یئکه بیر داش کیمی

 

شریف مردی

 ۱.

هاوا ترتمیز تورپاق اییسی وئریردی. یاغیش دونن گئجه یاغمیشدی بلکه ده. ائرته­دن دوروب، گون­چیخان ماجالی بوردایدی. یولا دوشدو بالتا الینده. اونا گووه­نه­جک شئی یالنیز بالتاسی ایدی. یورغونلوغونو آلیردی اونون ایتی اوجونه باخاندا. بالتانین تییه­سینه توپوروب الییله اونو اوخشادی. قاش­لارینی آتدی بیر ایکی دفعه. بالتانی گونشه ساری توتوب باخدی. گؤزلری پاریلدادی. الینی یانینا چکیب، یورومه­یه باشلادی. اونو برک برک الینده ساخلایاندا آددیمینی دا برک آتیردی.

بیر کیلومئتیرلیک یول وار ایدی آغاجلیغا. اوزاقدان گؤروکوردوسه ده، ایچی قاپ قارانلیق ایدی آنجاق. تاخما شام­لارا بنزه­ییردیلر. بیر بیرینه دولاشیق اوزون اوزون اوت­لارین آراسیندان کئچیب، بالتانی قاباغینا، یان­یؤره­سینه وورا وورا یول آچیردی اؤزونه. ایمکانی اولان هر بیر یئرده بیتمیشدیلر اوت­لار؛ داش­لارین اوستونده، آلتیندا. دیزلَرینه­جن ایسلانمیشدی شالواری. ایکی یئرده تمئشک کول­لارینا توشلاندی. بیر بیرینه پیرتلاشمیش تیکانلی بوداق­لار، آلینماز بیر قالا کیمی کسمیشدی اؤنونو. هره­سینه بیر بالتا یاتیردیب، بری یاندان کئچدی. بیر یول قولونو جیزمیشدی دیرسه­یه­جن بو تمئشک­لر. اوتوردو. شالوارینا ایلیشدییی بیر توپا تیکانی آییردی اؤرزوندن.  اوت­لارین اوستونه دیرماشان قورداق­لار یئل اسدیک­جه داها دا کئیف ائله­ییردیلر اونون گؤزونده. دوروب، اوزون اوزادی باخدی. هردن ایسه بارماغییلا بیر چیرتما ووروب گؤیه توللاییردی بیرینی. قورداغین گؤیده فیرلانماسینا دالیب، تمیز هاوادان درین درین نفس آلاراق، یولونو داوام ائتدی. یوموشاجیق تورپاق باشماق­لارینا یاپیشسا دا، قوپوردو اؤز اؤزونه آنجاق. هردن­سه بالتانین یانییلا تورپاغی قوپاریردی آیاق­قابیسیندان.

هر ندن گؤز­ل دامجی­لارین چیله­ییشی ایدی اوت­لارین اوستوندن. ووردوق­جا بالتانی، اله­نیردیلر، پیریل پیریل. کؤینه­یی­ قول­لاری­نین ایسلاندیغیندان، داها چیرماماغین فایداسی یوخ ایدی. بیر هوندور چکیرتکه اوچموشدو، بالتانی ائندیردییی یئردن. توپوروب باخدی. اوشاق­لارلا توپورجک یاریشیندا اودماغینی خاطیرلادی. دؤرد قات بینانین اوستوندن توپورمک موسابیقه­سی قویموشدولار. گولدو. تله­سمیردی. ـ «هئچ اولماسا بیرینی توتاجام»، اؤز اؤزونه دئییب بؤرکونو باشینا قویدو، گولومسوندو. هئچ زاددان واز کئچمیر. اوتوروب هوندور بیتکی­لرین آیاغیندا اوتانقاج اوتانقاج دیرچه­لن نارین بیر بیتکی­نین تومورجوقلانماسینا دالیردی.

یاریم ساعات چکمیشدی، بیر کیلومئترلیک بو یول. آغاجلیغا یئتمیشدی. شام آغاج­لاری بیربیرینه گیریشیب، آرالاریندا تمئشک کول­لاری بیتمیش، آیری آیری اوزون اوت­لار دا وار ایدی. ـ «یول وئره­یدی کاش!»، یئره دایادی بالتاسینی. اوزاقدان قارانلیق گؤرونن بورالار، آیدینلاشمیشدی ایندی. یولونو کسمه­مه­لی ایدی بونلار. بیر او قدَر چکمز بونلاردان اؤتمک.

