مین بیر گئجه

شمس دَرنه­یی و ادبی اوتوروم­لاری (۲) 

مین بیر گئجه: تبریزده کئچیریلن شمس دَرنه­یی­نین ایکینجی اوتوروموندا، سایین حامد احمدی­نین "منی قالدیرین لوطفن" باشلیقلی اؤیکوسو اوخونوشا قویولدو. آشاغیداکی متن، عئینن شمس درنه­یی­نین اؤزل وئبلاقیندان گؤتورولموشدور (http://shamsngo.blogfa.com/). حیکایه­نین اؤزونو اوخوماق اوچون، مین بیر گئجه­نین "بیزیم اؤیکو 17" باشلیغینی تیکله­یه بیلرسیز (http://1001gece.blogfa.com/post-55.aspx).

شمس درنه­یی­نین سایین اؤیه­لرینه یورولمایاسیز دئیه­رک، ـ بیر ده، بئله کیمی ادبی اوتوروم­لارین او بیری شهرلریمیزده ده کئچیریله­جک آرزوسویلا ـ ، دَرنکده گئدن دانیشیق­لارین اؤزَتینی (خولاصه­سینی) بیرلیکده اوخویوروق:

                                                      ***

شمس: بو هفته­کی اوتوروموموزدا، سایین حامد احمدی­نین  "منی قالدیرین لوطفن" آدلی اؤیکوسونو اوخویوب اَلشدیره­جه­ییک (تنقید ائده­جه­ییک). بو گونکو اوتوروموموزون دَییشیک یانی، یازیچی­نین اؤزونون ده بوردا اولماسی­دیر. مین بیر اؤیکو یاریشماسی­نین بیرینجیسی اولان بو اؤیکونو، بیر آی یاریم اؤنجه بیر دؤنه بیرلیکده اوخودوقسا دا، آنجاق یایدیغیمیز کیتابچادا اؤیکونون آلین یازیسی­نین چاپدا دوشمه­مه­سی، ها بئله حامد بَی­ین بیلیم­ یوردونو بیتیریب تبریزه قاییتماسی، اؤیکونو بیر داها اوخومامیزا باهانا اولدو. من یولداش­لاردان ایسته­ییریم حامد بَیدن چکینمه­دن اؤز دوشونجه­لرینی سؤیله­سین­لر...  

یاسر ارتشی (میرزآغا): سهند بی! سؤزو من باشلاماق ایستیرم. من بو اؤیکو حاققیندا بیر پارا باشلیقلار حاضیرلامیشام، کئچن دانیشیغیمیزدا نشاط خانیم دئییردی  "من اولسایدیم بو اؤیکونون ایلک پاراگرافینی یازمازدیم"  ایلک پاراگرافدا یازیچی اوخوجونون بئینینه بیر سیرا سورولار یاغدیریر.  "گئجه یدی، قاچیردیم"  دئییر. هله گئجه سؤزونون داشیدیغی آنلام یوخسا یاراتدیغی دوروم حاقیندا دانیشمیرام. نه یه قاچیر؟ هارا قاچیر؟ ندن ییخیلدی؟ عاغلیمیزا گلن ایلک سورولاردیر. نه یه قاچیر سوروسونو یازیچی یادیما گلیر شاعیریدیم، شعر یازاردیم، شعرلریمه گؤره ده منی آختاریردیلار بیرآز آچیقلیر. هارا گئتدییی نی، نه یه ییخیلدیغینی  "دوشونمه­ییردیم­"  دئییر. هامیدان دا سوروشماماقلارینی هابئله اوستونو وورماماقلارینی ایستیر. بوندان دا واز گئچرک کی یازیچی ائله ایسته ییب، ایندی سؤز بودور کی بوتون سیمگه لر بو اینسانین جانلیلیغین گؤستریر . نفس چکیر، گؤزلری ایشیغا جاواب وئریر آنجاق بو اینسان تام بیر اؤلو کیمی داورانیر یئره یاپیشیب ترپنمه ییر، دینمه ییر. ها قیشقیریر، ملّت بونو ائشیتمیر. منجه یازیچی ایستیر دئسین کی نه بو قاچماق دوغرو قاچماقدیر، نه ییخیلماغی دوغرو ییخیلماقدیر. منجه بیز سیمگه لی بیر اؤیکویله اوزبه اوزوک اونون اوچون ده هر سؤزون اؤزوندن ساوایی نه یین سیمگه سی اولدوغونو دا گؤزده توتمالی ییق. اؤرنک اولاراق  " الین دریسی سویولوب  "  دئدییی نده یازیچی نه دئمک ایستیر؟ یازیچی قاچماق ندنینی ده بو سیمگه لرله بیرآز (بیر پاراگرافدان بیله آز) آچیقلاییر. او دوشونجه لی اینسان سیمگه سی اولاراق اؤزونو شاعیر کیمی تانیتدیریب شعر یازاردیم دئییر اؤنملی دئییل ده کی حتمن شعر یازا. بو دوشونجه لی اینسانلارین توپلومدا دورومونو گؤستریر. دوشونن اینسانلارین بو توپلوملا سورونلاری وار، اونا گؤره ده قاچیرلار. توپلومون سیخینتیلارین گؤستریر. کیمسه بیلمیر نه ائده جک. گؤرولر بللی دئییل. بیرده سونوندا گؤستریر کی آنلاییشین دوستاغی اولماز. بو اینسان دوزدور ییخیلیب، قالدیریلماسی ایچین یاردیم ایستیر، آدی قارا لیسته کئچیر آنجاق سونوندا قالخیب یئردن گؤیه ساری یوللانیب اوزون لایه سینی بیله کئچیر. آیریجا توریستلرین آدی گلن بؤلومدن من بئله آلیرام کی دوشونجه لی اینسانلارین سیخینتیلاری اولوسلار آراسی بیر سوروندور. بو اینسانلار اؤز توپلوملاری ساریندان آنلاشیلمیرلار. آز-چوخ هر یئرده ، هر میلتده بو دانیشیقلار وار. بو اینسانلار اؤز توپلوملاریندا یاشایارلار، یازارلار، یارادارلار، قاچارلار، ییخیلارلار، اؤلمیینجه ده بونلاری قالدیران اولماز.  

