بیزیم اؤیکو 21. (بالاشلی ـلار، محمد صبحدل)
مین بیر گئجه: تحکییه ادبییاتیمیزلا باغلی سایین محمد صبحدل ایله اینترنت اوزره قیسا بیر دانیشیق آپارمیشام. اونون گنجلییینه باخمایاراق، محمد صبحدل حیکایه ادبییاتیمیزین چالیشقان و جیددی یازیچیلاریندان بیریدیر. "داستان کوتاه" آنلامیندا، "اؤیکو"یه "حیکایه" دئییر و سؤزجوکلرین اوستونده گئجه گوندوز یورولمادان سنینله دارتیشمایا حاضیردیر. دانیشیق یاییملانمامیشدان اؤنجه، بیزیم اؤیکو بؤلومونه اوندان بیر حیکایه ایستهدیییمده، ـ هله ایشیق اوزو گؤرمهمیش ـ بالاشليلار آدلی حيکايه توپلوسوندان آشاغیداکی اؤیکونو گؤندَردی. بو اؤیکو، ایندی سیزین قارشینیزدادیر...
***
اوچ بارماق
محمد صبحدل
و بو شيديرغي ياغيش ائله خيياوانلارين قوتور اوزلرينه، تيكينتيلرين اوجا هئيكللرينه، قنوولارين ـ قالديريملارين چاتلاميش جدوللرينه و بوتونلوكده شهرين پئيسرينه چيرپيب، چالالاردا قالانيب، گؤل اولوب داشماغا باشلادي كي، «احد جاببارزاده» سو داملالارينين او پاييز آخشاميندا، تئهران كيمي بؤيوك بير شهرين بوتونلويونو يويوب آپارماق قصد ائلهديكلريني ظنن ائتدي. البتته احد جاببارزاده بو ياغيشدان بَترلريني گؤرموشدو. اؤزو ده، تئهران كيمي نهنگ بير شهرده يوخ، ائله «بالاشلي»نين اؤزونده و بالاشلي كيمي بالاجا بير كندي يويوب آپارا بيلمهين ياغيش، بو عظمتده بير يئري نئجه آپارا بيلردي. حياتين ان عادي حاديثهلري بو عظمتين يانيندا داها عجاييبه چئوريليب، بو بؤيوكلويون اؤنونده ائعتيناسيزجاسينا چيرپان داملالار، داها گوجلو، داها جسارتلي گؤرونوردولر. احد سودان قاچان دئييلدي و اوزاق بير پاييز آخشاميني خاطيرلاما قيمتينه ياغيشدا ايسلانيب، سويوق دَيمهيه ده دؤزه بيلردي. آمما بؤيوك يئر، ايتي آدديملار طلب ائديردي و بير آز دا يوبانسايدي، ايشيني الدن وئرمهيهجكدي آمما سؤز يئري اولاجاقدي و احد بو سؤز يئرينين اولماسيني آتاسيندان دا بئله چكه بيلميردي.
□□□
مئترودا نظافتچي ايشلهمهيي، اوچ آي دوققوز گون اولوردو و بو اوچ آي دوققوز گون بير جوره اونون ياشاييشيندا آچيليش ـ ساكينليك گونلرينين باشلانماسي ساييلا بيلردي. هر نه اؤز ريواليندا ايدي و احد هئچ بير حاديثهنين بو ريوالي پوزماسيني ايستهميردي. دونَنيسي، بير قيز اؤزونو قاطار آلتينا آتميشدي. احدين ايش شيفتي اولماديغيندان، ماجراني گؤرمهسه ده، مئترونون فععال كامئرالاري صحنهني ييغميشديلار و او آغ مانتولو قيزين قاطار آلتينا آتيلماسي، دؤنهلرله جيب تئلئفونلاريندا گؤستريليب ال به ال گزيردي. آغ مانتولو، چؤهرايي لئچكلي قيز، جاماعات آراسيندا چوخ عادي ائله جاماعاتين بيريسي كيمي گؤرونوردو. قاطار گلنده ده، ائله جاماعاتين بيريسي كيمي قاطار خططينه ياخينلاشيردي، لاكين هامي كيمي خططين داليندا دايانميردي. خفيفجه دوروخوردو و قاطار ايكي اوچ مئتيرلييه يئتيشركن، سككيدن قاطار قاباغينا آتيليردي و ...
