي و صاباحيسي اونون دؤشه­مه­ده قالان اوچ بارماغيني، احد بير ساعاتا ياخين اؤزويله ساخلاسا دا، بير عؤمور يادداشيندا گزديرمه­لي ايدي.

فيليمي بير ده ذئهنينده جانلانديردي. چؤهرايي لئچك­لي- آغ مانتولو قيز سككي­يه ياخينلاشيردي. قيز بير آن دوروخوردو و قاطار ايكي اوچ مئتيرلييه يئتيشركن... احد نه قدَر چاليشسا دا، بارماق­لاري دقيقلشديره بيلميردي. بارماق­لار ائله ائله­سي، قيرميزي- ساري دسمالدا گؤردويو كيمي جانلانيرديلار و ...

احد اؤزويله داها هانسي فاجيعه­لري گزديرمه­سينه دوشوندو و بيردن بيره ايچينده آغير-آغير شئي­لرين اؤزويله داشيديغيني دويدو. بونو تزه­جه كشف ائديردي، گؤزونه آغير بير دونيا آچيليردي و كشف ائله­ديكجه، دويدوقجا دونيانين ان بؤيوك داشي كيمي، بير داغ كيمي آغير و ترپنمز اولوردو. يورولموشدو. برك يورولموشدو و اوره­يي سیخيليردي.

ايشدن چيخاندا، هاوا توتقون اولسا دا، ياغيش كسميشدي.

□□□

بالاشلي­يا مئترو چكميشديلر. احدي سككي­يه قويماديلار. بيليتچي «بالا عمي» ايدي و نه قدَر احد: ـ «نظافته گئديرم»، دئسه­ ده، ـ «قدغن­دي»، دئديلر.

احد دئدي:

ـ «بالا عمي! منم احد.»

ـ «هانسي احد؟»

ـ «احد دا. احد جاببارزاده.»

ـ «احد جاببارزاده؟»

ـ «هن احد جاببارزاده، شؤوكت خانيمين اوغلو.»

ـ «شؤوكتين اوغلو!.. شؤوكتين اؤلن اوغلو؟»

ـ «نئجه اؤلن اوغلو؟! شؤوكتين ائله بير اوغلو من ايديم دا. احد، احد جاببارزاده.»

ـ «تانيديم دا احد. ائله احد جاببارزاده. اؤلوب دا.»

ـ «نئجه ياني اؤلوب؟!... باخ بير! منم، احد جاببارزاده.»

ـ «دئديم دا اؤلوب. اينانماسان شؤوكتين اؤزوندن سوروش.»

بالا عمي الي ايله دوراجاقدا تئلئفون دَككه­سينده اوجا-اوجا دانيشان بير قادينا ايشاره ائتدي. قادينين باشيندا ماوي-ياشيل لئچك واريدي و اندامينا تاريم چكيلميش دار مانتوسونون قول­لاريني ديرسه­يه كيمي چيرمالاميشدي. گؤرونور شؤوكت چاديراني يئره قويوب، مودا باخيردي. احد شؤوكته ياخينلاشدي و مورَدَ­د:

ـ «آنا!... آنا!... باغيشلايين خانيم!»، سسله­دي.

قادين باشيني چئويردي:

ـ «باغيشلاييم؟ نه­يي؟»

احد آناسي­نين بو سرت جاوابيندان ديسكينَن كيمي اولدو. داها دقيقلَشدي. قادين آناسي دئييلدي. شؤوكت دئييلدي. آمما تانيش ايدي و هاراداسا اونو گؤردويوندن امين ايدي.

ـ «باغيشلايين خانيم!»

ـ «دئديم نه­يي؟»

ـ «هئچ نه­يي. من مئترو نظافتچي­سي­يم. اؤزو ده احدم. احد جاببارزاده. مني سككي­يه قويمورلار.»

ـ «هاني به سوپورگه­ن؟»

ـ «قاپي قاباغيندا آلديلار.»

ـ «ائله­دي. سككيده نظافت قدغن­دي. احدده كي اؤلوب.»

ـ «نئجه ياني قدغن­دي؟ نظافت مئترونون لاپ واجيب ايش­لريندن­دي.»

اونون حنجره­سيندن چيخان بو اوتوماتيک جومله­ني بوتون مئترو نظافت­چي­لري اَزبر ايديلر.