سلیمان جعفری: میرزآغا سؤزلره ساتاشمیر آنجاق منیم سؤزلرله ایشیم وار. بو سؤزلر آداما گؤزل بیر دویغو وئریر. پارادوکسلار یارادیر. (هر یئریم سو اولدو، قیزیشدیم)،(ییخیلمیشدیم، اوچماق حسسیم واریدی) بئله پارادوکسلاری حامد بی بیلرک یئرلشدیریب. نه یه قاچدیغیمی سوروشما دئییر آما من بیلیرم سن نه یه قاچیردین. تئز یئتیشمک یا اوزاقلاشماقدان ساوایی قاچماغین ندنی یوخدور، اوزاقلاشماقدا گوونیلیر بیر یئره یئتیشمک ایچیندیر. یازیچی منی شعرلریمه گؤره آختاریردیلار دئدییی نده بیر ایپ-اوجو وئریر آنجاق بلکه ده بیزی جایدیرماق ایسته ییر. بو دا پارادوکسلاردان یارانمیش بیر دویغودور. من بو اؤیکونون باش رولونو بیر شاعیر گؤرورم. توپلومدان اونون قالدیرماغینی گؤزله ین بیر شاعیر.  

آتیلا سلمانی: ندن گئجه قاچیردی؟ توتولماق قورخوسوندان می؟ 

حامد احمدی: بیلمیرم. بلکه ده گوندوز اولسایدی دا هئچ نه دییشمه یه یدی. گئجه اولماسی ایکینجی-اوچونجو ائدیتدن سونرا آرتیریلیب. آنجاق قاچما تئمی گئجه داها گؤزل اولور.  

سهند نظمی: اؤیکونون باشلانیشی گئجه سیمگه سی ایله دیر. بو یوزه-یوز گئجه اولمالی ایدی. گئجه سئچیلمیش سؤزدور. اؤیکونون باشا باشینا دا اویور. اؤیکونو گؤزدن کئچیرتسک بو آدام هئچ یئرده آیدین آشکار بیر ایش گؤره بیلمیر.  

سلیمان جعفری: بیر پارا سؤزلر اؤزلریله بیر فضا داشیییرلار. گئجه یا پولیس کیمی سؤزلر منی بئله ایناندیریر کی بو آدام گوندوز قاچا بیلمز ایدی. 