احد فيليمي گؤرمك ايستهمير. بئلهسي خبرلري، هر گون گوندهليكلرين حاديثهلر صحيفهسينده اوخوماق اولور. داها اؤلومه فيكيرلشمكدن بئزيب. تزه ايش تاپيب و سهمانا چيخماق ايستهيير. هئچ شراييطله، بو سيخينتيدان قورتولدوغو اوچ آي دوققوز گونون حيسسينين اورهييندن سيلينمهسينه راضي دئييل. هله سولطهدن قورتولماغي، اؤز آياغي اوسته دورماغي، اؤز اولماغي تزهجه دويور.
آتاسيیلا سويو بير آرخا گئتمهميشدي و اؤيرنجيليیيني كئچيرديیي تئهراندا آوارا دولانيب، دانيشگاه ايللرينده تانيييب عسگرليكده دوستلاشان ابهرلي دوستو «يوسوف»ـون موجرردي اوتاغينا سيغينماغي، آتا ائويندن اوستون توتموشدو.
يوسوفو 1378-جي ايلين اؤيرنجيليك تحرروكاتيندا توتولدوقدا تانيميشدي. هاميني بير يئره ييغميشديلار و او بؤيوكلوكده زالين ايچينده آداملار تكمسئيرك اوزانيب، اوتوروب، دولانسالار دا، گاهدان ميرتا، گوپا، بوشبوغازليغا باسسالار دا، قيريشميش آلينلاردان فيكيرلرين هارالاردا سئير ائتديكلريني سئزمك اولوردو. سيزيلتيلار، هنيرتيلر، اوچ دؤرد نفرليك هيجانلي سياسي موباحيثهلر، گاهدانسا ناشيليقلا ياواشجادان اوخونان نئچه نفرليك كورال ميللي ماهنيلار قاريشديقدا، آدامين ايچينده هانسي آد آپارا بيلمهديیي حيسسي اوياديردي. ائله همين سسلرين ايچينده دوداق آلتي اوخونان تانيش بير آذربايجان ماهنيسي، احدي اون- اون ايكي ياشلارينا و بالاشلينين قيزمار گونشي آلتيناجان آپارميشدي.
"فيكريندن گئجهلر ياتا بيلميرم
بو فيكري باشيمدان آتا بيلميرم
نئيلهييم كي سنه چاتا بيلميرم
آيريليق آيري...|"
- «باخ گؤر نئينهدين؟دونومو خارابلادين. ائششهح!»
- «منه نه؟ اؤزون باش آششاغي قويموشدون جيبيوه ده.»
- «خئيير ده، سن دئسهيدين كي...»
«سحر»ين جيبينده احدين وئرديیي قارا بيك خودكار قوسموشدو و احدي قووالايان سحر، اونو «شؤوكت خانيم»ـا يعني احدين آناسينا چوغوللاميشدي. شؤوكت خانيم سحرين كؤنلونو اله آليم دئيه ـ «بالاما تزه دون تيكهجهيم» دئميشدي و سحري باغرينا باسميشدي.
- «نه اولوب كي يويارسان گئدر ده.»
بونو احد دئميشدي. و سحر دونونون دؤش جيبينين جؤوهرلي حيصصهسيني اؤزوندن آرالاياراق، ياري اؤزونه و ياري شؤوكت خانيما، ـ «دا گئتمز كي» دئيه اونلارا باخميشدي. ائله باخميشدي كي، واختلي واختيندا سايمايان احدين يادداشيندا، سونرالار، محو بير خاطيرهيه چئوريلديكده، ابدي بير رسيم ياراتميشدي و بو اؤتري اوشاق دوشونجهسیيله دئييلن «دا گئتمز كي» ايللر سونرا، احدين دونيا گؤروشونده ياشاييش فلسفهسينده درين آنلاملار قازانميشدي.