بوداق­لارین آراسیندان اَییله اَییله گئدیر، یول آراییردی. الینه توتدو آرخا چانتاسینی. پتویا بوکدویو بالتانی دا قوجاغیندا ساخلادی. کؤینه­یی ایکی یول نم­هاراسا ایلیشیب دایاندیردی اونو. بالتاسییلا گؤزونون قاباغینی آلان اَییلمیش بوداق­لاری قالدیریردی اؤنوندن. زورا دوشموشدو؛ قالدیردیغی بوداق­لاری بوراخسایدی،  گؤزونو چیخارتمیشدی حتمن.

تاخما شام مومالاری دیرچه­لمیشدیسه ایندییه­جن، بوی آتماغا نه یئر واردی، نه ده گونش ایشیغی. اؤلولر اورمانینا بنزه­ییردی بورا. تورپاغی قوپ­قورو گونش­سیز بیر تورپاق­دیر. آشاغیدا اولان بوداق­لارین ایینه ایینه یارپاق­لاری، رنگ­لرینی دَییشمیش، قووورا چالیردی هامیسی. دوروب قیشقیردی. اورمانچی­لاری سؤیدوسه ده، کیمسه ائشیتمه­دی آنجاق. آغیز دولوسو توپوروب یئریمه­یه باشلادی یئنه. هریان سوسقون ایدی.

بو مومالار اکیلمه­لی­یدی بورالارا، تورپاغی قوروماق اوچون. اورمانچی­لارین موتورونا گؤره، اوزون مال یولاغی وار ایدی بورادا. تپه­نی دولاشیب یوخاری گئدیردی بو یول­لار. ناریندان قیوریلیب یوخاری گئدن بو چالالی چامورلو یولاغا دا آجیییردی ایچدن. پالچیغا باتیب باشماغی­نین زیغا بلَنمه­سی، آرتیق اینجیتمیشدی اونو. بیر بالتا یاتیردی، اوزونه دَین بوداق­لارین بیرینه. بوداق­سا اینجه سس­له سینیب  باتمیشدی پالچیغا. سویوموشدو بیر آز اوره­یی.

یالنیز بورانین سرین­لییی ایدی، اونا دایانمادان دیرماشماغا گوج وئرن. هر نه دورغون، یئل ده اسمیردیسه، سپ­سرین ایدی آنجاق بورالار.

اوزاقدان موتور سسی ائشیتدی. اوتوروب یورغونلوغونو آلدی یولاق­لارین بیرینده. هئچ ده بللی دئییلدی بوشقو موتورونون سسی اولدوغونو، یوخسا اورمان­چی­لار میندییی موتورون گورولتوسو. گئت­گئده سسین یاخینلاشدیغیندان اورمانچی­لاردان اولماغینی سئزدی. دینله­دیکجه، خوشلانیردی بو سوسقونلوغون اورتاسیندا گورولده­ین بو سسدن.

یاخینلاشیب ساخلادی موتورو. بیر سؤز دئمه­دن بیربیرینه دیکیلدی گؤزلری. گؤزو چیینینده­کی بالتایا ساتاشدی اورمانچی­نین:

ـ «نه یامان ساپی وار بونون. گومان اؤزو ده اله ­یاتیملی اولا هه... »

بایاقدان بری یئرینده­جه اوتوروب اونونلا بالتاسینا باخان اورمانچی­نین تعریفله­مه­سینی بَیه­ندی. اورمانچی­یا ساری اوزاتدی بالتانی:

ـ «هه... بس نه... بیر باخ... »

اورمانچی بالتانی الینه آلیب، اوخشادی تییه­سینی. سونرا، آغیز دولوسو توپوروب آیاغینی باسدی کؤپوکلو توپورجه­یینه.

او اورمانچینی باشدان آیاغا سوزه سوزه، توپورمک گؤیلوندن کئچسه ده، توپورمه­دی آنجاق. بالتاسی­نین تئز قایتاریلماسینی ایسته­دی. چوخ دا تئز اورمانچی­نین تعریف­لری داریخدیریدی اونو. بالتانی الینه آلیب، تییه­سینی اوخشاماق ایسته­دی. گوپبولتوده ایدی اوره­یی.