نشاط شیخ الاسلامی: بوردا ییخیلماق اولایی گئجه باش وئریر، اؤیکونون سونوندا گؤیه گئتمک ده گئجه ده دیر. بو ایکی اولایین آراسیندا باش وئرن ایشلرین هامیسی سا هالوژئن ایشیقلاریندا اوز وئریر بو دا منجه چوخ گؤزل بیر دویغو داشیییر.  

سهند نظمی: دانیشماق ایسته دیی یم بیرده اؤلوم-دیریم مسئله سیدیر. بونو گؤرن هرکس سوروشور اؤلوبدورمو؟ دیریلییین سیمگه سینی ده نه گؤرورلر؟ تکجه نفس چکمک. بو دا توپلومون تانینماسیندا بیزه کؤمکلیک ائدیر.  

سلیمان جعفری: بیزیم قارشیلاشدیغیمیز توپلوم گیج بیر توپلومدور. او قدر کی اورژانس یا پولیسین گؤرولرینی تانیمیر. دئییر اورژانسا زنگ آچساق گلر سالار بیزیم باشیمیزا. اورژانسین ایشی قورتارماقدیر یوخسا سوچلاماق؟ بیلمیر. آتش نشانینی نه زامان چاغیرمالیدیرلار بیلمیرلر. بئله بیر توپلومدا دیریلیک سیمگه سی نفس چکمکدن ساوایی هئچ نه اولماز. بیر ده باشقا آچیدان باخساق بو آدام نفس چکمه سه یدی توپلوم او زنگلری ده وورمازدی نییه کی بو آدام بیتمیشدیر. نفس چکمک اینسانلیغین دَیری دیر. 

سهند نظمی: یازیچی اؤزوده بونو بیلمیر. اؤلموشدوم مو؟ یوخسا اؤلمکدیدیم؟ اؤلو کیمی بیر زاد ایدیم دئییر. 

سلیمان جعفری: بوردا اؤلومو دوغال گؤرمورم. بو بیر شاعیرین اؤلومودور. بیر شاعیرین اؤلومو نه اولا بیلر، شعرلری نین آرادان گئتمه سی یا دا الینده قالماسیندان باشقا. اؤزو ده ائله بیر شاعیر کی یاشاییشینی بو یولدا قویوب. آدی قارا لیسته کئچیب. 

سمانه پیری: منه آیدین اولمایان بیر قونو وار. یازیچی بیزدن ایسته ییر ندن قاچدیغینی سوروشمایاق آنجاق بیر یئرده ده دئییر ندن قاچدیغیمی اونوتموشدوم. گونلر کئچیر آیلار کئچیر، دئییر یادیما بیرزادلار گلیردی آنجاق اونلاری بیر-بیرینه دویونله ینمیردیم. بوردا آنورمال بیر دوروم وار. بو آدامین حافیظه سی سیلینیبمی؟ شاعیرلییی نئجه اولا بیلر کی یادینا گلمه سین.  

یاسر ارتشی (میرزآغا): بونون یاشاییشی نین ان اؤنملی بؤلومو شعر یازماقدیر. اوندان ساوایی هئچ نه گؤستریلمیر. 

سلیمان جعفری: ائله دیر، ییخیلانین آتا-آناسی یوخسا اوشاقلاری یا خانیمینا اؤیکوده یئر وئریلمه ییبدیر. حال بو کی نورمالدا ایلک ایش اونون ائوینه خبر وئرمک اولمالی ایدی. ائله اونا گؤره ده نه بو ییخیلماق یا اؤلوم عادی اؤلومدور نه ده قالدیریشی نورمال قالدیریشدیر بو توپلوم وریندن بیه نیلیب قالدیریلماق ایسته ین بیر شاعیردیر آنجاق توپلوم اونون ایسته دییی نی وئرمه دییی اوچون او توپلومون آیاغینا دوشوب قالدیریلماسی ایچین یالواریر. توپلوم ساریندان قالدیریلمیر، دولت وریندن بیر آبیده یه دؤنور. شهریارلا سهند کیمی. بیری نین قبری آبیده اولوب بیریسی ایسه آدی بیله آلینمیر. 