سحرين آناسي «زكييه»، شؤوكت خانيمين صميمي اوشاقليق دوستو ايدي. بللي اولان آغير ياشاييش كئچيرميشدي و احد بونو اون- اون ايكي ياشينداكي دوشونجهسیيله اونون بونون پيچيلتي، قاش گؤز ائتمه و ايشارهسيندن دويموشدو. سونرالار احد بيلدي كي، سحرين آتاسي سروان «سولطاني» اينقيلابدان قاباق قارد افسري اولدوغونا گؤره، آروادي زكييهيه خبر وئرمهدن اينقيلاب ايللري گيزلهنيب يوخا چيخميشدي. اينقيلاب چاغيندا ايتكين دوشن آز دئييلدي و ارينين وضعيندن خبرسيز بويلو زكييه، نئچه آي بوش ائوده گؤزلهييب الي چاتيب چاتماياندان خبر توتاندان سونرا، تئهرانين او هايهاراييندان نه كؤكده اؤزونو بالاشلييا يئتيرميشدي. سونرا سحر دوغولموشدو و سولطانيـدان خبر اولماميشدي. اونون ديري اولماغينا چتين اينانماق اولوردو. زكييهيه ائلچي گلن اولسا دا، ـ «دؤزهجهيم» دئيه باشدان ردد ائلهدي. دوز ايكي ايل خبرسيز قالدي، آمما گؤزلهدي.
ايكي ايلدن سونرا، سولطاني يئني دؤولتين افسرليك پالتاريندا كنده دؤندو. ايسلام جومهورييتينين ارتئش افسري ايدي و عيراقلا تزه باشلانان موحاريبه جبههلرينده دؤيوشوردو. كيمسه زكييهيه گلن ائلچيدن زاددان سؤز دئييب، آروادينين بويلولوغوندان خبرسيز سولطانينين اورهييني بولانديرميشدي. بو ظنن فاجيعه دوغورموشدو. زكييه شوككه اولدو و آتاسي «بالاعمي»، سولطانيـني ائودن قوواراق، ـ «بو اوغراشين آديني چكهنين نهكيوارينا لعنت!»- چئويردی ـ «ايتيل سولهنديیين يئرلره قورومساق!»
زكييه اؤزونو آلا درهسيندن آشاغي بوراخدي. يقين اهيهر او زامان بالاشليدا دا، بير مئترو خططي اولسايدي، اؤزونو قاطار آلتينا آتاردي. آلا درهسيندن قورتولماق چتين ايدي لاكين قاطار آلتيندان ماحال حددينده ايدي. زكييه اؤزونو آلا درهسيندن آشاغي آتدي آمما اؤلمهدي. بو حاديثه اثرينده مشاعيريني ايتيردي. داوا درمان جاواب وئرمهدي و اورمو دليخاناسيندا نظارت آلتينا آليندي. سحري ايسه زكييهنين آتا آناسي بالاعمي و «كولثوم خالا» ساخلاييرديلار.
او واختلار، احد بونلاري بو آيدينليقدا بيلميردي و تكجه شؤوكت خانيمين كند آروادلارينين بيريیله دردلشنده، ـ «لاپ ائله بيل زكييهنين اؤزودو» و «بو چؤلون تزهلييي ايدي يازيق زكييه» سؤزلريني ائشيتميشدي. بللي اولان، سحر، آناسي يئرينه حؤرمت گؤروردو. آروادلار سحري گؤردوكده، كؤوركلهنيرديلر و بو كؤورهلمک، سحره كند اوشاقلاري ايچينده بير جوره نوفوذ، بيرجوره روتبه مرتبه قازانديرميشدي.
زكييه نظارت آلتيندا قالمالي ايدي. او واختلار، كيمسه بو نظارتين ايللرله اوزانديغيني، فيكرينه ده گتيره بيلمزدي. شؤوكت خانيم كولثوم خالايا: ـ «اؤلمهميشم كي، من ده سنين بير قيزين. باش چكهرم بيلهسينه»، دئميشدي و البتته نئچه دفهدن آرتيق، او دا، اوول ايللرده باش چكه بيلمهدي. دوغروسو، احدين آتاسي موصطافا جاببارزاده قويمادي.
