مین بیر گئجه: ایندی­یه کیمی اونو گؤرمه­سم ده، اونونلا ادبی دوستلوغوما گئرچکدن اؤیونورم. بونا گؤره ده، هر ندن آرتیق اؤز سایغی­لاریمی اینترنت دوشَرگه­سینه بَسله­مه­لی­یم! شریف مردی­نین بیزیمله پایلاشان سون اؤیکوسونو بیرلیکده اوخویوروق:

***

 

...

شریف مردی

 

گؤزونو آچاندا دیوارا باخدی. نئچه آن ائله­جه باخیب دؤندو. اوتوردو. توک­لری بیر بیرینه قاریشمیشدی. الینی آلنینا چکیب سیقار پاکاتینی میز اوستوندن گؤتوردو. بوش ایدی. اونو بوکده­له­ییب بیر قیراغا آتدی. اوزانیب تاوانا دونوخدو. دوراندا، آیاغی میزین قیراغینا توخوندو. آخسایا آخسایا پنجره­یه یاخینلاشیب پرده­نین اوجونو قالدیردی. گون گؤزونو قاماشدیردی. پرده­نی سالیب تاخچادان سیقار پاکاتینی گؤتوردو.

اوچونجو سیقاری دا تووالتده یاندیریب سیفونو چکدی. گوزگونون اؤنونده سیقارین توستوسونه باخدی. سیقارین کؤتویونو صابین یئرینه باسیب، اوستونه ساری بیر توپورجک ده بوراخدی. دوداغینی سیلیب الینی یانینا سورتدو. گوزگوده گؤزونه باخیب قارتماق­لارینی سیلدی. بارماق­لاری­نین اوجونو سویون قاباغینا توتوب کؤینه­یینه سیلدی. گوزگو قاباغینداکی لیوانی سویون آلتینا توتدو.

سو جالانیردی. الینی لیوانین آغزینا قویدو. تووالتدن چیخیب بزک گوزگوسونون قاباغیندا اوتوردو. بارماغینی گؤزونون آلتینا چکیب، سودان بیر قورتوم ایچدی. سیقارین توستوسونو چؤله وئرمه­دی. اَییلیب خالچا قیراغینداکی قورص­لاردان بیرینی گؤتوردو. حبی چیخارداندا الی اسیردی. سیقار دا یاواش یاواش بارماق­لاری آراسیندا قورتاریردی. گؤزونو یومدو. دوداغی گولومسه­ین کیمی ترپندی. لیوانی قالدیریب بیر قورتوم سودان ایچدی.

پاکاتی اوینادیب ایچیندن بیر گیله چیخارتدی. سیقار دوداغی آراسیندا، گوزگویه ساری اَییلدی. سیقارین اوجو گوزگویه توخونوردو. فندک گوزگونون شیشه­سینی قارالتدی. توستونو گوزگویه پیله­دی. صندلی ایله فیرلانیب، گوزگویه باخا باخا توستونو اؤنونه پیله­دی.

صندلینی ساخلادی. گوزگوده الی اسدی. تله­سیک­جه بیر حب چیخاریب آغزینا آتدی. قاباغینداکی بزک­دوزَک وساییلینه باخدی. یئنه بیر قورتوم سو ایچدی. دوداق بویاسینی گؤتوروب الی اسه اسه دوداغینا یاخدی. دوداق خطینی گؤتوروب، گوزگویه باخدی. صندلیدن دوروب بیر آز اؤزونه یاخینلاشدی. دوداق­لارینی بیربیرینه سورته­له­یب، میدادی یئرینه قویدو. گؤزلرینی الی­نین ایچییله سیخدی. سیقار گوزگونون ایچینده قوتاریردی. لیوانی گؤتورب سیقارین اوستونه قویدو. دؤنوب قاپی­یا باخدی. پنجره قیراغینا گئتدی. پرده­نی قالدیردی. گؤزو قاماشدی. صندلی­سینه ساری، دالدالی قاییتدی. الینی آیاق­لارینا چکدی. تووالئته ساری یورودو.

دالبادال سیفونو چکدی. تووالت کاغیذییله دوداغینی سیلدی. بویالی سیقاری قویویا آتدی. آیری بیر سیقار آلیشدیریب، تووالتدن چیخدی. بزک گوزگوسونون قاباغیندا دایانیب، سیقار چکمه­یینه باخدی.

قورص­لاردان بیرینی ده چیخارتدی. یاتاق بؤیرونده­کی میزه باخیب یانیندان کئچدی. اوزانیب حبی آغزینا آپاردی. توستونو تاوانا پیله­دی. دیوارا ساری دؤنوب گؤزونو یومدو.