سهند نظمی: بیر ده اولایلار گئجه­ده باشلاییب گئجه­ده ده بیتیر. بورانین  24ساعاتی دا گئجه دیر. قارانلیقدیر. بوتون چالیشمالاردا بو دورومدان قورتولماقدادیر. قالدیریلیب یولونون آردینی توتماق ایچیندیر. یا دا اولوسون ساریندان قالدیریلدیقدان سونرا ، اونلارین یؤنو ایله گئتمکدیر.آما بوردا یاشایان اینسانلارین تکجه انگلری ایشلیر. اللری ایشلمیر. گلن سورو سورور، نه اولوب؟ اؤلوب؟ اؤلمه ییب؟ گؤردوکلری ایش بیر زنگ آچماقدیر اونو دا ایکی ساعات چکیش-برکیشدن سونرا. 

بیرده من دئییملر حاقیندا بئله دئییم کی حامد بیین ایشلتدییی دئییملر توپلوملا توتمور. بیزیم توپلومدا زنگ آچماق یوخسا احتمال سؤزلری ایشله دیلمز. دیل فرقلییی وار.  

آیریجا یازیچی بیر یئرده دئییر سن بیل آللاهینیز نه یه ییخیلماغیمی سورمایین منی قالدیرین لوطفن، بو جومله ایله اؤزونون یا دا توپلومون مذهبدن یانا اولدوغونو گؤستریر. 

نشاط شیخ الاسلامی: ائله دیر هم ده آللاها آند وئردیکدن سونرا گؤرور قالدیریلمادی سیزی ایناندیغیز منی قالدیرین لوطفن دئییر. اینسانلاری اینانج آچیسیندان ائتکیلمه یه چالیشیر.  

آتیلا سلمانی: بو آدام ندن بو قدر یومشاقدیر. قالدیریلماییر آنجاق سینیرلنمیر ده؟ 

یاسر ارتشی (میرزآغا): شاعیر اولدوغو ایچیندیر. بو آدام ان سینیرلی حالیندا دا لوطفن سؤزونو ایشله دیر. 

سهند نظمی: یوخ، من بئله دئیه بیلمیرم... هر حالدا، بیرآز دا توپلوم حاقیندا دانیشاق. بوردا هر ایش پولیس الی ایله گؤرولور. پولیس گلمه دن ییخیلانا اورژانس دا ال وورمور. سلیمان بیین دئدیگی کیمی، یازیچی بوردا بیله رک گؤرولرین دییشیک یازیب.  

سلیمان جعفری: البتده من بوردا ایکی تور پولیس گؤرورم، آدی اؤنجه دن قارا لیسته ده دیر بیر کره ده ییخیلدیقدان سونرا آدینی قارا لیسته یه یازیرلار. بیر پولیس توپلوملا اوزبه اوز اولان پولیسدیر، بو پولیس اورژانسلا بیرلیکده گلیر ایکینجیسی ایسه شکیل اللرینده گلیب شوشه سیندیرانلاردیر. هله بو شوشه نین ده عادی شوشه اولمادیغی ایله ایشیم یوخدور- نییه کی بو ایکی دونیا آراسیندا چکیلمیش بیر دووار کیمیدیر، سینماسی ایله ده بو آدام باشقا دونیایا کئچه بیلیر-. بو ایکینجی پولیسلر اؤزل پولیسلردیر. بیرینجی پولیس بونو کیملییی ایله تانیییر ایکینجی پولیسین الینده بو آدامین شکلی بیله وار. بو آدامی شهردن شهره قووالاییب سورگون ائدن ایکینجی پولیسدیر.  

سهند نظمی: آنجاق منجه یازیچی بورانی بیراز آبارتمیش. ییخیلان بیریسی نین چئوره سینه سرباز دوزمه یی هئچ یئرده گؤرمه میشم.  

سمانه پیری: بو آدام بوتون دیللری بیلیرمی؟ توریستلرین بؤلومونده بیرحالدا کی بو آدام ییخیلیب یئرده قالیبدیر بو دیللرین هامیسینی سئچیر. فرانساجا، تورکجه، عربجه ....هم ده او حالدا. 

سهند نظمی: بو آدام عادی بیر آدام دئییل بو بیر بیلگین کیمی تانیتدیریلیر. دونیا بو آدامی تانیر. توریستلر ده بو آدامین ییخیلماسینا باخماغا گلیرلر. بو دوروم ییخیلان کیشی نین دونیا ایله ایلگیلی اولدوغونو گؤستریر. بیر ده ایچ توپلومون الیندن هئچ ایش گلمیر آیری اؤلکه لردن گلیرلر کی سنه نه اولوب. نه یه ییخیلمیسان؟ 

آتیلا سلمانی: بوردا سنه نه اولوب افندیم؟ کیمی بیر سورو وئریلیر. یازیچی بوردا تورکییه لیلری ده توریست اولاراق گؤرورمو؟ 

هامی بیردن: البتته، یازیچی بیله رک بو نئچه دیلی سئچیب. بو دیللرده دانیشانلار اولایین اوز وئردیگی یئرده یابانجی اولاراق تانیتدیریلیر.  