سولطاني جبههيه قاييتميشدي. او ايتكين دوشدويو ايكي ايلدن هئچ واخت و هئچ كيمه سؤز آچمادي و سككيز ايل موحاريبه بيتينجه ده، شهره دؤنمهدي. سونرالار، احد عؤمرو بويو يعني اؤيرنجيليكده، عسگرليكده و مئترودا نظافتچي ايشلهينده ده، بوتون نيظامي گئييملي آداملارين قييافهلرينده، قيريشيقلاريندا و شستليلييينده بو اصلن گؤرمهدييي سولطانيـني ايزلهميشدي.
موحاريبه بيتندن سونرا دا، سولطاني كنده دؤنمهدي. دؤنسه ده، احد ايلين تكجه اوچ آي ياريمي بالاشليدا اولوردو و اوجور كي گرك، كند ياشاييشيندا عادي اولدوغو كيمي، حاديثهلري ايزلهيه بيلمزدي. آنا طرفيندن بالاشليدان اولسا دا، اورمودا دوغولموشدو و بالاشليداكي يئر ـ مولكلرينه تكجه حاصيل واختي كؤچوردولر. آتاسي موصطافا زهملي بير كيشي ايدي. يئتيم بؤيويوب اؤز آياغي اوسته دورانلاردان، نئجه دئيهرلر حئساب كيتاب آدامي ايدي. بالاشليدان دئييلدي و اوتوز ايل مالييهده ايشلهديكدن سونرا، تقاعوده بوراخيلميشدي. زكييه اوسته شؤوكت خانيملا داوا ـ شاوا سالديقدان سونرا، بالاشليليلارلا رابيطهلريني آزالتميشدي. موصطافا جاببارزاده بئله بير كيشي ايدي. احدين اوشاقليغي شؤوكت خانيملا موصطافا كيشينين دئييشمهلريیله كئچميشدي. هميشه آجيليق اولموشدو، آمما حاصيل واختي، يعني ايش واختي باشلار ايشه قاريشديقدا، داوا - شاوا ائله آزاليردي كي، ايلده او بالاشليدا قالديقلاري اوچ آي ياريم، عاييلهنين ان شيرين چاغلارينا چئوريليردي. ان آزي، احد بئله دوشونوردو و بو دوشونمک اونون دوشونجهسينده بالاشلييا مخصوص بير حؤرمت - لياقت قازانديرميشدي. موحاريبه بيتدي و سروان سولطاني كنده دؤنمهدي. دؤنسه ده، احد بيلمهدي؛ يعني بو حاقدا نئچه ايبهاملي سؤز ائشيتدي. آمما او گنج ياشلاريندا، او دا، بالاشلي موحيطينده، سحر حاقدا سؤز- سوو خبر آلماسي بؤيوك حؤرمتسيزليك ساييلاردي. داها بويا- باشا چاتميشديلار و سحر ايله ائل ايچينده سالاملاشا دا بيلمزدي. سحري سون دفه شؤوكت خانيمين ياسيندا گؤرموشدو. كولثوم خالا ايله بيرگه گلميشديلر. بؤيوموشدو و ياشماقلانيردي. گؤزآلتي بير- بيريني نظردن كئچيريب، اؤزگهلشديكلريني حيسس ائتميشديلر. كولثوم خالا باش ساغليغي دئميشدي و گئتميشديلر. گؤرونور شؤوكت خانيمين اؤلومو، كولثوم خالاني لاپ سينسيتميشدي. شؤوكت خانيمي قلب خستهلييي آپارميشدي. احد دوشونموشدو كي، داها سحري تانيمير و بو گئتديكجه اوزاقلاشان و دونيانين درينليكلرينده اونودولماغا جان آتان گؤزآلتي باخيشلاري، داها يادداشيندا ساخلايا بيلمهيهجك. سحر اونون خاطيرينده اوشاق قاليردي و بو بؤيويوب، ياشماقلانان قيز ايله هئچ ايلگيسي يوخ ايدي. سحر اونون اؤز ايچينده قويلاديغي حيصصهلرين بيرينه چئوريلميشدي. بلكه ده، ائله بو قويلانماق، بو اوشاق سحري، 1378-جي ايلين او ياي گئجهسينده، بالاشلينين و اوشاقليغينين جوره - جوره خاطيرهلري ايچيندن ان تئز يادينا گتيره بيلديیي رسيمه چئويرميشدي.