اورمانچی:

ـ «ساتیرسان؟»

ـ «نه­مه­نه؟!»

قاش­لاری دویونله­نیب، اورمانچی­یا ساری اَییلدی.

اورمانچی بیر ده ـ «ساتیرسان بونو؟» دئییب، بالتانی هاوادا اویناتدی.

ـ «وئر منه گؤروم... ساتیرسان! ساتیرسان! ...»

بالتانی توتوب اؤزونه ساری چکدی. اورمانچی بیر لحظه اونو بوراخمادیغیندان، اوز اوزه دایاندیلار. آیاغی یئریندن جایدی. آلنی قیریشلا دولموش، باخیشیندان ایسه اود یاغیردی. اورمانچی­ گولوردو آنجاق. بالتانی یئنه بوراخمادی. او هیرسلَنه­رک، الینی قاهاریب بیردن چکدی. بالتا ایندی الینده ایدی. دینجه­لدی. بالتاسینا باخیب گولومسوندو ده. الی­نین ایچی، سونرا ایسه بدنی­نین هر یئرینی تر باسدی. یئل اسدی کوره­یینده ائله بیل. قولو تیتره­دی. هیرسیندن اوره­یی سیخیلیر، نفسینی تئز تئز آلیب، هاواسیزلیقدان­سا بوغولوردو. اورمانچی­یا باخدی. اونا زیللندیی حالدا، گولومسونوردو هله. قولونون قالخیب ائندییینده، ایستی قان فیشقیردی اوزونه.

اورمانچی خیریلدایا خیریلدایا، یئره اوزاندی. سوم دوروب باخیر، قوروموشدو یئرینده­جه. چابالاییب تئز ده جانی چیخدی اورمانچی­نین. موتور سسی دویدوغوندان، دیک آتیلدی یئریندن. هاچاندان هاچانا ائله اورمانچی­نین موتورونون سسی­ اولدوغو یادینا دوشدو. دینجه­لدی. اوتوروب قاباغینداکی جسده باخدی. بوینو قاهاریلمیش چیینینده­ ایدی اؤلونون. چتین­لیک­له اودغونا بیلدی. قوپ قورویدو آغزی، زهَر آشیردی بوغازیندان. الی­نین آرخاسینی دوداغینا چکیب حیئرانلیقلا باخیردی اورمانچی­یا.

هئچ بیر زاد گلمیردی عاغلینا. اؤنجه باسدیرماق ایسته­دی جسدی. سونرا واز کئچیب، بو فیکیر هر مایماغین عاغلینا گلن فیکیردیردئیه دوشوندو. یورغون ایدی، چوخ یورغون. اوزانیب شیپ دوشدو یئره. سویوق تر آخیردی آلنیندان. سویوق یاییلدی بوتون جانینا. گؤی اوزونون چیرکین بیر ماوی­لییه بوروندویو سیخیردی قلبینی. اوسته بیرجه بولود یوخ ایدی آنجاق. باشینی دؤندَریب بیر ده اورمانچی­یا باخدی. اویوموشدور مصوم­جاسینا. اونون یئرینه اولایدی کاش. ایکی ائششک­آریسی قان قوخوسونو دویوب هاوادا ویزیلداییردی. اونلارین ویزیلتیسی دوشوردو بئینینه. ائششک­آریسی اولماق دا کئچدی ذهنیندن. نه بخته­ورمیش­لر بو بؤجوک­لر!

گؤزلری اؤز اؤزونه قاپانیردیسا دا، یاتماق ایسته­میردی آنجاق. بلکه بیری گلیب بونلاری گؤردو بو وضعده. اوندا نه ائتمه­لی؟ بیر اؤلو، بیر بو، بیر ده قانلی بیر بالتا! گؤز گزدیردی. بالتاسی­نین تییه­سی اوستونده قان لپه­لرینی سئزدی. دوداغی قاچدی. اوره­یینده ـ "بالتانین نه گوناهی وار"، دئییب آلتیندا اوزاندیغی آغاجا باخدی. یئرین سرینلییی بؤیرونو اوشودوردوسه، دَبرمه­دی یئریندن. گؤز قاپاق­لاری آغیرلیق ائده­رکن، یاتیب اویانیب بونلارین دوغرو اولمادیغینی آرزولادی. یوخولاریندا گؤردویو گؤرونتولری خاطیرلادی. بعضن شالوارینی ایسلاتمادان، دویونجاق کئف ائله­ییردی یوخولاریندا. بعضن­سه جومجولوق سو اولوردو گؤردوک­لرینه گؤره. بئله اولاندا، یویونمالی اولوردو تر قوخوسونون الیندن. سون دفعه گؤردویو یوخودان بری، هله یویونمامیشدی او.