یاسر ارتشی (میرزآغا): حامد بی بوردا توریستلرین دیلیندن وئردییی سؤزلرله ییخیلان کیشی نین آذربایجانلی اولدوغونو بیلدیریر. تورریستلرین سؤزلری ایله اؤیکونون جغرافی دورومونو آچیقلیر.  

نشاط شیخ الاسلامی: منه ائله گلیر کی بو توریستلرین اولدوغو بؤلومو گؤزده توتماساق بو اولای هر یئرده، هر بیر اؤلکه ده باش وئره بیلر. هئچ بیر آد وئریلمیر بوردا.  

سهند نظمی: بوردا توریستلرین گلیشینه باشقا بیر آچیدان دا باخماق اولار. اؤزل بیر آدام ییخیلیب. اورژانس، قورتارما ائکیپلری، پولیسلر گلیب-گئدیبلر. یئرلی میلتدن ده اوردا اولانلار اؤز گوجلرینی سینادیقدان سونرا چکیب گئدیبلر. ایندی دؤولت بو آداما آبیده تیکمکله بیر مئساژ وئریر، دئییر:  " هانی دئییردیز بو آدام ییخیلیب، باخین بیز بو آداما آبیده دیکلتمیشیک. گؤرون بونو هارا قالدیرمیشیق. "  بیر اوخ ایله نئچه نیشان وورور. بونو اؤزو ییخیب. اؤزو آبیده تیکیب، ایسته دییی گون ده شوشه لری یوخ اولور.  

آتیلا سلمانی: من بوردا اؤیکودن چیخیب حامد به یه اؤزل بیر سورو وئرمک ایستیرم. سیز بو کاراکتئریزه آد سئچسیدیز نئجه بیر آد سئچردیز؟ تورکجه یوخسا فرقی یوخدور؟  

حامد احمدی: بئله دئییم کی بو کاراکتئر اؤزللیکله آدسیز یارادیلیبدیر. اوندان سونرا دا من حیکایه یازارکن یوخسا ادبییاتدا چالیشارکن یانلیز ادبییات آچیسیندان باخیرام. باشقا دوشونجه لریمین یازدیقلاریمین ائتگیله مه سینی ایستمیرم. 19- جو یوز ایلین یازیلاری کیمی کاراکتئره آدلا گوج وئرمک گرکیرسه دوروم باشقادیر.  

سلیمان جعفری: حامد بی منه ائله گلیر کی یازیچی ایستر-ایسته مز بو دوروملا ال-به-یاخادیر. سیزین کاراکتئره وئردییی نیز آد اوندا یاراتماق ایسته دییی نیز کیشیلییی ائتکیلیه جک.  

حامد احمدی: ائله دیر. آنجاق بیر وار بیر یازیچی بیلرک اؤزل بیر آدی کاراکتئرینه وئرمکله بیر باشقا یوکده بو کاراکتئره آرتیریر. یادیما گلن اؤرنکلردن سالینگئر ،ناتوره دشت آدلی رومانیندا هولدئن آدی وئرمکله کاراکتئرینه (منیم کیمی عادی بیر اوخوجو بونو آییرماسا دا بیر اینگیلیز دیللی اوخوجو بونو آییرد ائده بیلر) اونون روماندا اولان گؤروینی آچیقلیر. یا احمد محمود همسایه ها رومانیندا بیر کاراکتئرینی امید سئچیر. بو دا اونون رومانی نین هاواسینا اویوملودور. آما گرکلی دئییل کی کاراکتئرین آدی اؤزل آنلام داشیسین. من آرتیق چالیشیرام حیکایه لریمده کاراکتئره آد وئرمه یم. بونون اوچون ده اؤزومه بللی ندنلریم وار. آد وئرمک زوروندا قالسام دا یا او باخیشدان آد سئچیرم کی بو کاراکتئره اؤزل بیر آنلام وئرسین، اونو آرتیق تانیتدیرسین، منیم بیر نئچه سطرده تانیتماق ایسته دییی می بو آد دئسین. یا دا ذهنیمه گلن ایلک آدی سئچرم.  