او گئجه، احد بونلارين هاميسيني او ييغيلديقلاري بؤيوك زالين ايچينده خاطيرلاميشدي و بو خاطيرلاما بير ياز ياغيشي وئرديیي تسكينليك كيمي، احدين ايضطيرابلي جانينا تزهليك و يونگوللوك گتيرميشدي. او شراييطده، خاطيرهنين آجيسي دا، شيريني ده اونو كؤورهلديب يونگولـلَديردي. احد بو يونگوللشمهني، دوداق آلتي «آيريليق، آيريليق» ميزيلدايان و چنهسينين آلتي تزهجه ضربهدن گؤوهرميش يوسوفا مديون ايدي. لاكين او قاريشيقليقدا، هئچ نه ائده بيلمزدي. گؤزآلتي باشقا اؤيرنجيلرين دفهلرله يوسوف نصيرييه موراجيعت ائتديكلريني سئزميشدي و اونون اساسي ايشلره قاريشماسي بللي ايدي. تئز-گئج باشقالاريندان اونون آديني آلاجاقديلار و اونو بو جمعي توتولانلاردان آييراجاقديلار. سونرا سورغو- سوال باشلاناجاقدي و... احد بو ياشينا قدَر، زيندان گؤرمهسه ده، بونلاري بير طبيعي غريزه كيمي قاباقجادان اوخويا بيلردي. غريزه اونو يوسوفا ياناشماغا ايجازه وئرميردي. او هئچ نه ائده بيلميردي آمما يوسوفدان ممنون ايدي و بو ممنونلوق اوزرينده، تكجه يوسوفون قيافهسيني يادداشيندا ساخلايا بيلردي.
سونرا يوسوفو آپارديلار.
□□□
اوچ گوندن سونرا، احد تئهران خيياوانلاريندا سربست دولانيردي. نئچه آيدان سونرا، درس قورتولاجاقدي و اونو ائودن و موصطافا كيشينين سولطهسيندن ايجتيماعا چيخاران بو دؤرد ايل بيتهجكدي. بو دانيشگاه ايللري، آجي- شيرين اؤيرنجيلييين تامام حيسسلري، دونيانين ايدهآل و ايناملي- غورورلو يؤنونه اينانديران چاغلاري دالدا قالاجاقدي.
احد گئدهجكدي و دانيشگاه يئرينده قالاجاقدي. يئني اؤيرنجيلر گلهجكلر. دانيشگاه قاباغينداكي كوچهلري، پاساژلاري و چرچيلرين دؤشنديكلري قالديريملاري الك- ولك ائدهجكلر. آخشاملار قيزلي- اوغلانلي بزهنهجكلر و مودا باخان كيم، كئفه باخان كيم، دولانماغا چيخاجاقلار. ائو بوغونتوسوندان قورتولان جاوانلار، بو بيردن وئريلميش آزادليق اؤنونده يونگوللنهجكلر. سئوهجكلر، سئويلهجكلر. گوناها باتاجاقلار، پاكا چيخاجاقلار و زامان ائعتيناسيزجاسينا آتيني چاپاجاقدي. درسه گيريشنلري ده، و احد كيمي كؤهنه- تزه، آزاد-ياساق كيتابلار ايچينده هانسي گيزلي بير سيرري گزيب، باشي آغرييانلاري دا اولاجاقدي. اوخوياجاقلار، اؤيرهنهجكلر ودونيا بويو بيتمهين مسلهلر اوزره موباحيثه-موجاديله كئچيرهجكلر. ساواشاجاقلار، بير- بيريني توتدوراجاقلار، قورتاراجاقلار، قاچاجاقلار و يئنه ده گئدهجكلر.