یئکه بیر داش کیمی یئره اوزاندیغینی دویدو. هاردانسا قولتوق قوخوسو گلدی. دوداق­لارینی بوزوب گؤزونو یومدو.

 

۲.

او ایندی قولتوق قوخوسویدو. اوچوب هر یئره یاییلیر، چوخ دا خوشلانیردی بوندان. گؤزل گؤزل قیزلار، قادین­لار... هامیسینی گؤروب اوتوروردو بؤیورلرینده. اونلارین دری­لری اوستونده ایله­شیب دامارلارینداکی قانین ایستیلییینی ده دویا بیلیردی. سونرا هاوایا قاییدیب اوزاق­لارا گئدیردی. یئل اسیردی. یئل ایله اسیب باش چکیردی هر یانا. سئودییی هر بیر شئیه چئوریله بیلدییینی دوشوندو. گوله بیلدی یوخودا.

گؤی­لری دولانماق ایسته­دی. ایندی یومورو بیر بولود اولموشدو. بوتون دونیانی بیر یئرده گؤرور، هر یؤنه ایسته­دییی آن دؤنوب گئدیردی. الینده­یدی دونیا. بونونلا دا توختاماییب، زامان اولماق ایسته­دی. بیر آن ایچینده، کئچمیشه، صوبح ائرته­دن دوروب مئشه­یه چیخدیغی زامانا قاییتدی. مئشه­نین ایچی آنجاق دولویدو یئکه یئکه ائششک­چیبین­لرییله.

یوخودا اونلارا فیکیرلشدی. ندنسه ویزیلتی­لاریندان خوشلانیردی ایندی. ائششک­چیبینی اولوب، یئره دوشموش بیر بالتانین اوزونده­کی قان لپه­لری اوستونه قوندو.

 

۳.

گؤزونو آچماییب، یئنه ده یوخودا اولماق ایسته­ییردی. سویوق کئییتمیشدی بوتون گؤوده­سینی. گؤزونو آچیب، یان­یؤره­سینه باخدی. هر یئر آلاجا قارانلیغا بورونموش، هر یان ایسه سس­سیز ایدی. آج­ ایدی. ترپنمک ایسته­دییینده، کئییمیش قول­لاری سیزیلدادی قان­سیزلیقدان. وئجینه آلمادی. آرخا چانتاسینی چکیب جیبیندن بیر حبه قند گؤتوردو. زهَر کیمی آجی ا­یدی. اونو سوروب، سون ذره­لرینی توپوردو یئره. قنده بولاشیق توپورجه­یی ساری­یا چالیردی. زهله­سی گئتدی بوتون قندلردن. الی­نین دالییلا آغزینی سیلیب، یانینا سورتدو. قندین زهمینه آزجا قوووتله­نیب اوتوردو. گؤز گزدیردی او یان، بو یانا. بوتون اولای­لاری خاطیرلادی بیر بیر. یئریمه­یه هئیی یوخ ایدی. آزجا یئمیش وار ایدی چانتاسیندا. اونلاری یئیه یئیه یوخوسو یادینا دوشدو. یئمیش اولماق دا کئچدی بئینیندن. دوداغی قاچدی. اورمانچی­یا دوغرو باخیر، دؤشوروردو بیر بیر یئمیش­لری. گؤزو یئنه بالتاسینا ساتاشدی. قالخیب اونو گؤتوردو. دایاندیغی یئردن جسده باخدی گؤز آلتی.

وار گوجویله یئره گوپه­دی بالتانی. ایکی اوچ سئری بو ایشی گؤرندن سونرا، قان لکه­لرینی سیلدی تییه­سیندن. ایتی باخیشلا اورمانچی­نین جسدینه باخدی.

ـ «پوخ یئدون هیرسله­ندیردون منی!...»

آرخا چانتاسینی بئلینه باغلاییب اوزاقلاشدی اوردان. زیل قارانلیغا دوغرو یورویوردو، چیینینده ایسه آتیلیب دوشوردو بالتاسی.