سمانه پیری: بو شوشه نئجه شوشه دیر؟ گونشین-آیین ایشیغی اوندان کئچمیرآنجاق بو آدام بوتون دانیشیقلاری ائشیدیر؟  

سلیمان جعفری: بونو عادی بیر شوشه گؤرمک اولمور. بو بیر سینیرین سیمگه سیدیر.  

نشاط شیخ الاسلامی: بو اؤیکونون ذاتیندا بیر غئیر- طبیعی لیک وار، باشلانیشیندان وار سونونادک. یازیچی ائله بیر دوروم یارادیر کی نئجه اینانیلماز، نئجه انه- شوش بیر اولایدان دانیشسا بیز دئییریک اولا بیلر. اولوب کی بو بئله یازیب. بو دا اونون دیلی نین گوجلولویونه قاییدیر. 

زهرا: گئنل باخاندا بو اؤیکونو پارادوکسیکال فضاسی گؤزللشدیرمیشدی. 

سلیمان جعفری: یولداشلاردان بیری دئیردی: ایندی او زامان دئییل من بیر اؤیکونو ایکی کره اوخویام. واخت ایندی اؤنملیدیر. بو اؤیکونو بیز ایکی کره اوتوروملاریمیزدا یئرلشدیردیک. بو دا بو اؤیکونون بیه نیلمه سینی گؤستریر. او قدر پارادوکس واریدیر کی من اؤزوم تاریخ نادیرینی یارییاجا اوخویا-اوخویا باش تاپمادیم نه دئییر!  

  آنجاق اؤیکونون سونونا گؤره دانیشیب سؤزو حامد به یه وئرک. بیزیم کندده بیر کیشی واریمیش ایشی اونا-بونا خاروار داشیماق ایدی. بو کیشی اؤلدوکدن سونرا بیر گئجه کندلیلرین بیری نین یوخوسونا گلیر، سوروشور: عمی بو دونیادا کی ایشینی بیلیریک بس ایندی اوردا نه ایش گؤرورسن؟ دئییر: - بوردا دا جهننمه آلیشیق داشیرام. بوردا دا حامد بئله بیر دوروم یارادیب. بو آدام او دونیایا گئدیر. بئله دوشونور قورتولوب. آما ایکی کیشی گلیب اونو اللرینده اولان شکیلله توتوشدوروب  " اؤزودور "  دئیه رک گؤتوروب آپاریرلار. بوردا اونو آختارانلار یئردن قالدیریب آپارماغا گوجو چاتمیر اوردا یئتیشیب-یئتیشمه میش آپاریلیر. یئنه ده بیر پارادکس لا ال-به-یاخا اولوروق. قورتولوش سیمگه سی کیمی تانینان اوچوش نوقطه سی، ائله اصیل توتوقلاندیغی آن اولور. 

سهند نظمی: بونو آپاریرلار. یئنه ده ایستییه رک گئتمیر. منجه یازیچی نین ایچینده بیر یئتیشمک قورخوسو وار. کاراکتئری ایسته دییی نه چاتدیرمیر. قورتولوش آنی شهریار دئمیشلی  " قاییتدیق قویون اولدوق "  آنی اولور. ایسته دییی نه چاتدیغینی ساندیغی زامان یئنه باشقالاری نین الی ایله آپاریلیر او یان بو یانا. یازیچی نین یئتیشمک اومودو ایله یاناشی بیر چوخ قورخولاری وار. بو قورخو ائله  " قاچماغیمین ندنینی سوروشما "  دئدییی نده اوزه چیخیر. بو قورخو سون بؤلومده اوخوجونون اوریینده قالمالیدیر. اونو کیم آپاردی؟ هارا آپاردی؟  

یاسر ارتشی (میرزآغا): یئتیشمک ایچین هرکسه منی قالدیرین دئیه یالواران آدام سونوندا اؤزو قالخیر گئدیر. بورانین پولیسی بونو قالدیرانمیر، یئتیشمک ایسته دییی یئرین پولیسی اونو توتوب آپاریر. اؤزو ده اورانین پولیسلری قانادلیدیر. نه شکلینی بیلگی سایارا وئریر نه بیرزاد. ایلکینده دئییلن اوچماق حسسی گؤر نئجه سونلانیر.  