احد سربست دولانيردي و خيياوان هميشه اولدوغو كيمي شولوغ ايدي. تئلئفون دككهسينده عيشوهلي بير قيز اوجا سسله دانيشيردي. ائله دانيشيردي كي، جاماعات باخين من بيريسي ايله دانيشيرام. توكلري يارييا قدر ماوي-ياشيل گوللو لئچكدن ائشيكده ايدي و دولو اندامينا تاريم چكيلميش دار مانتوسونون قوللاريني ديرسهيه كيمي چيرمالاميشدي. احد قيزين صندل باشماقلاريندان لاكلي آياق بارماقلاري و قيسا شالوارينين پاچاسينا قدَر ياريم آچيق بالديرلاريني نظردن كئچيردي. قالان حيصصهلري تكميللشديرمك چوخ چتين دئييلدي. اؤيرنجيليك دوستلارين موجرردي ائولرينده پورنو فيليمدن-زاددان گؤرسه ده، قيز جاماعات اونا هميشه ياساق اراضي حئسابلانيردي. احد اؤزونو آغير توتوردو. كيتاب-كاغيذ ايله مشغول اولوردو و اوولدن، لاپ اوولدن يعني اؤيرنجيليكدن قاباق و حتتا سونرالار، دفهلرله موساعيد مؤوقئعييتي اولسا دا، بو ياساقليغا توخونماميشدي. بو ياساقليق اونونلا دولانيردي، اونونلا گزيردي و اونون ايچينده ايدي.
احدجه بو ياساقليغي پوزماغا درين دويغولو، عاطيفهلي بير رابيطه يارانمالي ايدي. سحر ايسه اوشاق ايدي، اوزاق ايدي و احدين اوشاقليغي و وارليغينين بير حيصصهسي كيمي جينسييتسيز بير خاطيره ايدي. قوهوملاردا - قونشولاردا و دانيشگاه قيزلاريندا دا، بئله بير قابيلييت نه آختارميشدي و نه ده تاپميشدي. او احد ايدي و احد ده قالميشدي. يعني تك ايدي و هئچ بير اينسان بو احدليیي پوزا بيلميردي.
□□□
عسگرلييه گئتمهدن اؤنجه، ايكي هفتهني ائولرينده كئچيردي. آتاسي موصطافا، بالاشلي يئر-مولكونو ساتميشدي وتقاعودله كئچينيردي. هئچ واخت وضعلري پيس اولماميشدي، آمما موصطافا ائله داورانيردي كي، بئله وارلي-كارلي آدامين اوغلو بير عؤمور كاسيبليق حيسسي ايله بؤيوموشدو. ائوي قارا گؤتورسه ده، هر ياندا شؤوكت خانيمين ايزي-اثري قاليردي.
آخشام اوستو ايكي فرانسه ايستهكان چيخاريب:
ـ «چاي ايچيرسن اوغول؟»، سسلهميشدي.
گؤرونور ائوين هئچ نهيينه دَيمهميشدي. هر نه، آناسي واختي كيمي ايدي. فقط آناسي يوخودو. آناسيني قلب خستهليیي آپارميشدي. موصطافا ايله بير عؤمور ايختيلافلي ياشاماغينا گؤره، اؤلنده هامي «جاني قورتولدو» دئميشديلر. آنا اؤلومونو، ايستي يارانين سویودوقجا بللي اولان آغريسي كيمي چوخ گئج دوشونموشدو.
ـ «چاي ايچيرسن اوغول؟»
ـ «هه ايچيرم.»