قادين دئدي:

ـ «دوغرودور. آمما بورا بالاشلي­دي بالا. بورادا قدغن­دي. منطقه شراييطي فرق ائدير دا.»

احد قاديني تانيدي. دانيشگاه قاباغيندا عيشوه ايله اوجا-اوجا دانيشان قيز ائله بو ايدي. نه قدَر ده، زكييه­يه اوخشاييردي. دوغرودور، بو قادين، زكييه و دانيشگاه قاباغي تئلئفون دككه­سينده دانيشان قيز بير ايديلر. بير نفر ايديلر و احد نه گئج باشا دوشوردو. بقييه هاردايديلار؟ قادين ايچينده­ ساري- قيرميزي دسمال اولان نايلونو الينده توولاياراق اوجا-اوجا دانيشيردي.

احد نايلونو تانييان كيمي اولدو. قاباغا گئديب دقيقلَشدي. اؤزو ايدي.

قادين اَ­يري-اَ­يري اونا باخدي.

احد نايلونو گؤستريب:

ـ «بو بارماق­لاري گرَك شكوري­يه يئتيرم»، دئدي.

قادين ـ «بارماق­لار؟» دئيه چيمخيردي، ـ «هاردان بيلدين؟»

سونرا مئترو يوخودو، آمما قادين و اونون داليیجا بالاشلي­لي­لارين هاميسي اونو قووالاييرديلار. احد اوجا بير آغاج بوداغيندان آسلاندي آمما، يوخاري چيخا بيلمه­دي، ائله­جه آسيلي قالدي. بوداقدان ياپيشان ال­لرينه باخدي. سول الي­نين اوچ بارماغي يوخودو. سحر دئدي:

ـ «اؤلونو آغاجينان وورون دوشسون. يوخسا هاممي­يا دئيه­جك.»

احد يالواردي:

ـ «واللاه اؤلمه­ميشم... ائله بئله­جه باخديم... هئچ كسه دئمه­رم...»

سحر دئدي:

ـ «دئيه­جك. واللاه دئيه­جك.»

احد چيغيردي:

ـ «واللاه دئمه­رم... هئچ كسه دئمه­رم...»

...

ـ «نه­يي هئچ كسه دئمه­سن؟»

يوسوف ايدي. احدي ترپه­ديب سسله­ييردي:

ـ «احد... احد... اويان گؤروم!... يئنه نه قاراباسدي سني.»

دئمك يوخو گؤرورموش. اوياندي، آمما ائله­جه اوزاناراق، گؤزلري سقفه تيكيلي قالدي.

سونرا يئنه ­ده ياتدي.

□□□

صاباحيسي احد ايش باشيندا ايدي. سيليردي، سوپوروردو، يويوردو و دؤشه­مه اوسته هر بير نؤقطه ­ايله، هر بير لككه ايله مين بير دونياني گزيردي. احد يئره باخيردي. اؤز ايچينده ماهني اوخويوردو، باياتي اوخويوردو و يان­يؤره­سيندن سورعتله اؤتوشَن آدام­لارين ايچينده جوره-جوره تانيديغي و تانيماديغي قييافه­لري سئير ائديردي. همين گون دوراجاق­لارين بيرينده سوپورمكدن يورولوب، دووارلارين بيرينه سؤيكه­نيب نئچه ثانييه­ليك دينجيني آلاندا، حركته حاضيرلانان قاطارين ايچينده اونو گؤردو. اؤزو ايدي. ائله همان چؤهرايي لئچك­لي، آغ مانتولو قيز ايدي. اؤزو ايدي. كوپه­لرين بيرينه مينميشدي. يئرين آز اولدوغوندان آياق اوسته ايدي و بير تانيش كيمي، مين ايلليك بير تانيش كيمي، احده باخيردي. سونرا قاطار حركته گلدي. قيز سيخينتيدا اولان باش­لار ايچيندن يئنه­ ده احده باخدي. گولومسه­دي. سانكي او قاطار آلتينا آتيلماق، او ابدي اوچ قانلي بارماق هئچ واخت و هئچ بير يئرده يوخوموش. احد يئنه­ ده، قيزا باخدي. قيز گولومسه­ييردي و اوزاقلاشيردي. احد گولومسه­دي. سونرا بالاشلي­ني گؤردو و يئلين  بالاشلي­نين قوجا، اوجا و ابدي چينار آغاج­لاري­نين ترپتمه­سيني.

 

اورمو، 11/9/1386