حامد احمدی: من ایستیردیم سیزین ذهنیزده اؤزوزون حیکایه دن آلدیغیز قالا. اونا گؤره ده ایستیرم دئدیکلریمی تکجه ائشیده سیز. یولداشلارین ایسته دییی ایچین بیر نئچه سؤز دئییرم. بو اؤیکونون ایلک باش یازیسی امام حسین حضرتین بیر حدیثی ایدی بئله بیر مضموندا  "  من تاریخده همیشه تیکرار اولورام  "  بو باخیشینان، بو باش یازی ایله قاباغا گئدنده، بیر ده بو کی بیز ائله بو حیکایه یه گیرنده بیر رئال فضایلا گیریریک. ییخیلماق، ییخیلانین باشینا ییغیشماق، اورژانس، گئنلده بیری ییخیلاندا گؤرولمسی گرکن ایشلردیر. بوراجان رئالدیر آما گولونج بیر رئال. گولونج بیر دوروم وار. میلتین الیندن هئچ ایش گلمیر. اینسانلار پاسیفدیر، مونفعلدیر. هله پولیس گلندن سونرا، بیر نئچه رئال اولایدان سونرا بیز گؤروروک بو آدام ترپننمیر، یئردن دورانمیر. دئییلن دییالوقلاری ائشیدیلمیر. بوندان سونرا حیکایه بیر فانتزی فضایا ساری گئدیر. بو فانتزیلییی نده ده کومیک بیر دوروم وار. آنجاق گلک توریستلرین بؤلومونه، باخین من او خانیمین باخیشیندان (نشاط) باخماق ایستیردیم. ایستیردیم دوروم سینیرسیز اولسون، بللی بیر جغرافییایا باغلی اولماسین. بو ایش هر توتالیتئر توپلومدا اوز وئره بیلر. من ایستیردیم بوردا سیزییئفین دورومو یارانسین او، داشی داشیماغا محکوم اولوبدور بیزیم کاراکتئر ایسه یئره باغلانیب. یئرده قالماغا محکومدور. بو محکوملوق بیتندن سونرا یئنه اذییتلر باشلانیر. باشقا آچیدان باخساق ظلم اولان یئرده بئله اینسانلار دا اولا بیلر. توپلومدان بیرآز آرتیق دوشونن اینسانلار دونیانین هر یئرینده یئره یاپیشیب قالاجاقلار. باشلاری نین اوستونده هالوژئنلر یاندیریلاجاق. من بو حیکایه ده آردینجا گزدیی یم سورو، توپلوملا سئچگینلریمیزین آراسیندا اولان فاصیله دیر. بو دورومدا توپلوم اؤز دوشونجه لی اویه لریله ایلگی قورا بیلمییه جک. سونوجدا دا بو دوشونجه لی اینسان باسقی آلتیندا یاشامالیدیر. 

  دئییر  " میللت منی گؤرمک اوچون الینی جیبینه سالمالی ایدی. "  بو بیر سیرکه دؤنوشوبدور. اینسانلیق دوروموندان چیخیب. بیر حئیوان اولوب، اؤزو ده سیرک حئیوانی. سونوندا دا بونون بیر خطری اولاجاغینی ظن ائدیرلر. گلیب شوشه نی سیندیریرلار. باشقا دوروملار، ایکیلی پولیسلر، اوزوقویلو دوشدویو آندا هامینی گؤره بیلمک کیمی یئرلر اَیر باخیشیمیز رئال اولماسا حل اولاندیر.  

سهند نظمی: حامد بی بو ناغیل بیر خاص حادیثه نین اوزوندن یازیلیبمی؟! 

حامد احمدی: ائله دیر، بیر گئجه ائوه گئدیردیم، یاغیش یاغیردی، قارانلیقیدی، من ده قاچیردیم ایسلانمایام. کوچه دن چیخان بیر ماشین، قارانلیقدا اونون ایشیقلاری نین اوستومه دوشمه سی من ده بو دویغونو یاراتدی. دئدیم ایندی بوردا ییخیلسام نه اولاجاق.  

آتیلا سلمانی: آما من بونو عادی بیر ییخیلماق گؤرمورم.  

حامد احمدی: من ده ییخیلمادیم کی! 

شمس: گلدییینیز ایچین ساغ اولون.