گؤرونور كيشي دانيشماق ايستهييرميش. دانيشدي دا. بير تقاعوده چيخميش قوجا ژئنئرالين كئچيرديیي موحاريبهلريندن بحث ائتديي كيمي. اؤزوندن، چتينليكله بؤيودويوندن و شؤوكتدن. احدين آرالي گزمهسيندن گيلئيلندي ده. شؤوكتين اؤلومو قوجالتميشدي كيشيني. كؤورهلميشدي، يوموشانميشدي و داها آدامين يئريشينه، دوروشونا بند ائلهمهيه ذؤوقو-حالي قالماميشدي. بللي اولا،ن آرواديني عجاييب سئويرميش. شؤوكت اونون قلبينده بؤيوموشدو، يوكسلميشدي و احد بونو گؤردويو حؤرمتدن دويا بيلردي. آتاسيندان آجيغي گلميردي. يادينا گلندن آتاسيني ائله بئله، بير ژئنرال كيمي، بير سولطان هئيبتينده گؤرموشدو. اونو بير سولطان آتا كيمي اورهيينده ايستهميشدي ده. آمما اونونلا صميمي اولا بيلمهميشدي. ائودن آيريليب، ايستيقلال حيسسي دوياندان بري، داها سويو بو سولطانلا بير آرخا گئده بيلمهديیي بللي ايدي. او قاچيردي. بو ائودن، خاطيرهلريندن، اوشاقليغيندان و بوتون داوا- شاوالي گونلريندن قاچيردي.
ـ «نييه قويمادين آنام زكييهيه باش چكه؟»
ـ «زكييه؟ گرك قويايديم؟ دوز آرواد دئييلدي كي. بئناموسلوق ائلهميشدي اوغول ...»
احد داها دانيشمادي. آتاسينين ايللرله تربييه تاپميش موجاديله غريزهسيني اوياتماق ايستهميردي. چيسكينلي اوزاق بير پاييز گونونو خاطيرلادي. گيزليجه زكييهنين گؤروشونه گئتديكلري بير گونو. اورمونون پاييزلاري ائله بئله اولوردو. قيزيانا گوللو-بزكلي چتيريندن جاني قورتولموشدو و تزهجه آلديغي كيچيك قارا چتيريني باشينا آچيب، آسفالت اوزره كيچيك-كيچيك گؤل دوران سولاردا قارا چتيرين عكيزيني ايزلهييردي. سئوينيردي. آناسينين چتيري گوللو اولسا دا، عاييب دئييلدي. آخي او اوغلان دئييلدي كي.
دليخانادا، آناسي زكييهيه نه دئسه، زكييه سوسموشدو. ائلهبيل هئچ اونلا دانيشان ائلييهن يوخودو. آناسي بوراخماميشدي، باياتي اوخوموشدو، ماهني اوخوموشدو و زكييهنين گؤزلري ياشارميشدي. زكييه دوداقلاريني بير- بيرينه سيخميشدي، گؤزلري ياشارميشدي و بيردن نهسه يادينا دوشدويو كيمي چيمخيريب، شؤوكتين جانينا دوشموشدو. شؤوكتي دؤيموشدو، اوزونو جيرماقلاميشدي، آمما شؤوكت قاچيب ائلهمهميشدي. زكييهني كيپ قوجاقلاميشدي. دؤيولدوكجه، آرتيق اونو باغرينا باسميشدي و زكييه اووونونجا، چابالاسا دا، نهايت باشيني شؤوكتين چيينينه قويموشدو. اووونموشدو. احد قورخموشدو، چيغيرميشدي و آخيرا قدَر آغلاميشدي.
قاييداندا، شؤوكتين گوللو چتيري آلتدا گئديردي. قارا چتيري ايتيرميشدي.
□□□
مئترو ايشيني يوسوف تاپميشدي. اوچ- دؤرد آي بوندان قاباق. احد شهري الك- ولك ائديب، آياقدان دوشوب، اوتاقدا اوزانيب، آياقلاريني پنجرهنين گونآلان رفينه داياميشدي.
ـ «آمما بير ايش ده وار»، يوسوف بونو دئيه كيتابلاريني اللشديرميشدي.
ـ «نه ايش؟»
ـ «فيكر ائلهميرم بَيهنهسن.»
ـ «نييه بَيهنميييم؟»
ـ «آخي سن ليسانسسان. ائله بو خارابادا ...»
ـ «سئفئح دانيشما دئ گؤروم نه ايش؟»
ـ «نظافت ايشي، مئترو نظافتچيلييي.»
احد دينمهميشدي و پنجرهدن گؤيده اوچان گؤيرچينلري نظردن كئچيرميشدي.
ـ «دئمهديم؟»
ـ «نييه اؤزون گئتميرسن؟»
ـ «من؟...»
دينمهميشدي. جاوابي بللي ايدي. ايستيخدام خئيرندن كئچميشدي و تاكسي ايشلهديردي. اوچ آي حبس چكندن سونرا، دانيشگاهدان تسويه آلماقدا اينجيتميشديلر بيلهسيني. نئچه آي بوش- بوشونا دولانيب، نهايت ديپلم مدركي ايله عسگرلييه گئتميشدي. احد اونو تبريز پاديگانيندا تاپاندا، آرتيق بير سرجوخه ايدي و كئشيك چكيردي. اوجا بوي و ايدمانچي اندامي وار ايدي.
ـ «سن يوسوف نصيري دئييلسن؟»
ـ «يوسوف نصيرييم جناب سروان.»
ـ «مني تانيمادين؟»
ـ «خئيير جناب سروان.»
ـ «78-ده، تير آيي... گئجهسي «آيريليق آيريليق» اوخويوردون.»
يوسوف ساكيت يئره باخميشدي.
ـ «يادييان گلمير؟»
ـ «هه! جناب سروان ياديمدا آمما سيزي تانيماديم.»
ـ «من ده ائله اورادايديم، سنه قولاق آسيرديم. سن تانيماسان دا، من تانيييرام.»
احد بير وظيفه افسر اولسا دا، باجارديغي قدَر يوسوفو حيمايه آلتينا آلميشدي. يوسوفون داييسي «حاجي سئيف»ـي موحاريبه ايللرينده جبهه سابيقهسي اولدوغونا گؤره، سؤزو كئچرلي بير آدام ايدي. اونا- بونا اوز ساليب، نه كؤكده يوسوفون مدركيني قورتارميشدي. يوسوفون مدركي پروندهسينه گيريب، درجهسي تطبيق اولانا كيمي عسگرلييين سون گونلري ايدي. يوسوف درجهلريني بير ظفر ميدالي كيمي چييينلرينه تاخيب بير گون پاديگاندا دولانميشدي.
عسگرليكدن سويوناندا، آرتيق صميمي قارداش كيمي دوستلاشميشديلار و مئتروداكي بو ايشي ده، حاجي سئيفي يوسوفون اوز سالماسينا گؤره تاپميشدي.
يايين آخير آيي ايدي.
حاجي سئيفي: ـ «سوروشسالار دئه كي، ساوادسيزام. سيكل زادام دئيهرسن.»، دئميشدي.
احد ائله دئميشدي و همان گوندن «صباي سبز» شيركتينده قراردادي اولاراق، ايشه گؤتورولموشدو. «صباي سبز»ـين مودورو دئميشدي:
ـ «صاباحدان ايش باشينا گل! دئمهيهسن مئترودا ايشلهديم قورتولدو ها! شيركت شهرده مين بير يئرين ايشيني گؤتورور. هارا مصلحت بيلسه، اورا گؤندرهجك. هلهليك مئترودا اولارسان. قرارداديني دا، ائله صاباحا يازيرام، بيليرسن دا، معمولن نئچه آي ايشلرلر، بَيهنسهك قرارداد يازاريق. آمما دا نئيلهمك، حاجي سئيفي تاپشيريب سني. صاباح آيين نئچهسيدي؟»
ـ «اون ايكيسيدي جناب!»
ـ «ياخشي گئت! تاپشيرميشام دئيهلر نئيلهيهجكسن.»
و او گون احد آستا-آستا ياواشلايان ياغيش آلتدا، اوچ آي دوققوزونجو گون اولاراق، ايش باشينا گئديردي.
□□□
(قالانی وار ...)
[ به عنوان شهروندی ایرانی که ادبیات تنها دلمشغولیش میباشد، همواره به این جمله کافکا اندیشیده ام که روزی گفته بود: "من فقط ادبیاتم!..." در قالب یک وبلاگ آنهم در حوزه ادبیات داستانی، "مین بیر گئجه" پیش روی شماست. ]